Gẹnẹsis 15 - Edo Bible (E Baibol Ẹdo) Version 1996

Ile Ne Osanobua Gu Ebram Ta

¹ Vbe iyeke ọnọna, Ebram keghi miẹn umian, ọ na họn vbe Nọyaẹnmwa guẹe guan wẹẹ, “Ghẹ mu ohan Ebram, Mẹ ọ re asa ne ọ gha degue ruẹ I gha ruẹ ẹse nọkpọlọ ẹsẹse.”

² Sokpan Ebram keghi kha wẹẹ, “Nọyaẹnmwa ne Udazi, I i mwẹ emọ, de esa ne ẹse ne u ra ru mẹ khin? Ọmwa ne I mwẹ ne ọ gha rri ukhu, ọrọre Eliezẹ ne ovbi e Damaskọs.

³ U ma viọ emọ mẹ, ọkpa vbe uwu avbe eviẹn mwẹ ọre ọ ra rri ukhu mwẹ!”

⁴ Ọ keghi vbe họn vbe Nọyaẹnmwa vbe dọlegbe guẹe guan wẹẹ: “Ọviẹn na i ra rri ukhu ruẹ ighẹ Eliezẹ, ovbuẹ nokpia vbe ẹko ọre ọ ra rri ukhu ruẹ.”

⁵ Nọyaẹnmwa keghi rhie ẹre ladian ore, ọ wẹẹ, “Tọn aro mu ghe iso ne u ka inu orhọnmwẹ ni rrọọ; a deghẹ u gha sẹtin, uniẹn ruẹn gha bun vberriọ zẹẹ.”

⁶ Ebram keghi ya ẹko e Nọyaẹnmwa rhiẹnrhiẹn ghe ẹre, rhunmwuda ọnii, e Nọyaẹnmwa keghi rhan obọ miẹn ẹnrẹn.

⁷ Ẹre Nọyaẹnmwa na tama rẹn wẹẹ, “Mẹ ọrọre Nọyaẹnmwa ne ọ we ne u kpao vbe Babilonia rre, ne a miẹn ehe na mu otọe na nuẹn zẹ vbe ọwuẹ.”

⁸ Sokpan Ebram wanniẹn wẹẹ, “Nọyaẹnmwẹ ne Udazi, vbia gha ya rẹn hẹ wẹ ọghomwẹ nọ?”

⁹ Rẹn keghi wanniẹn wẹẹ, “Mu ovbi ẹmila ne sọguọsọguọ ọghe ikpira gunmwẹ, ẹwe ikpira, ogho ikpiara, idu kevbe elikhukhu.”

¹⁰ Ebram keghi viọ avbe aranmwẹ na hia gie Osanobua, ọ keghi giagia iran ye ihe eveva, ọ keghi viọ avbe ukhiọnmwẹ nii aro da egbe vbe uniẹn eva; sokpan ọ ma giagia avbe ahianmwẹ.

¹¹ Avbe ugu kegha gho rri ehe ne avbe aranmwẹ na ye sokpan rẹn kegha ya iran kua.

¹² Ugbẹn vbe owẹn ghi ra defua, ovbe nọkhua keghi rhie Ebram, ohan nọkhua na gha muẹn.

¹³ Nọyaẹnmwa keghi tama rẹn wẹẹ, “Uniẹn ruẹn gha khian ọrriọvbe vbe ẹvbo ẹrrẹ, iran gha khian eviẹn vbe evba, a ghi vbe ye ukpo uri eva sẹ iran usẹ.

¹⁴ Sokpan mẹ gha rri ẹvbo ne ọ ru iran emwi na oya, iran ghi miẹn iran emwi ẹfe ne ọ kpọlọ vbe iran a khian kpao vbe ọfumwegbe.

¹⁵ A gha re rue vbe u gha ghi tọ sẹ nẹ ẹsẹse.

¹⁶ Ọ gha sẹ orre enẹ, uniẹn ruẹn ke dọlegbe gha die emwa; rhunmwuda mẹ I ra khulo emwa Amọri ladian, a te do miẹn wẹẹ, iran ru emwi dan ne ọ na kei ne a rri iran oya.”

¹⁷ Ovẹn ghi dero nẹ vbe ebiebi ghi so, vbe udomwurri, akhe erhẹn ne ọ gbe ighogho kevbe ukpekhọe ne ọ baa keghi rre do la adesẹneva avbe aranmwẹ nii gberra.

¹⁸ Ẹdẹ nẹdẹrriọ, Nọyaẹnmwa keghi gu Ebram ta ile wẹẹ, “I yanrẹn ighẹ I gha mu otọ na hia ne uniẹn ruẹn, ke ẹzẹ ne ọ rre ehe ne Igipt lae ya sẹ Yufretes ne okpẹzẹ.

¹⁹ Deba otọe avbe Ken, Keniz, Kadomi,

²⁰ emwa Hiti, Pẹriz, Refeim,

²¹ emwa Amọri, Kenan, Gigasi kevbe Jebus.”