Gẹnẹsis 18 - Edo Bible (E Baibol Ẹdo) Version 1996

A Tae Ighẹ A Gha Biẹ Aizik

¹ E Nọyaẹnmwa keghi rhiegbe ma Ebraham vbe ọkpẹn avbe erhan iruemwi ọghe Mamrẹ, Ebraham keghi tota ye onurho owa ukpọn rẹn vbe ogiavan ogioghogho,

² ọ ghi tọn aro mu vbe ọwarọkpa, ọ keghi ya dẹghe ikpia eha vbe iran mudia vbe evba. Ọwarọkpa nii vbe ọ ghi wa bẹghe iran, ọ keghi rhulẹ ke onurho owa ukpọn rẹn kpao ya vba iran. Ugbẹn vbe ọ ghi diguẹ mu aro rhuotọ nẹ, ọ wẹẹ,

³ “Wa Dọmọ ọ, ugamwẹ uwa ọre I rre ba, lahọ wa ghẹ rhiegberra owa mwẹ vbe na i na yakọ hiehiere. Ọguọmwadia ruẹ ọre I khin.

⁴ Gunmwẹ wẹ ne iran sa amẹ ya kpe uwa owẹ, wa sẹtin hẹwẹ vbe emwana, vbe ototọ erhan na.

⁵ I gha mu evbare eso rre. Ọna gha rhie ẹtin ne uwa ya deyan okhian uwa. Owa mwẹ ọre uwa rre, mẹ vbe mu egbe ne I ya mu ọghọ ye uwa egbe.” Iran wanniẹn tama rẹn wẹẹ, “Ọ maa, ya ru vbene u khare.”

⁶ Ebraham keghi rhulẹ la uwe owa ukpọn, ọ keghi tama Sera wẹẹ, “Mu ẹkpo ọghe irhuarhua ruẹ ne ọ maa sẹ, dọlọe yi ne u ya le ebrẹd.”

⁷ Iyeke ọnii, ọ keghi rhulẹ la erhu emwirri ẹnrẹn, ọ keghi dobọ mu ekhuia ẹmila ne sọguọsọguọ ne ọ vbe mwẹ egbe, ọ keghi mu ne ọguọmwadia ọkpa ne ọ zẹgiẹ mwamwa ẹn.

⁸ Ọ keghi rhie ewẹn ẹmila ọgbọn kevbe emiowo nii, ọ keghi viọ ẹre yotọ vbe odaro emwa nii. Iran ghi rri evbare nẹ, ọ keghi mudia ke iran vbe ototọ erhan nii.

⁹ Iran keghi nọ rẹn wẹẹ, “E Sera ne amwẹ ọn vbo yi?” Rẹn wanniẹn tama iran wẹẹ, “Ọ rre uwe owa ukpọn vbe evba.”

¹⁰ Ọkpa vbe uwe iran keghi wẹẹ, “I tama ruẹn nian, vbe uki ihinrin ne ọ dee mẹ gha dọlegbe rre, e Sera ne amwẹ ọn gha biẹ ọmọ okpia.” Sera kegha danmwehọ vbe odieke iran vbe onurho owa ukpọn.

¹¹ Ebraham vbe Sera wa khian ọmaẹn ẹsẹse. Sera i ghi vbe mu obọ mwẹ.

¹² Rhunmwuda ọnii, e Sera keghi hẹko gha giẹ, ọ wẹẹ, “Eban I khian ọmaẹn gbe ne ọ ghi biẹ, ẹghẹ na ọre I gha na ye gha miẹn okpia ra? Yevbe sẹ ọnii, ọdafẹn mwẹ khian ọmaẹn nẹ.”

¹³ Ẹghẹ nii ọre Nọyaẹnmwa na nọ Ebraham wẹẹ, “Vbọzẹ ne Sera na giẹ yi, ne ọ na kha wẹẹ, ‘Mẹ gha ye sẹtin biẹ vbe I khian ọmaẹn nẹ ra?’

¹⁴ Emwi ọkpa rrọ ne ọ lọghọ ne Nọyaẹnmwa ra? Vbe ẹghẹ ne ọ ke yi, vbe uki ihinrin ne ọ dee, I gha dọlegbe bu ruẹ rre, e Sera gha biẹ ọmọ okpia.”

¹⁵ Rhunmwuda ne ohan na mu Sera, ọ keghi siẹn wẹẹ, “I ma giẹ,” rẹn wanniẹn tama rẹn wẹẹ, “U giẹe vbe ne ẹmwata, u giẹe.”

Ebraham Rinmwian Ne Sọdom

¹⁶ Ẹre emwa nii na kpao, iran na gha rrie ehe ne iran gha ke sẹtin dẹghe Sọdom. Ebraham keghi lele iran ne ọ su iran sẹ odẹ.

¹⁷ E Nọyaẹnmwa keghi tae vbe ekhọe ẹre wẹẹ, “I i sẹtin rhie emwi ne I ra ru lẹre ne Ebraham.

