Gẹnẹsis 16 - Edo Bible (E Baibol Ẹdo) Version 1996

Hega Ke Ismẹl

¹ E Serai ne amwẹ Ebram ma biẹ nẹẹn. Sokpan rẹn kegha mwẹ ovbi Igipt nokhuo ọkpa ne a tiẹre Hega vbe ọviẹn,

² Serai keghi tama Ebram wẹẹ, “Ghe nian, Nọyaẹnmwa ma rhie ọmọ mẹ biẹ. Vbọzẹ ne u ma na tie ọviẹn mwẹ ovbe yi? U ghaghe ọ ghi biẹ mẹ.”

³ Ẹre Serai ghi na rhie Hega ne ọviẹn ọnrẹn ne ovbi Igipt ne Ebram rhie rọnmwẹ (Emwi na sunu iyeke vbe Ebram gbe ukpo igbe nẹ, vbe Kenan).

⁴ Ugbẹn vbe Ebram ghi tie Hega ovbe nẹ, ọ kegha hanmwa. Ugbẹn vbe irẹn ghi miẹn wẹ rẹn hanmwa, ọ keghi suẹn gha hio, ọ na gha zan Serai.

⁵ Serai keghi tama Ebram wẹẹ, “Wẹ ọ siẹe ne Hega na zan mwẹ na. Mẹ ọre ọ tobọ mwẹ rhie ọviẹn mwẹ nuẹn, ke ne ọ ghi ya miẹn we rẹn hanmwa gha dee, te ọ ghi zan mwẹ. E Nọyaẹnmwa ọre ọ ghi bu ase ne nọ rri ase vbe uwe ima!”

⁶ Ebram keghi wanniẹn wẹẹ, “Ọ wa maa nian, ọviọn ye nọ na, ototọ asẹ ruẹ ọre ọ ye, emwi ne ọ ghi khọn ruẹn yae ru.” Serai keghi rhunmwuda ọnii gha ru ẹe khọ, ọre Hega na lẹ kpao.

⁷ Odibosa e Nọyaẹnmwa keghi miẹn Hega vbe ọkpẹn ẹzẹ ne ọ rre ato vbe odẹ ne a la sẹ Siọ.

⁸ Ọ na kha wẹẹ, “Hega ne ọviẹn Serai, vbua rrie vbua ke dee?” Ọ keghi kha wẹẹ, “Te I lẹ kpa sẹ arowa mwẹ nokhuo rae.”

⁹ Rẹn keghi kha wẹẹ, “Dọlegbe bu ẹre gha khian ne u ya gha re ọviẹn ọnrẹn.”

¹⁰ Ọre ọ na kha wẹẹ, “I gha viọ uniẹn nibun sẹrriọ nuẹn wẹẹ, a i sẹtin ka iran.

¹¹ Ọmọ okpia u ra biẹ na, u gha he ẹnrẹn Ismẹl rhunmwuda Nọyaẹnmwa họn eve ọlọghọmwa ruẹn.

¹² Sokpan te ovbuẹ ra gha ru vbe ẹsin noha ọ ghi gha gu emwa hia khọn. Emwa hia ghi vbe gha gu irẹn khọn, rẹn i ra di ẹbu etiọnrẹn ya.”

¹³ E Hega keghi nọ egbe ẹre ọta wẹẹ, “Te imẹ gele bẹghe Nọyaẹnmwa I na ye gha rre agbọn ne I ya na iyẹn ra?” Ẹre ọ na ghi tie eni Nọyaẹnmwa ne ọ gu ẹe guan vbenian, “Osanobua ne ọ bẹghe.”

¹⁴ Ọnii ọ siẹe ne iran na tie uhae ne ọ rre ẹkpo Kadẹs vbe Bẹrẹd, “Uhae-ọmwa-nọrrọọ ne ọ bẹghe mwẹ?”

¹⁵ Hega keghi biẹ ọmọ okpia ne Ebram, rẹn keghi he ẹre Ismẹl.

¹⁶ Ukpo ehan yan iyenẹ ọre Ebram gha ye, vbe ẹghẹ na.