Galatia 3 - Edo Bible (E Baibol Ẹdo) Version 1996

Uhi Ra Iyayi

¹ Wa ne emwa Galatia ne akpa. Gha ọ ruan uwa yi? Vbe odaro uwa zẹ, wa miẹn vbene a wa gie ẹre hẹ ighẹ uwu ne Jesu Kristi wu vbe uhunmwu ugbugbe!

² Emwi ọkpa ọre I mobọ ho ne uwa tama mwẹ. A ru vbene nene Uhi kha re, ọre Orhiọn Kristi ya sẹ uwa obọ ra, ra vbe ekpa ne uwa na họn, wa na vbe ya iyẹn ne ọ maa yi nọ?

³ Vbe uwa na kọn sẹrriọ hẹ yi? Orhiọn Osanobua ọre uwa ya suẹn ẹtin uwa ọre uwa ghi ho ne uwa ya ru ẹe fo na?

⁴ Emwi ne aro uwa miẹn i zẹdẹ mwẹ esa ne ọ ye hiehiere. Vbe ẹmwata, ọ wa mwẹ esa ne ọ ye.

⁵ Ẹghẹ ne Osanobua na rhie nene Orhiọn ne uwa, ne ọ na vbe winna iwinna ọyunnuan vbe ehe ne uwa ye, te ọ ru ẹe ra rhunmwuda ighẹ uwa ru vbene nene Uhi kha re, ra rhunmwuda ighẹ wa họn nene iyẹn ne ọ maa wa na vbe yae yi?

⁶ Te ọ ye vbe ẹmwẹ ne ebe tae vbe ekpa Ebraham: “Rẹn ya Osanobua yi, rhunmwuda iyayi ẹre, Osanobua keghi rhan obọ miẹn rẹn zẹ vbe ọmwata.”

⁷ Ọ kere ne uwa rẹn nian khekherriọ wẹ iran ni mwẹ iyayi ọrọre ivbi Ebraham ọghe ẹmwata.

⁸ Ebe miẹn ọẹn ye otọ nẹ wẹ, iyayi ọre Osanobua ra ya dọlọ iran ne ẹ i re Ju kugbe ba egbe ẹre. Ọnii ọ si ẹe ne ebe na ka kpe orhu Iyẹn Ne ọ maa ni ma Ebraham ye otọ wẹ, “Ekpa ruẹ ọre Osanobua ra na fiangbe emwa hia ni rre agbọn.”

⁹ Ebraham yayi, a keghi fiangbe ẹe, rhunmwuda ọnii, emwa hia ni yayi, a vbe fiangbe iran vbe ne a fiangbe irẹn.

¹⁰ Iran ni ya egbe yan ne a gha ru vbene nene Uhi kha re, te a fi iran unu. Rhunmwuda, ebe kha re wẹẹ, “Ọmwaikọmwa ne ọ ma gha ye emwi hia ne a gbẹnnẹ ye nene ebe Uhi ru emwi vbe ẹghẹ hia, te Osanobua fi ẹre unu.”

¹¹ Agbọn hia rẹnrẹn ighẹ, a i sẹtin la ekpa nene Uhi ye ọmwa khian ọmwata vbe odaro Osanobua, rhunmwuda ebe kha re wẹ, “Ọmwa ne a la ekpa iyayi ya khian ne ọ mudia ẹse vbe odaro Osanobua, ọ gha fe.”

¹² Sokpan ẹ i re iyayi ọre nene Uhi ye egbe yan. Sokpan, zẹ vbene ebe kha re, “ọmwaikọmwa ne ọ ru zẹ vbe emwi hia ne nene Uhi kha re, ọ gha vbe la ekpa ẹre fe.”

¹³ Sokpan, rhunmwuda ne Kristi na rhunmwuda mwa khian ne a fi ẹre unu, ọ keghi fannọ ima kua vbe obọ ifi unu ne ọ ke obọ nene Uhi rre. Zẹ vbene ebe kha re, “Ọmwaikọmwa ne a sirrọ ye uhunmwu erhan, khian ne a fi ẹre unu.”

¹⁴ Kristi ru vberriọ, ne a miẹn ehe na rhie afiangbe ne Osanobua ve Ebraham re ne iran ne ẹ i re Ju vbe ekpa Jesu Kristi, ne Orhiọn ne Osanobua ve miẹn ehe na la ekpa iyayi sẹ ima obọ.

