Gẹnẹsis 24 - Edo Bible (E Baibol Ẹdo) Version 1996

Okhuo Ne A Rhie Ne Aizik

¹ Te Ebraham ghi wa khian ọmaẹn ẹsẹse, Osanobua keghi wa vbe fiangbẹe vbe emwi ne ọ ru hia.

² Ọ keghi tama ne ọ ghi re ọdiọn vbe avbe eguọmwadia ẹre hia, ne ọ vbe gbearoghe emwi ne ọ mwẹ hia wẹẹ, “Do viọ obọ yọ mwẹ akharha ne u vẹn ihẹn.

³ I ho ne u vẹn ihẹn ya yan ma mwẹ vbe odaro Nọyaẹnmwa ne ọre Osanobua ọghe ẹrinmwi kevbe agbọn wẹẹ, u i ra rhie okhuo ne ovbi mwẹ vbe Kenan ẹvbo ne I ye na.

⁴ U ghi gha rrie ẹvbo mwẹ ne u ya rhie okhuo gie Aizik ne ovbi mwẹ vbe usun ivbi etẹn mwẹ.”

⁵ Sokpan ọguọmwadia nii wanniẹn wẹẹ, “A deghẹ okhuo nii ma ghi kpao vbe owa ne ọ lele mwẹ gha die ẹvbo na vbo? Te I gha ghi rhie ovbuẹ werriegbe gha rrie ẹvbo ne u ke rre ra?”

⁶ Ebraham keghi wanniẹn wẹẹ, “Ghẹ gia miẹn wẹẹ u dọlegbe rhie ovbi mwẹ gha rrie odọ!

⁷ Nọyaẹnmwa, Osanobua ẹrinmwi kevbe agbọn ọre ọ rhie mwẹ ke owa erha mwẹ ladian hin otọ avbe etẹn mwẹ rre, ọ na vbe yan ma mwẹ ighẹ rẹn gha mu otọ na ne imẹ kevbe uniẹn mwẹ, ọ gha gie odibo ẹre ke odaro nuẹn ne u miẹn ehe na miẹn okhuo rhie ne ovbi mwẹ vbe evba.

⁸ Sokpan deghẹ nene okhuo ghi wẹẹ rẹn i leluẹ dee, ihẹn ne u vẹn mẹ na ghi lahin ruẹn uhunmwu rre, sokpan, vbene ọ rhirhi a gha ye hẹ, ghẹ dọlegbe rhie ovbi mwẹ gha rrie odọ.”

⁹ Ẹre ọguọmwadia nii na viọ obọ ẹre ye akharha Ebraham ne arowa ẹre, ọ na yan wẹẹ rẹn gha ru zẹ vbene Ebraham nọ rẹn.

¹⁰ Ọguọmwadia nii ne ọ gbearoghe emwi Ebraham hia keghi viọ igbe vbe uwe ekẹtẹkẹtẹ arowa ẹre, ọ na gha rrie ẹvbo ne Nahọ ye vbe Mẹsopotamia.

¹¹ Ọ ghi sẹ evba, ọ viọ avbe ekẹtẹkẹtẹ nii ye iguẹ vbe ọkpẹn uhae ne ọ rre vbe a ra ladian vbe ẹvbo nii, ọ keghi re ẹdogbota, ẹghẹ ne ikhuo do ya gha sa amẹ.

¹² Rẹn ka na erhunmwu wẹẹ, “Nọyaẹnmwa, Osanobua ọghe Ebraham ne arowa mwẹ, rhie arudinodẹ mẹ ẹre na ne u mu eyan ne u yan ma arowa mwẹ sẹ.

¹³ I mudia ye ọkpẹn uhae na ẹghẹ ne emọ ikhuo ni rre ẹvbo na gha na do sa amẹ.

¹⁴ I gha khama ọmọ okhuo ọkpa wẹẹ, ‘Ya uru ruẹ sa amẹ mẹ wọn.’ Adeghẹ ọ khare wẹẹ, ‘Miẹn ne u wọn, I gha vbe sa ne avbe ekẹtẹkẹtẹ ruẹ.’ Gie ẹe gha re okhuo ne u zẹe ne Aizik ne ọguọmwadia ruẹ. Ọ gha sunu vbe nian, I ghi rẹn wẹ u mu eyan, ne u yan ma arowa mwẹ sẹ.”

¹⁵ Vbe ọ ghi te na erhunmwu fo, Ribẹka keghi rre kẹe kevbe esago ẹre vbe izabọ, ovbi e Bẹtuẹl nokhuo nọ ne ovbi ọtẹn e Ebraham nokpia ighẹ Nahọ kevbe amwẹ ọnrẹn Milka.

