Gẹnẹsis 20 - Edo Bible (E Baibol Ẹdo) Version 1996

Ebraham Kevbe Abimẹlẹk

¹ Ebraham keghi si kpao vbe Mamrẹ gha rrie isoko Kenan, o na bu agọ ye ẹkpo Kedẹs kevbe Siuọ, ẹghẹ ne ọ na gha rre Gera.

² Ọ keghi kha wẹẹ, ọtẹn irẹn nokhuo ọre Sera ne amwẹ irẹn khin. Abimẹlẹk ne ọba Gera na rhunmwuda ọnii ya rhie Sera la owa.

³ Vbe asọn ọkpa, Osanobua keghi rhie egbe ma rẹn vbe imina, ọ wẹẹ, “Odẹ uwu ọre u gbẹn na, rhunmwuda okhuo ne u rhie re owa ọdọ ọre ọ ye.”

⁴ Sokpan Abimẹlẹk ma he sikẹ ọre, ọ keghi kha wẹẹ, “Nọyaẹnmwa, I ma rri abe! U gha gbele imẹ kevbe emwa mwẹ ra?

⁵ Ebraham khare wẹẹ, ‘Ọtẹn mwẹ nokhuo nọ,’ rẹn tobọ ẹre kevbe kha wẹẹ, ‘Ọtẹn mwẹ nokpia nọ.’ Ẹko ẹmwata ọre I ya ru emwi na, I ma ru khọ.”

⁶ Osanobua keghi wanniẹn vbe nene imina wẹẹ, “Ẹn, I rẹnrẹn wẹ ẹko ata u ya ru emwi na, rhunmwuda ọnii ọre I ma na guẹ rukhọ ghe mwẹ, vbene I ma na guẹ yobọ kan rẹn.

⁷ Sokpan, banbanna na nian, rhie okhuo nii werriegbe gie ọdọ ẹre. Akhasẹ rẹn khin, ọ gha na erhunmwu nuẹn ne u ghẹ wu. Sokpan, a deghẹ u ma rhie ẹre nẹẹn, I tama ruẹn yotọ nian wẹ te u wu, ke uwẹ kevbe ẹgbẹe ruẹ hia.”

⁸ Vbe owiẹ vbe ẹdẹ ghi gbe, Abimẹlẹk keghi tie eguọmwadia ẹre hia, ọ na na iyẹn na hia ma iran, ohan keghi mu iran ẹsẹse.

⁹ Abimẹlẹk ke tie Ebraham, ọ nọ rẹn wẹẹ, “Vbua na ru ima vbenian hẹ yi? De emwi dan ne I ru ẹre ne u na si emwi dan nọkhua na ye imẹ vbe otọe arriọba mwẹ egbe? A i ghẹ ru ọre u ru mwẹ re na.

¹⁰ Vbu a na ru emwi na hẹ?”

¹¹ Ebraham keghi wanniẹn wẹẹ, “Te I te gha ro wẹ ọmwa nọ mu ohan Osanobua i rre edinran kevbe wẹ, iran gha gbe mwẹ uan ne iran miẹn ehe na rhie ọvbokhan mwẹ.

¹² Vbe ẹmwata, ọtẹn mwẹ nokhuo gele nọ. Erha ọkpa ọre ọ biẹlẹ ima, sokpan ẹ i re iye ọkpa ọre I na rhie ẹre rọnmwẹ.

¹³ Ugbẹn vbe Osanobua ghi rhie mwẹ ladian hin owa erha mwẹ rre gha rrie isi, I keghi tama rẹn wẹẹ, ‘U ghi rhie ma wẹ u rhiegbe mu mwẹ vbe ne u gha na kha vbe eheikehe ne ima rhirhi yo wẹẹ, ọtẹn mwẹ nokpia nọ.’ ”

¹⁴ Ẹre Abimẹlẹk ghi na rhie Sera dọlegbe ne Ebraham, ọ keghi viọ avbe ohuan, ẹmila kevbe eviẹn ba ẹre re.

¹⁵ Ọ keghi tama Ebraham wẹẹ, “Otọe mwẹ ena hia khin, ehe ne ọ khọn ruẹn vbọ, dia.”

¹⁶ Ọ keghi tama Sera wẹẹ, “I ra rhie agiẹghẹ esiliva arriaigbe ne ọtuẹn nokpia ne a ya rhie ma iran hia ne uwa gba khian wẹẹ, u ma ru awua. Emwa hia gha rẹn wẹẹ, u ma ba emwi ku ru.”

^17-18 Nọyaẹnmwa keghi ruẹe ne okhuoikokhuo ghe miẹn ọmọ biẹ vbe owa Abimẹlẹk rhunmwuda emwi ne ọ sunu vbe egbe Sera ne amwẹ Ebraham. Ebraham keghi na erhunmwu ne Abimẹlẹk, Osanobua keghi mu ẹre egbe rran. Ọ kevbe mu amwẹ ọnrẹn ke avbe eviẹn ọnrẹn nikhuo ne iran sẹtin gha biẹlẹ.