Nene Uhi Kevbe Emwi Ne A Ve

¹⁵ Etẹn, I ra ya emwi na miẹn ẹdẹgbegbe ru igiemwi ma uwa. Arhin eva gha gba mwamwa emwi ọkpa, iran na gba rhie obọ ye ebe nẹ, ọmwa ne ọ gha sẹtin khiẹn ruan ra ne ọ rhie te ẹe, ẹ i rrọọ.

¹⁶ Banbanna nian, Ebraham kevbe ovbi ẹre, ọre Osanobua ve ẹre emwi na, ọ ma kha wẹ, “Kevbe ivbi ẹre” ọnii nọ wẹ emwa ni bun. Emwi ne ọ kha re ọrọre, “Kevbe ne ovbuẹ” ọnii nọ wẹ, ne orhiọnkpa kẹkan ne ọ re Kristi.

¹⁷ Emwi ne I kha ọre ọna khin: Osanobua ta ile, ọ keghi vbe yan ighẹ rẹn gha muẹn sẹ. Nene Uhi ne ọ do rre vbe ukpo ọgban ọya yan uri eva (430) gberra nẹ, ẹ i sẹtin rhie obọ rra ile ni ne ọ vbe khiẹn ẹnrẹn uan ighẹ emwi ne Osanobua ve.

¹⁸ A deghẹ, ekpa nene Uhi ọre Osanobua gu rhie emwi ne ọmwa, ẹghẹ nii, ẹ i ghi re rhunmwuda emwi ne ọ ve. Vbene ọ rhirhi gha ye hẹ, Osanobua rhie ẹre ne Ebraham rhunmwuda ighẹ te ọ ve ẹe ẹre re.

¹⁹ Vbe a ghi gu rhie nene uhi ne ọmwa yi kehkehrriọ? Te a rhie ẹre te ẹe ne a miẹn ehe na gha rẹn emwi ne abaku ru, te a wẹ ne ọ vbe gha rrọọ ovbi Ebraham te do rre, ọmwa ne a ve ẹre nene emwi. Avbe odibosa ore ọ rhie nene Uhi rre, vbe ne ọmwa kẹkan na gha re ne ọ rre ẹkpo iran.

²⁰ Sokpan, ọ gha re arhiọnkpa kẹkan nọ, a i vbe gualọ ọmwa ne ọ rre ẹkpo iran, ọkpa ọre Osanobua khin.

Emwi Ne Arhunmwuda Ẹre Yi Nene Uhi

²¹ Te ọnii ghi rhie maa ra ighẹ nene Uhi gbe odan ye emwi ne Osanobua ve? Hiehiere. Rhunmwuda, akpawẹ Uhi ne a yi, ne ọ sẹtin rhie arrọọ ne ọmwa rrọọ, ẹghẹ nii, te a gha sẹtin la ekpa uhi gha ye ọmwa khian ne ọ mudia ẹse vbe odaro Osanobua.

²² Sokpan ebe tae nẹ wẹ, obọ orukhọ gba agbọn na hia nẹ, ne iran hia ni yayi miẹn ehe na miẹn rhie vbe emwi ne a la ekpa iyayi Jesu Kristi ve.

²³ Sokpan vbe iyayi te do rre, nene Uhi keghi munọ ima hia gba nẹ zẹ vbe oleghan, rhinrin a te do rhie nene iyayi ladian ne a miẹn.

²⁴ Ọnii nọ wẹ, nene Uhi ọre a viọ ima na ne ọ gha ma ima emwi vbe Kristi te do rre, ne a miẹn ehe na la ekpa iyayi ye ima khian emwa ni mudia ẹse vbe odaro Osanobua.

²⁵ Banbanna nian, vbe ne ọ ghi na sẹ ẹghẹ iyayi nẹ, ne ọma emwa emwi i ghi re arowa ima ọvbehe.

²⁶ Rhunmwuda, vbe ekpa iyayi, ọre uwa hia na re ivbi Osanobua, vbe uwu a ya egbe ba Kristi Jesu.

²⁷ Rhunmwuda, te a sa amẹ ne uwa ye uwu a kugbe be Kristi, rhunmwuda ọnii, te uwa ghi vbe mu akpa emwi ne ọ maa hia ọghe Kristi yọ.

²⁸ Rhunmwuda ọnii, alughaẹn ne egbe i rrọọ vbe ẹkpo avbe Ju kevbe avbe iran ne ẹ i re Ju, eviẹn kevbe ne ẹ i re eviẹn, ikpia ra ikhuo, ọkpa wa hia khin vbe uwu a ya egbe ba Kristi Jesu.

²⁹ Deghẹ wa re ọghe Kristi, ẹkpo nii, wa ghi vbe gha re ivbi Ebraham, emwi ne Osanobua ve gha vbe sẹ uwa obọ.