¹⁶ Uvbi ọre nọ, ọ keghi mose ẹsẹse, ọ ma he rẹn okpia. Ọ keghi rrie uhae, ọ ke ya sa amẹ vuọn esago ẹre, ọ na dọlegbe gha dee.

¹⁷ Ọguọmwadia nii keghi rhulẹ bu ẹre, ọ tama rẹn wẹẹ, “Lahọ sa amẹ mẹ wọn vbe esago ruẹ na.”

¹⁸ Rẹn wanniẹn, “Miẹn ne u wọn enọwanrẹn,” ọ na sie esago nii vbe izabọ ẹre, ọ na dae yi nẹẹn wọn. Ọ ghi wọn nẹ, ọ tama rẹn wẹẹ,

¹⁹ “I gha vbe sa gie avbe ekẹtẹkẹtẹ ruẹ ne iran wọn vbene iran ho.”

²⁰ Ọ re ọ na tue esago ẹre ye ọkpan ne avbe aranmwẹ, iran na wọn amẹ, ọ na dọlegbe gha rrie uhae ya sa ọvbehe ọ te do sa gba avbe ekẹtẹkẹtẹ nii obọ.

²¹ Okpia nii keghi hẹko mudia gha ghe ẹre ne ọ miẹn ehe na rẹn a deghẹ te Nọyaẹnmwa rhie arudinodẹ ne irẹn vberriọ.

²² Ugbẹn vbe ọ ghi sa amẹ ne avbe ekẹtẹkẹtẹ nii wọn fo nẹ, okpia nii keghi rhie oroka ihue ọghe igoru ighobioye ye ọre ihue, ọ keghi viọ emwiobọ eva ọghe igoru nekhua ye ọre obọ.

²³ Ọ keghi nọ rẹn wẹẹ, “Gha ọre erhaa? Lahọ, tama mwẹ. Otọe rre owa erhaa ne ọ gha gua mwẹ gua emwa mwẹ vbe asọn na ra?”

²⁴ Rẹn wanniẹn tama rẹn wẹẹ, “Ovbi Bẹtuẹl ne ovbi Nahọ kevbe Milka, ọre I khin;

²⁵ irunmwu kevbe evbare aranmwẹ wa bun vbe owa ima, u gha vbe miẹn ehe dia.”

²⁶ Okpia nii keghi diguẹ, ọ na ya uhunmwu rhanmwẹ otọ ne Nọyaẹnmwa.

²⁷ Rẹn keghi kha wẹẹ, “Urhomwẹ nọ ne Nọyaẹnmwa, Osanobua Ebraham arowa mwẹ ne ọ wa rhie ekhọe yọ ne ọ mu eyan ne ọ yan ma arowa mwẹ sẹ. E Nọyaẹnmwa wa ma mwẹ odẹ gha die owa ọtẹn arowa mwẹ zẹẹ.”

²⁸ Ọmọ okhuo nii keghi rhulẹ gha rrie owa iyẹe, ọ keghi ya na iyẹn na hia ma rẹn.

²⁹ Leban ne ọtẹn Ribẹka keghi rhulẹ ladian gha rrie uhae ne nene okpia ye.

³⁰ Rẹn keghi miẹn oroka ihue kevbe emwiobọ nii vbe obọ ọtiọnrẹn ne okhuo, ọ keghi vbe họn vbe ọ ta ẹmwẹ ne okpia nii tama rẹn, ọ na gha rrie ehe ne ọguọmwadia Ebraham na mudia ke avbe kẹtẹkẹtẹ ọre vbe ọkpẹn uhae.

³¹ Rẹn keghi tama rẹn wẹẹ, “Lele mwẹ gha die owa, ọmwa ne Nọyaẹnmwa fiangbe ọre u khin, vbua na mudia ye ore hẹ yi vbe I dọlọ ihe eso ye otọ khẹ ruẹ nẹ vbe uwe owa, otọ vbe rrọ ne avbe kẹtẹkẹtẹ ruẹ.”

³² Ẹre okpia nii na la owa, e Leban keghi bannọ ihẹ hin egbe avbe ekẹtẹkẹtẹ rre, ọ keghi viọ irunmwu kevbe evbare ne iran, ọ kevbe sa amẹ gie ọguọmwadia Ebraham kevbe emwa rẹn ya kpe owẹ.

³³ Ugbẹn vbe iran ghi mu evbare rre, okpia nii na kha wẹẹ, “Mẹ i he rri evbare I te guan ẹmwẹ nọ rrọ mwẹ unu.” E Leban wanniẹn wẹẹ, “Khianmwu, gha guan.”

