Gẹnẹsis 1 - Edo Bible (E Baibol Ẹdo) Version 1996

Okha Uyimwẹ

¹ Vbe omuhẹn, vbe Osanobua yi agbọn kevbe emwi hia ni rre iso.

² Agbọn ma zẹdẹ gha mwẹ ona, emwi i vbe rrọ, ebiebi keghi so gba avbe okun nekhua ni hu yo hu rre vbọ. Ẹtin Osanobua kegha lọyan yo lọyan rre vbe uhunmwu amẹ.

³ Osanobua keghi kha wẹẹ, “Gie uwanmwẹ gha rrọọ,” uwanmwẹ keghi gele ladian.

⁴ Emwi ne Osanobua dẹghe keghi sẹ ọre ọyẹnmwẹ. Rẹn keghi wannọ uwanmwẹ hin ebiebi rre.

⁵ Rẹn keghi tie uwanmwẹ “Avan” kevbe ebiebi “Asọn.” Ẹdẹ keghi mu ẹdẹ keghi gbe ọnii kegha re ikpẹdẹ nokaro.

^6-7 Osanobua keghi kha wẹẹ, “Gie ideghedeghe gha rrọọ, ne ọ wannọ amẹ, ne ọ miẹn ehe na gha rre ihe ughughan eva.” Ọ kegha ye rriọ. Erriọ ọre Osanobua na ru ideghedeghe ne ọ wannọ amẹ ne ọ rre ototọ ẹre hin amẹ ne ọ rre odukhunmwu ẹnrẹn rre.

⁸ Ọ keghi tie ideghedeghe nii “Iso” Ẹdẹ keghi mu ẹdẹ keghi gbe, ọnii na gha re ikpẹdẹ ne ogieva.

⁹ Osanobua keghi kha wẹẹ, “Gie amẹ ni rre ototọ iso si koko ye ihọkpa ne otọe miẹn ehe na ladian.” Ọ keghi gha ye rriọ.

¹⁰ Rẹn keghi tie otọe nii “Agbọn” ọ keghi tie amẹ ne a si koko nii “Okun.” Emwi ne Osanobua bẹghe keghi sẹ ọre ọyẹnmwẹ.

¹¹ Rẹn keghi kha wẹẹ, “Gie erhan vbe irunmwu hia zọ vbe otọe, ke ni gbe ihiagha kevbe eni mọ,” ọ kegha ye rriọ.

¹² Emwi hia keghi zọ ke otọe rre. Emwi ne Osanobua bẹghe, keghi sẹ ọre ọyẹnmwẹ.

¹³ Ẹdẹ keghi mu, ẹdẹ keghi gbe, ọnii na gha re ikpẹdẹ ne ogieha.

¹⁴ Osanobua keghi kha wẹẹ, “Gie uwanmwẹ gha rre iso, ne ọ wannọ avan hin asọn rre, kevbe ne ọ rhiema, ẹghẹ ne ikpẹdẹ kevbe ukpo, kevbe ẹghẹ emwiukpo ya suẹn;

¹⁵ iran ghi gha baa vbe iso, ne iran gha rhie uwanmwẹ ye agbọn” ọ kegha ye rriọ.

¹⁶ Ẹre Osanobua na yi uwanmwẹ nekhua eveva, ne owẹn gha kha yan avan, ne uki vbe gha kha yan asọn; ọ keghi yi avbe orhọnmwẹ ba ẹre.

¹⁷ Rẹn keghi viọ nene avbe uwanmwẹ ye iso ne iran gha wan mu otọe.

¹⁸ Ne iran gha kha yan avan kevbe asọn kevbe ne iran wannọ uwanmwẹ hin ebiebi rre. Emwi ne Osanobua bẹghe keghi sẹ ọre ọyẹnmwẹ.

¹⁹ Ẹdẹ keghi mu, ẹdẹ keghi gbe, ọnii na gha re ikpẹdẹ ne ogienẹ.

²⁰ Osanobua keghi kha wẹẹ, “Gie amẹ vuọn ne emwi ni hiọnrọn ughughan nibun, kevbe ne ahianmwẹ vbe vuọn iso”.

²¹ Ẹre Osanobua na do yi avbe ugbogiorinmwi ni rre okun ke avbe emwi ni ma wu ughughan ni rre amẹ kevbe ahianmwẹ ughughan hia. Emwi ne Osanobua bẹghe keghi sẹ ọre ọyẹnmwẹ.

²² Rẹn keghi fiangbe iran hia, rẹn keghi tama emwi ni rre uwe amẹ ne iran gha muan yọ ne iran vuọn okun. Ọ tama avbe ahianmwẹ ne iran vbe gha muan yọ.

²³ Ẹdẹ keghi mu, ẹdẹ keghi gbe, ọnii na gha rre ikpẹdẹ ne ogisẹn.

²⁴ Osanobua na kha wẹẹ, “Gie emwi irri ughughan gha rre otọe, kevbe aranmwẹ oha ughughan nekhua kevbe negiẹrẹ”. Ọ kegha ye rriọ.

²⁵ Ẹre Osanobua na yi avbe emwi hia, emwi ne irẹn bẹghe keghi sẹ ọre ọyẹnmwẹ.

²⁶ Osanobua keghi kha wẹẹ, “Banbanna nian, ma gha do ma emwa na agbọn, iran gha ye vbe ima, iran ghi khọ mwa. Iran gha mwẹ ẹtin vbe uhunmwu avbe ehẹn, ke avbe ahianmwẹ, avbe emwi irri kevbe avbe aranmwẹ oha nekhua kevbe negiẹrẹ.”

²⁷ Ẹre Osanobua na ma emwa nagbọn, ọ na ma iran ne iran ye vbe irẹn tobọ irẹn. Ọ keghi yi iran okpia kevbe okhuo.

²⁸ Ọ keghi fiangbe iran vbenian wẹẹ, “Wa ghi biẹlẹ emọ nibun vbe ne a gha na miẹn wẹ uniẹn ruan ghi gba ehe hia vbe agbọn, iran ghi gha khaemwisẹ ya rẹn. I rhie ẹtin nuẹn ya gha kha yan avbe ehẹn, avbe ahianmwẹ kevbe avbe aranmwẹ oha hia.

²⁹ I rhie avbe ikpẹ ọmọ erhan kevbe avbe ọmọ erhan hia nuẹn ne u gha re.

³⁰ Sokpan ebe vbe irunmwu ọre I viọ ne avbe aranmwẹ oha nekhua kevbe negiẹrẹ kevbe avbe ahianmwẹ ne iran gha re.” Ọ kegha ye rriọ.

³¹ Osanobua keghi ghe emwi hia ne irẹn yi, ẹko ke sẹ ọre ọyẹnmwẹ ẹsẹse. Ẹdẹ ghi gbe ẹdẹ keghi mu, ọnii na gha re ikpẹdẹ ne ogiehan.