¹⁸ Uniẹn ọnrẹn gha do khian agbọn ẹvbo nọkhua ne ọ mwẹ ẹtin, avbe uhunmwu otọ agbọn na hia, obọ ẹre ọre I ra la fiangbe iran.

¹⁹ I hannọ ọẹn zẹ nẹ ne ọ miẹn ehe na gha yi iyi ne ivbi ẹre kevbe emọ ne ọ gha la uniẹn ọnrẹn rre, ne iran gha họn ẹmwẹ mẹ, ne iran vbe gha ru emwi ne ọ ọhẹnhẹn. Ẹghẹ nii, I ghi do ru nẹ zẹ vbe ne I ve ẹre re hia.”

²⁰ Ẹkpo nii ọre Nọyaẹnmwa na khama Ebraham wẹẹ, “Emwa wa guan ẹmwẹ emwi dan ne Sọdom kevbe Gomorra ru, orukhọ iran vbe kpọlọ.

²¹ I ra do ya ghe deghẹ ẹmwẹ ne iran ta yọ mwẹ ehọ vbe ekpa ẹre, deghẹ ẹmwata nọ. I ra ya gualọ otọ ẹre.”

²² Avbe ikpia eva nii keghi kpao, iran keghi mu aro da Sọdom sokpan Nọyaẹnmwa keghi mudia ke Ebraham.

²³ Ebraham keghi sikẹ Nọyaẹnmwa, ọ nọ rẹn wẹẹ, “Te u ra gele fuẹn nọ ma rukhọ ba eni rukhọ ra?

²⁴ A deghẹ a miẹn arhunmwu ekigbesiyeha nọ ma rukhọ vbe evba nii, u gha ye fuẹn ẹvbo nii hia ra? U i sọrae ra ne u miẹn ehe na sinmwi arhunmwu ekigbesiyeha nii?

²⁵ Vbe na i na gbe awẹawẹ u i ra gbe ni ma rukhọ ba eni rukhọ. Ọnii i gia ru wẹ i sẹtin ru vberriọ. Ẹghẹ nii, a ghi rri eni ma rukhọ oya zẹ vbe eni rukhọ. Ọnii i gia ru, enọbuohiẹn otọ agbọn hia, te ọ gha ru emwi nọkere.”

²⁶ E Nọyaẹnmwa keghi wanniẹn wẹẹ, “A deghẹ I miẹn arhunmwu ekigbe siyeha ni maa vbe Sọdom, I gha rhunmwuda ekigbe siyeha nii sẹ ẹvbo nii rae.”

²⁷ Ebraham kevbe dọlegbe guan wẹẹ, “Lahọ, ghẹ gui ye udinmwẹ ne I ye ya guẹ guan na Nọyaẹnmwa. Ọmwa kẹkan ọre I khin, I i mwẹ asẹ ne I gha ya ta ẹmwẹ rhọkpa.

²⁸ Sokpan, a deghẹ arhunmwu isẹnyan iyeva ni maa ọre a miẹn vbọ ighẹ ẹi re ekigbe siyeha, u gha ye fuẹn ẹvbo nii rhunmwuda ighẹ isẹn ma giẹe gba?” E Nọyaẹnmwa wanniẹn wẹẹ, “Mẹ i ra fuẹn ẹvbo nii uan, a deghẹ I miẹn arhunmwu isẹn yan iyeva ni maa vbọ.”

²⁹ Ebraham kevbe dọlegbe guan, “U ghaghe iyeva ọkpa ọre ọ rrọọ.” Rẹn keghi wanniẹn wẹẹ, “I i ra fuẹn ọnrẹn a deghẹ a miẹn iyeva vbọ.”

³⁰ Ebraham keghi kha wẹẹ, “Lahọ ghẹ gie ohu muẹn Nọyaẹnmwa, I gha ye guan. A deghẹ ọgban kẹkan nọ vbo?” Rẹn wanniẹn wẹẹ, “I i ra ruẹe a deghẹ I miẹn ọgban vbọ.”

³¹ Ebraham keghi kha wẹẹ, “Lahọ ghẹ gui ye udinmwẹ ne I ye ya guẹ guan na Nọyaẹnmwa. A deghẹ ugie kẹkan ọre a miẹn vbọ vbo?” Rẹn keghi kha wẹẹ, “I i ra fuẹn ẹvbo nii uan a deghẹ I miẹn ugie vbọ.”

³² Ebraham keghi kha wẹẹ, “Lahọ ghẹ mu ohu Nọyaẹnmwa, I gha ye guan uhukpa na kẹkan. A deghẹ igbe kẹkan ọre a miẹn vbọ vbo?” Rẹn keghi kha wẹẹ, “I i ra fuẹn ọẹn ruan a deghẹ a miẹn igbe vbọ.”

³³ Ugbẹn vbe ọ ghi gu Ebraham guan fo nẹ, e Nọyaẹnmwa keghi kpao, ọre Ebraham na gha rrie owa.