³⁴ Rẹn keghi suẹn, ọ wẹẹ, “Ọguọmwadia Ebraham ọre I khin.

³⁵ E Nọyaẹnmwa fiangbe arowa mwẹ ẹsẹse, ọ keghi yae khian okpọmwa. Ọ viọ oghẹn ohuan kevbe ọghe ẹwe nẹẹn, ẹmila, esiliva, igoru, eviẹn ikpia kevbe ikhuo, ekẹtẹkẹtẹ kevbe ẹsin.

³⁶ E Sera ne amwẹ arowa mwẹ keghi biẹ ọmọ okpia ọkpa nẹẹn vbe ẹghẹ ọmaẹn ọnrẹn. Arowa mwẹ viọ emwi hia ne ọ mwẹ nẹẹn.

³⁷ Rẹn keghi ya mwẹ vẹn ihẹn ne I yan wẹẹ, ‘I gha ru vbene irẹn khare wẹẹ, ghẹ rhie okhuo ne ovbi mwẹ vbe uwe ivbie Kenan ehe ne I ye na.

³⁸ Sokpan u ghi gha rrie odẹ ọghe emwa erha mwẹ, avbe etẹn mwẹ ne u ya rhie okhuo ne ovbi mwẹ.’

³⁹ Mẹ keghi tama arowa mwẹ wẹẹ, ‘A deghẹ nene okhuo ma lele mwẹ kpao vbo?’

⁴⁰ Rẹn keghi wanniẹn wẹẹ, ‘Nọyaẹnmwa, ọmwa ne I mẹ gha họn ẹmwẹ na vbe ẹghẹ hia gha gie odibo ẹre leluẹ, ne ọ rhie arudinodẹ nuẹn. Uwe emwa mwẹ ọre u gha na rhie okhuo ne ovbi mwẹ, kevbe uwe ẹgbẹe erha mwẹ.

⁴¹ U gha ru ọna, u gha miẹn uhunmwu vbe obọ ihẹn mwẹ. U gha vbe gha rrie ẹbu emwa mwẹ ighẹ iran ma rhan obọ miẹn ruẹn, u gha vbe miẹn uhunmwu vbe obọ ihẹn mwẹ.’”

⁴² “Mẹ ghi sẹ uhae na ẹrẹna, I keghi na erhunmwu wẹẹ, ‘E Nọyaẹnmwa, Osanobua Ebraham ne arowa mwẹ, lahọ rhie arudinodẹ mẹ vbe emwi ne I ru vbobọ na.

⁴³ Ọkpẹn uhae ọre I ye na, ọvbokhan okhuo gha rre do sa amẹ, I gha tama rẹn wẹẹ, “Lahọ sa amẹ mẹ wọn vbe esago ruẹ.”

⁴⁴ A deghẹ ọ khare wẹẹ, “Miẹn ne u wọn, I gha vbe sa ne ekẹtẹkẹtẹ ruẹ,” gie ọnii gha re ọmwa ne u zẹe ne ọ gha re amwẹ ovbi arowa mwẹ.’

⁴⁵ Vbe I ghi te na erhunmwu uwe ekhọe mwẹ fo, e Ribẹka keghi rre, kẹe kevbe esago amẹ ọnrẹn vbe izabọ, ọ na gha rrie uhae ya sa amẹ. Mẹ keghi tama rẹn wẹẹ, ‘Lahọ sa amẹ mẹ wọn.’

⁴⁶ Rẹn keghi zẹgiẹ sie esago ẹre vbe izabọ, ọ wẹẹ, ‘Miẹn ne u wọn, I gha vbe sa ne avbe ekẹtẹkẹtẹ ruẹ wọn.’ Ọre I na wọn, ọ kevbe sa ne avbe ekẹtẹkẹtẹ wọn.

⁴⁷ I keghi nọ rẹn wẹẹ, ‘Gha ọ re erha a?’ Rẹn keghi wanniẹn wẹẹ, ‘Ovbi e Bẹtuẹl nokhuo ọre I khin, ovbi Milka kevbe Nahọ.’ Ọre I na rhie oroka nii ye ọre ihue, kevbe emwiobọ ye ọre obọ.

⁴⁸ I keghi diguẹ ya uhunmwu rhanmwẹ otọ ne Nọyaẹnmwa, I keghi rho Nọyaẹnmwa, Osanobua Ebraham ne arowa mwẹ, ne ọ ma mwẹ odẹ ẹsẹse vbe nian. Rẹn keghi rhie mwẹ bu ọtẹn arowa mwẹ nokpia, ehe ne I na miẹn ovbi ẹre nokhuo rhie ne ovbi arowa mwẹ.

