Gẹnẹsis 13 - Edo Bible (E Baibol Ẹdo) Version 1996

Ebram Vbe Lọt Wannọ Egbe

¹ Ebram keghi la odẹ okuọ lahin Igipt rre gha rrie otọ odẹ ekẹn Kenan, ke irẹn kevbe amwẹ ọnrẹn, kevbe emwi ne irẹn mwẹ hia. Lọt kevbe lelẹe.

² Ebram kegha re ọmwa ne ọ fe ne ọ mwẹ ohuan, ẹwe kevbe ẹmila deba igoru kevbe esiliva.

³ Rẹn keghi si ke agọ la agọ kevbe ihe ọkpa la ọvbehe gha rrie odẹ Bẹtẹl vbe ehe ne ọ ka bu agọ yi ẹghẹ ọkpa vbe ẹkpo Bẹtẹl kevbe Ai.

⁴ Ọ kegha rrie eke ne ọ ka gbe aka yi, ọ keghi ya ga e Nọyaẹnmwa vbe evba.

⁵ E Lọt ne ọ lelẹe kevbe gha mwẹ ohuan, ẹwe, ẹmila kẹe kevbe ẹgbẹe ọre kevbe eguọmwadia ẹre.

⁶ Ehe ne avbe emwirri na rria ma sẹ ne iran gba gha rre ihọkpa, rhunmwuda emwirri ne iran eveva mwẹ bun gbe.

⁷ Rhunmwuda ọnii, okhọn kegha rre ẹkpo emwa ni gbearoghe emwirri ọghe Ebram kevbe emwa ni gbearoghe ọghe Lọt, (Ẹghẹ ne a kha na, emwa Kenan kevbe emwa Pẹriz he ye rre otọe na).

⁸ Ẹre Ebram na khama Lọt wẹẹ, “Etẹn ma khin, ọ ma kei ne emwa mwẹ kevbe emwa ruẹn gba gha gui.

⁹ Gie ima wannegbe. Lahọ zẹ obọ ne ọ yẹ ruẹ sẹ vbe otọe na ne u sẹ mwẹ rae, wẹ ghi laghe obọ ọkpa ne imẹ laghe obọ nọkpa.”

¹⁰ Lọt keghi tọn aro mu ọ na miẹn wẹ, iya ọghe ẹzẹ Jọdan hia wa ya sẹ Zoa, amẹ wa rrọọ ẹsẹse zẹ vbe ogba ọghe Nọyaẹnmwa, kevbe sẹ vbe otọe Igipt! (Ẹghẹ na, Nọyaẹnmwa ma he fuẹn otọ Sọdom kevbe Gomorra).

¹¹ Lọt keghi zẹ otọe iya ọghe Jọdan hia ne egbe ẹre, ọ keghi si kpao laghe odẹ ọlarre owẹn. Erriọ iran eveva ya wannọ egbe.

¹² Ebram keghi di Kenan ya, Lọt keghi gbe ẹkun sotọ yin avbe ẹvbo ni rre iya nii, ọ na bu agọ ye ọkpẹn Sọdom,

¹³ ne emwa rẹn re emwa dan ni vbe ru orukhọ ghe Nọyaẹnmwa.

Ebram Si Gha Rrie Hibrọn

¹⁴ Ugbẹn vbe Lọt ghi kpao nẹ, e Nọyaẹnmwa keghi tama Ebram wẹẹ, “Wa hẹko ke ehe ne u ye nii ghe lẹga egbe.

¹⁵ I gha mu otọe ne u bẹghe hia ne uwẹ vbe uniẹn ruẹn, ọ ghi vbe gha re ọwuẹ ẹdẹdẹmwẹdẹ.

¹⁶ I gha viọ uniẹn nibun nuẹn, iran gha bun sẹrriọ wẹ a i miẹn ọmwa ne ọ gha sẹtin ka iran zẹ vbe ne a i miẹn ọmwa ne ọ gha sẹtin ka ikpẹ ekhae ne otọ!

¹⁷ Wanwanna nian, mu egbe ne u khian la otọe nii ga a, rhunmwuda, te I ra mu ehia nuẹn.”

¹⁸ Rhunmwuda ọnii, Ebram na si agọ ẹre, ọ keghi ya bu ẹre ye ọkpẹn erhan iruẹmwi ọghe Mamrẹ vbe Hibrọn, ọ ke gba aka ne Nọyaẹnmwa vbe evba.