Gẹnẹsis 17 - Edo Bible (E Baibol Ẹdo) Version 1996

Arhuẹ, Ama Ne A Ya Yi Ile Okhi

¹ Ugbẹn vbe Ebram ghi rre ukpo ọkpairrọvbiyisẹn, e Nọyaẹnmwa keghi rhie egbe ma rẹn, Ọ wẹẹ, “Mẹ ọrọre Osanobua Noghodua. U ghi gha họn ẹmwẹ mwẹ vbe ẹghẹ hia ne u gha ya vbe agbọn, ne u vbe gha ru emwi ne ọ gbae vbe ẹghẹ hia,

² I gha guẹ ta ile, I ghi vbe viọ emọ ivbi uniẹn ruẹn nibun nuẹn.”

³ Ebram keghi diguẹ mu aro rhu otọ, ẹre Osanobua na kha wẹẹ,

⁴ “Ile ne I ra gue ta ọna khin: I yan rẹn wẹẹ, erha odede ọghe okpẹvbo nibun ọre uwẹ khian gha khin.

⁵ A i ghi ra gha tie ruẹ Ebram ọvbehe sokpan Ebraham. Ọna ọre ọ ghi re eni ruẹn rhunmwuda, I ra ya a ru erha odede ọghe okpẹvbo nibun.

⁶ I gha viọ uniẹn nibun nuẹn, eso vbe uwe iran ghi gha re ọba, u gha mwẹ uniẹn nibun sẹrriọ wẹ iran gha khian okpẹvbo nibun.

⁷ “I gha mu eyan mwẹ sẹ ne uwẹ kevbe avbe ivbi uniẹn ruẹn vbe orre ne ọ dee zẹ vbe ile itẹbitẹ. Mẹ gha re Osanobua ruẹ kevbe Osanobua ọghe uniẹn ruẹn.

⁸ I gha mu otọe ne uwẹ ye na zẹ vbe orhunmwuyẹn ne uwẹ vbe uniẹn ruẹn. Otọe Kenan hia ghi gha re ọwuẹ ẹdẹdẹmwẹdẹ, mẹ ghi vbe gha re Osanobua iran.”

⁹ Osanobua tama Ebraham wẹẹ, “Wẹ tobọ ruẹ ghi vbe kue yọ ne u rhie ile ne u gun mwẹ ta mwẹ, wẹ kevbe uniẹn ruẹn vbe orre ne ọ dee.

¹⁰ Emwi ne uwẹ kevbe uniẹn ruẹn gha rhie obọ yi ne uwa ru ọre ọna khin: ọmọ okpiaikọmọ okpia vbe uwe uwa, te a gha rhuẹ ọre.

^11-12 Ke ẹghẹ na kpao, te u gha rhuẹ emọ ikpia ruẹ hia vbe ọ gha sẹ ọmọ ikpẹdẹ erẹnrẹn nẹ, kevbe eviẹn ne a biẹe vbe owa kevbe ne a dẹlẹ ke ore rre, vbe obọ avbe orhunmwuyẹn. Ọna ọre ọ gha rhie ma wẹẹ, mẹ vbe uwa gba ta ile.

¹³ Te a gha rhuẹ dọmwadẹ ọghọe, ọna ghi gha re ama vbe egbe uwa ne ọ rhie ma ile ne I gu uwa ta, ọghe ẹdẹdẹmwẹdẹ nọ.

¹⁴ Okpia ne a ma he rhuẹ, a ghi wannọẹn hin uwe ẹbu emwa rẹn rre rhunmwuda ọ ma họn ẹmwẹ mwẹ.”

¹⁵ Osanobua keghi tama Ebraham wẹẹ, “Ghẹ ghi tie amwọn Serai ọvbehe, Sera ọre a ghi tie ẹre.

¹⁶ I gha fiangbẹe, I gha giẹe biẹ ọmọ okpia nuẹn. I gha fiangbẹe, rẹn gha khian iye okpẹvbo nibun. A gha vbe miẹn avbe ọba vbe uniẹn ọnrẹn.”

¹⁷ Ebraham keghi diguẹ mu aro rhuotọ, sokpan ogiẹ keghi fẹe vbe ọ ghi ro ẹre wẹẹ, “Ọmwa gha ye sẹtin biẹ vbe ọ sẹ ukpo iyisẹn nẹ? E Sera gha ye sẹtin biẹ vbe ọ sẹ ukpo ekigbesiyisẹn nẹ?”

¹⁸ Ọ keghi nọ Osanobua wẹẹ, “I wẹ ne u gie Ismẹl gha re ne ọ gha rri ukhu mwẹ.”

¹⁹ Sokpan Osanobua tama rẹn wẹẹ, “U baeku, Sera ne amwẹ ọn gha biẹ ọmọ okpia nuẹn, wẹ ghi he ẹre Aizik. I gha ye ile ne I tae rre vbe ẹghẹ ọre kevbe ọghe uniẹn ọnrẹn, ile etẹbitẹ nọ.

^20-21 U tama mwẹ nẹ wẹ ne I gbe ebe gue Ismẹl. Emwi ne I ra ru ọre ọna khin. I gha fiangbẹe, I gha viọ emọ kevbe uniẹn nibun nẹẹn. Rẹn gha khian erha ivbiọba iweva, I ghi vbe ye uniẹn ọnrẹn ru okpẹvbo ne ọ kpọlọ. I gha ya ile ne I tae rre vbe egbe Aizik ne ovbuẹ ne Sera ra biẹ vbe omwa ẹghẹ na vbe ukpo ne ọ dee.”

²² Osanobua ghi gu Ebraham guan nẹ, Ọ na sọrae.

²³ Ẹdẹ nẹdẹrriọ zẹẹ, Ebraham keghi rhuẹ Ismẹl ne ovbi ẹre kevbe eviẹn ọnrẹn hia, kevbe ne a biẹlẹe vbe owa kevbe ne ọ ya igho dẹlẹ, emọ ikpia hia ni rre owa ẹre zẹ vbene Osanobua tama rẹn.

²⁴ Ukpo ọkpa irrọvbiyisẹn ọre Ebraham gha ye vbe ọ rhuẹre.

²⁵ Ismẹl ne ovbi ẹre keghi rre ukpo iwera.

²⁶ Ẹdẹ ikẹtin ọre a rhuẹ iran eveva.

²⁷ Ke avbe eviẹn Ebraham hia.