⁴⁹ Banbanna na nian, a deghẹ te u ra ru zẹ vbene ọ khẹkuẹ ne arowa mwẹ, tama mwẹ, a deghẹ ẹ i re vberriọ vbe tama mwẹ ne I miẹn ehe na rẹn emwi ne I gha ru.”

⁵⁰ E Leban kevbe Bẹtuẹl keghi wanniẹn wẹẹ, “Ugbẹn vbe a miẹn wẹẹ obọ e Nọyaẹnmwa ọre emwi na la rre, ẹ i re ima ọ gha ta emwi ne a gha ru.

⁵¹ Ghe Ribẹka ne u rhie gha khian, giẹe gha re amwẹ ovbi arowa a zẹ vbene Nọyaẹnmwa tobọ ẹre tae.”

⁵² Ọguọmwadia Ebraham ghi họn vbene iran kha hẹẹ, ọ keghi vbokho rriotọ ye uhunmwu rhanmwẹ otọ ne Nọyaẹnmwa.

⁵³ Ọ viọ esiliva kevbe igoru ladian kevbe ikpẹrọnmwọ kevbe ukpọn ọ na viọ ne Ribẹka, ọ kevbe ya emwi ighobioye ne ọtiọnrẹn nokpia kevbe iye ẹe.

⁵⁴ Ọguọmwadia Ebraham kevbe emwa rẹn keghi re, iran na da, iran keghi gbe asọn nii vbe evba. Ugbẹn vbe iran ghi kpaegbe vbe owiẹ, ọ keghi wẹẹ, “Gun mwẹ werriegbe bu arowa mwẹ.”

⁵⁵ Sokpan iye e Ribẹka kevbe ọtiọnrẹn nokpia keghi kha wẹẹ, “Gie ọmọ okhuo na gu ima gbe uzọla ọkpa ra ikpẹdẹ igbe nẹ, vbe iyeke ọnii, ọ sẹtin gha khian.”

⁵⁶ Sokpan, rẹn wanniẹn wẹẹ, “Wa ghẹ vbe da mwẹ yi, e Nọyaẹnmwa rhie arudinodẹ mẹ nẹ, wa gunmwẹ dọlegbe bu arowa mwẹ gha khian.”

⁵⁷ Iran keghi wanniẹn wẹẹ, “Wa gia tie ọmọ na ne a nọ rẹn vbe ne ọ kha hẹ.”

⁵⁸ Rhunmwuda ọnii, iran keghi tie Ribẹka, iran nọ rẹn wẹẹ, “U ho ne u lele okpia na gha khian ra?” Rẹn wanniẹn wẹẹ, “I gha yo.”

⁵⁹ Rhunmwuda ọnii, iran keghi gie Ribẹka kevbe ọmwa ne ọ gbearoghe ẹre lele ọguọmwadia Ebraham kevbe emwa rẹn gha khian.

⁶⁰ Iran kevbe na erhunmwu ne Ribẹka vbe nian wẹẹ, “Ọtẹn mwa, iye arriaisẹn arriaisẹn u gha khian! Te uniẹn ruẹn gha khọn ẹvbo eghian iran muotọ!”

⁶¹ Ribẹka kẹe kevbe ne ọ gbearoghe ẹre keghi mu egbe, iran na hin ekẹtẹkẹtẹ ne iran lele okpia nii gha khian, ọguọmwadia nii keghi rhie ẹre, ọ na kpao.

⁶² Aizik kegha die ato ọghe “Uhae-ọmwa-nọrrọọ ne ọ bẹghe mwẹ” ne ọ rre odẹ ekẹn e Kenan.

⁶³ Ọ keghi ladian vbe ẹdogbota ne ọ ya rhie ẹhoho vbe ore, ọ na miẹn avbe ekẹtẹkẹtẹ vbe iran dee.

⁶⁴ Ribẹka keghi bẹghe Aizik, ọ na ghi tuorre vbe ekẹtẹkẹtẹ.

⁶⁵ Ọ na nọ ọguọmwadia nii wẹẹ, “Gha ọna khin ne ore ne ọ bu ima de na?” Ọguọmwadia nii keghi wanniẹn wẹẹ, “Arowa mwẹ nọ.” Rẹn keghi rhie ugbaleto, ọna rhie gue aro ẹre.

⁶⁶ Ọguọmwadia nii keghi talọ emwi ne irẹn ru hia ma Aizik.

⁶⁷ Aizik keghi rhie Ribẹka la uwe owa ukpọn, ọ na rhie ẹre rọnmwẹ. Aizik ho ẹmwẹ Ribẹka, ọnii ọre ọ ghi fu ẹre ẹko rre vbe iye ẹe ghi wu nẹ.