Gẹnẹsis 21 - Edo Bible (E Baibol Ẹdo) Version 1996

Ubiẹmwẹ Aizik

¹ E Nọyaẹnmwa keghi fiangbe Sera zẹ vbene ọ khare.

² Rẹn keghi do hanmwa, ọ na biẹ ọmọ okpia ne Ebraham vbe ọ khian ọmaẹn nẹ. A keghi biẹ ọmọ nii vbe ẹghẹ ne Osanobua khare wẹẹ a gha ya biọe.

³ Ebraham keghi he ovbi ẹre Aizik.

⁴ Aizik ghi rre ọmọ ikpẹdẹ erẹnrẹn, Ebraham keghi rhuẹ ọre zẹ vbene Osanobua tama rẹn.

⁵ Ukpo iyisẹn ọre ọ gha ye vbe a biẹ Aizik.

⁶ Sera keghi kha wẹ, “Osanobua rhie oghọghọ mẹ, ọ vbe zẹ mwẹ ogiẹ. Ọmwaikọmwa ne ọ họẹn gha gunmwẹ gie.”

⁷ Ọ keghi rhie tẹe wẹẹ, “De ọmwa ne ọ gha te sẹtin tae ma Ebraham ighe Sera gha koko emọ, sevba ghe vbe I biẹ ọmọ okpia nẹẹn vbe I khian ọmaẹn nẹ.”

⁸ Ọmọ nii keghi wan, vbe ẹdẹ ne a ghi fian ẹre ewẹn, Ebraham keghi le evbare eghọ nọkhua.

A Khu Hega Kevbe Ismẹl Ladian

⁹ Ẹdẹ ikẹtin ghi rre, Ismẹl ne Hega ne ovbi Igipt biẹ ne Ebraham keghi gha gu Aizik ne ovbi e Sera ku.

¹⁰ E Sera ghi miẹn ọẹn, ọ na tama Ebraham wẹẹ, “Khu okhuo ọviẹn na vbe ovbi ẹre ladian. Ọ ma kei ne ovbi okhuo ọviẹn na ghae vbe ukhu ruẹ ne Aizik ne ovbi mwẹ gha re”.

¹¹ Ẹmwẹ na keghi rhia Ebraham ẹko a ẹsẹse, rhunmwuda, ovbi ẹre nokpia ọre Ismẹl vbe khin.

¹² Sokpan, Osanobua ke tama Ebraham wẹẹ, “Ghẹ mu ẹmwẹ ọmọ okpia nii roro kevbe ọviẹn ighẹ Hega. Ru emwi ne Sera rhirhi tama ruẹn, rhunmwuda, urho Aizik ọre uniẹn ne I ve nuẹn ra la rre.

¹³ I gha vbe viọ emọ nibun ne ovbi ọviẹn nii nokpia ne iran vbe do khian iyaẹvbo, ovbuẹ nokpia rẹn vbe khin.”

¹⁴ Vbe owiẹ vbe ẹdẹ ghi gbe, Ebraham keghi rhie evbare eso kevbe ọgọ ohian ne amẹ voẹn ne Hega. Ọ keghi mu ọmọ nii vbovbo eẹ, ọ na wẹẹ ne iran gha rrie. Okhuo nii keghi kpao, ọ na ya gha bibi lele uwe ẹgbo Biẹsiẹba khian.

¹⁵ Ugbẹn vbe amẹ nii ghi fo, rẹn na ban ọmọ nii mu ye ototọ irhu,

¹⁶ ọ na ya tota vbe omwa izowẹ iyisẹn, ọ na ye ekhọe tae wẹẹ, “Mẹ i sẹtin yan aro a gha ghe ọmọ nii vbe ọ wu khian.” Ugbẹn vbe irẹn ghi tota ye evba, rẹn na ghi gha viẹ.

¹⁷ Osanobua keghi họn vbe ọmọ nii viẹ; odibo Osanobua keghi gu Hega guan ke ẹrinmwi rre, “De emwi nọ ruẹ yi Hega? Ghẹ gie ohan muẹn. Osanobua họn eve ọmọ nii nẹ.

¹⁸ Kpaegbe, ya mu ẹn ne u bọ ẹre. I gha ya uniẹn ọnrẹn khian iyaẹvbo nọkhua.”

¹⁹ Osanobua ke rhan rẹn aro, ọ na do bẹghe uhae, ọ keghi ya sa amẹ vuọn ọgọ ohian nii, ọ na vbe ya ne ọmọ nii wọn.

²⁰ Osanobua keghi yaba ọmọ nii vbe ne ọ wan khian, ọ kegha rre uwe ẹgbo Paran, ọ na do khian ohuẹ nọ guẹe ẹsẹse.

²¹ Iyẹe keghi ya rhie okhuo ke Igipt giẹe.

Ile Ne Ebraham Ke Abimẹlẹk Gba Ta

²² Ọ ghi sẹ, Abimẹlẹk na rhie Fikọl ne ọkaokuo ẹre ba egbe bu Ebraham gha khian, ọ wẹẹ, “Osanobua wa yaba ruẹ vbe emwi ne u ru hia.

²³ Rhunmwuda ọnii, yan vbe emwana nian vbe odaro Osanobua wẹẹ u i ra rẹrẹ mwẹ, ra ivbi mwẹ, ra uniẹn mwẹ. Te I wa rhiegba ye ẹmwẹ ruẹn, rhunmwuda ọnii, yan ighẹ u gha vbe gha rhiegba ye ẹmwẹ mwẹ, ke ye ẹmwẹ otọe na ne u ye.”

²⁴ Ebraham keghi kha wẹẹ, “I yan vberriọ.”

²⁵ Ebraham keghi ya gui ẹmwẹ uhae ne ọ wẹẹ ibiẹka Abimẹlẹk gbe miẹn ẹnrẹn re.

²⁶ Abimẹlẹk keghi kha wẹẹ, “I ma rẹn vberriọ, u ma tama mwẹ, ẹghẹ okaro ne I ya họẹn ọna khin.”

²⁷ Ebraham keghi viọ ohuan kevbe ẹmila eso ne Abimẹlẹk, iran eveva keghi gba mwamwa ẹn kugbe.

²⁸ Ebraham keghi hannọ ivbi ohuan ihinrọn ke uwe oghẹn ohuan rẹn ladian.

²⁹ Abimẹlẹk na nọ rẹn wẹẹ, “Vbọzẹ ne u na ruẹe vbe nian yi?”

³⁰ Ebraham keghi wanniẹn wẹẹ, “U ghi miẹn mwẹ ivbi ohuan ihinrọn na. U gha ru vberriọ, te u ghi yobọ yọ wẹẹ mẹ ọre ọ fian uhae na.”

³¹ A na ghi gha tie evba nii, Biẹsiẹba, rhunmwuda evba iran eveva na gba yan eyan.

³² Iyeke vbe iran ghi gba mwamwa emwi na kugbe nẹ vbe Biẹsiẹba, Abimẹlẹk ke Fikọl ne ọkaokuo ẹre ke werriegbe gha rrie otọe Filistin.

³³ Ebraham keghi gbọ erhan ikhinmwi ye Biẹsiẹba, ọ ke ga Nọyaẹnmwa ne Osanobua Etẹbitẹ.

³⁴ Ebraham kegha rre ẹvbo avbe Filistin vbe ẹghẹ ne ọ taẹn.