Gẹnẹsis 11 - Edo Bible (E Baibol Ẹdo) Version 1996

Ogogoro Ọghe Babilọn

¹ Vbe ẹghẹ okaro, emwa ni rre otọ agbọn na hia, ẹvbo ọkpa iran zẹ, urhu ọkpa iran vbe ya guan.

² Ugbẹn vbe iran ghi si laghe odẹ ọlarre ovẹn, iran keghi do sẹ ehe ne ọ rriẹe ọkpa vbe otọ Babilọn, iran keghi yakọ vbe evba, iran na yin ẹnrẹn.

³ Ẹghẹ nii ọre iran na tama egbe wẹẹ, “Wa larre! wa gie ima do mannọ ibiriki ne a ye erhẹn kaa ẹre.” Iran keghi mannọ ibiriki ne iran gha ya bọ owa, kevbe ọdan ne iran gha ya sikan ẹn mu egbe.

⁴ Ẹghẹ nii, iran ghi na kha wẹẹ, “Wa gie ima do bọ owa ima, ne ogogoro ne Ọ rrọ wa yo sẹ iso, ma ghi ru ọkhae ne egbe mwa, ne a ghe ya tagha ima lele otọ agbọn hia.”

⁵ E Nọyaẹnmwa keghi tuorre do ghe nene ẹvbo kevbe ogogoro ne emwa nii bọe,

⁶ Ọna wẹẹ, “Eban nian, iran na hia, ọkpa iran khin, ẹvbo ọkpa iran zẹ. Te iran he da suẹn emwi ne iran gha ru na ẹi ghi rre nian, emwi ne iran wẹ, iran gha ru, iran ghi gele sẹtin ruẹe.

⁷ Wa gie ima tuorre gha khian ne a ya gua ẹvbo ne iran zẹ ne iran ghẹ ghi gha họn ẹvbo egbe.”

⁸ Ẹre Nọyaẹnmwa na zagha iran gba uhunmwu otọ agbọn hia. Iran na ghi dobọ ẹvbo ne iran te bọ yi.

⁹ A keghi gha tie ẹvbo nii Babilọn, rhunmwuda, evba nii ọre Nọyaẹnmwa na gua ẹvbo ne iran ne emwa nii hia te zẹ, evba ọre ọ keghi zagha iran gba otọ agbọn hia.

Uniẹn Ọghe Siẹm

¹⁰ Ivbi uniẹn Siẹm ọre ena khin, ọ ghi rre ikpira ne a miẹn uromwẹ amẹ, vbe Siẹm rre ukpo iyisẹn (100), ọ keghi biẹ ọmọ okpia ọkpa ne a tie ẹre Apaksiad.

¹¹ Vbe iyekọnii, ọ keghi ye ya ukpo iyisẹn vbe ihe isẹn, ọ na vbe biẹlẹ emọ ọvbehe.

¹² Apaksiad ghi rre ukpo isẹn yan ọgban, ọ keghi biẹ ọmọ okpia ọkpa ne a tie ẹre Siẹla,

¹³ iyeke ọnii, ọ keghi ye ya ukpo eha yan urieva (403) vbe agbọn, ọ na ye vbe biẹlẹ emọ ọvbehe.

¹⁴ Siẹla ghi rre ọmọ ukpo ọgban, ọ keghi biẹ ọmọ okpia ọkpa ne a tie ẹre Ebẹl.

¹⁵ Vbe iyeke ọnii, ọ keghi ye vbe gbe ukpo eha yan uri eva (403) vbe agbọn, ọ na vbe biẹlẹ emọ ọvbehe.

¹⁶ Ebẹl ghi rre ukpo enẹyan ọgban, ọ keghi biẹ ọmọ okpia ọkpa ne a tie ẹre Pẹlẹg.

¹⁷ Vbe iyeke ọnii, ọ keghi gbe ukpo ọgban yan uri eva (430) vbe agbọn, ọ na vbe biẹlẹ emọ ọvbehe.

¹⁸ Ugbẹn vbe Pẹlẹg ghi rre ukpo ọgban, ọ keghi biẹ ọmọ okpia ọkpa ne a tie ẹre Rẹu.

¹⁹ Vbe iyeke ọnii, ọ keghi gbe ukpo ihinrin yan uri (209) vbe agbọn, ọ na ye biẹlẹ emọ ọvbehe.

²⁰ Ugbẹn vbe Rẹu ghi rre ukpo evayanọgban, ọ keghi biẹ ọmọ okpia ọkpa ne a tie ẹre Serug,

²¹ vbe iyeke ọnii, ọ keghi gbe ukpo ihinrọn yan uri (207) vbe agbọn, ọ na ye biẹlẹ emọ ọvbehe.

²² Ugbẹn vbe Serug ghi rre ukpo ọgban, ọ keghi biẹ ọmọ okpia ọkpa ne a tie ẹre Nahọ,

²³ vbe iyeke ọnii, ọ keghi gbe ukpo uri (200) vbe agbọn, ọ na ye biẹlẹ emọ ọvbehe.

²⁴ Ugbẹn vbe Nahọ ghi rre ukpo ọkpairrọvbọgban, ọ keghi biẹ ọmọ okpia ọkpa ne a tie ẹre Tẹra.

²⁵ Vbe iyeke ọnii, ọ keghi gbe ukpo ọkpairrọvbe iyehan (119) vbe agbọn, ọ na ye biẹlẹ emọ ọvbehe.

²⁶ Ugbẹn vbe Tẹra ghi rre ukpo ekigbesiyenẹ, ọ keghi biẹlẹ Ebram, Nahọ kevbe Haran.

Ivbi e Tẹra

²⁷ Ena ọrọre uniẹn Tẹra, ne ọ biẹlẹ Ebram, Nahọ kevbe Haran. Haran ọre ọ biẹ Lọt,

²⁸ Haran keghi wu vbe ẹvbo ẹre ighẹ Ọọ, vbe Babilonia vbe erhae he ye rre agbọn.

²⁹ Ebram keghi rhie Serai, Nahọ na rhie Milka ne ovbi e Haran nokhuo ne ọ gha re erha Iska.

³⁰ Serai ma gha mwẹ emọ, rhunmwuda ọ ma biẹ.

³¹ Tẹra keghi rhie ovbi ẹre ighẹ Ebram, eyẹ ọre ighẹ Lọt ne ọ gha re ovbi e Haran, kevbe Serai ne amwẹ ovbi ẹre, amwẹ Ebram, ọ keghi viọ iran baegbe kpao vbe ẹvbo Ọọ ne ọ rre Babilonia rre, ne ọ gha rrie otọ Kenan. Iran khian sẹ Haran, ehe ne iran na mudia yin ẹnrẹn.

³² Tẹra keghi wu vbe evba vbe ọ rre ọmọ ukpo isẹn yan uri (205).