Filipai 4 - Edo Bible (E Baibol Ẹdo) Version 1996

Ibude

¹ Rhunmwuda ọnii nian, wa ne etẹn mwẹ, etẹn mwẹ ni ghan mẹ ẹsẹse, ẹmwẹ uwa wa da mwẹ, wa keghi ka ye ẹko mwẹ rhiẹnrhiẹn ẹsẹse, te imẹ ghi ye uwa ghan nian, etẹn mwẹ nighan, erriọ zẹẹ ọre ọ kere ne uwa mudia gbain vbe ẹdẹ agbọn uwa vbe uwu Nọyaẹnmwa.

² Yuodia kevbe Sintike, wa lahọ, I rinmwian uwa ne uwa dọlọ kugbe zẹ vbe etẹn ne ikhuo vbe uwu Nọyaẹnmwa.

³ Kevbe uwẹ, ogieva mwẹ ne ekhọe esi ne ima gba winna kugbe, lahọ ru iyobọ ne avbe ikhuo na, rhunmwuda, iran mobọ kakabọ gun mwẹ winna vbe uwu ne a na kpe orhu iyẹn ne ọ maa, kevbe Klẹmẹnt kevbe avbe iho mwa nekpa ne ima gba winna, eni emwa ne a gbẹnnẹ ye uwu ebe ẹfe ọghe Osanobua nẹ.

⁴ Wa gha ghọghọ vbe uwu Nọyaẹnmwa, I vbe dọlọ ta ẹe, wa gha ghọghọ.

⁵ Gha yin uyinmwẹ ọmẹhẹ da emwa hia, Nọyaẹnmwa dee ẹgiẹgiẹ.

⁶ Ghẹ si osi ye emwi rhọkpa, sokpan gha ya erhunmwu ne a na, nọ emwi ne u ho hia vbe obọ Osanobua, u ghi gha ye ekhọe ọkpọnmwẹ ẹse nọ rẹn vbe ẹghẹ hia.

⁷ Te ọfumwegbe Osanobua, ne ọ gberra ne ọmwa ne agbọn gha sẹtin rẹn otọ ẹre gha rhie ekhọe kevbe orhiọn uwa mwẹ, vbe ne a i na mwẹ ẹbe vbe uwu Kristi Jesu.

⁸ Vbe ufomwẹ ehia, etẹn mwẹ, wa gha ya avbe emwi ni maa kevbe ne ọ gie a ta ẹmwẹ ọnrẹn ẹse vuọn ekhọe uwa, avbe emwi ẹmwata, adazẹ ne ọ gbae ne ẹ i mwẹ iruẹn kevbe ne ọ mwẹ uyi.

⁹ Wa gha ya avbe emwi ne uwa ruẹ re kevbe ne uwa miẹn vbe obọ mwẹ ru emwi, kevbe uwu emwi ne I ru, kevbe ẹmwẹ ne I guan. Osanobua ne ọ rhie ọfumwegbe ne ima, gha gu uwa gha rrọọ.

Wa Ruẹse

¹⁰ U miẹn vbe ọyẹnmwẹ sẹ mwẹ hẹ ye ẹdẹ agbọn mwẹ vbe uwu Nọyaẹnmwa Iyeke vbe ọ ghi kpẹe fua nẹ, wa kevbe miẹn ẹkpo otọ ya dọlegbe rhie maa ighẹ, uwa mu ẹmwẹ mwẹ roro. I ma kha ighẹ wa te yan mwẹ fua nẹ o, te uwa ma miẹn ẹkpo otọ ya ru ẹe.

¹¹ Wanwanna nian, ẹ i re te I ta ẹmwẹ na rhunmwuda ighẹ te I ghi ye vbe ọmwa ne a yangbe, rhunmwuda I ruẹ ọre guẹ nẹ wẹ, ne emwi ne I rhirhi a gha mwẹ sẹ mwẹ ọkẹn.

¹² I rẹn emwi ne a ye a rre ivbabọ kha, kevbe ne a vbe gha mwẹ emwi ọkpọkua. Te I ruẹ emwi na guẹ, wẹ ehe ne ọ rhirhi gha khin, vbe ẹghẹ ne ọ rhirhi gha khin, emwi ghi sẹ mwẹ ọkẹn. Deghẹ te ohanmwẹ gbe mwẹ ra te ẹko vuọn mwẹ, deghẹ te I mwẹ emwi vbe ne ọ bun gbe, ra vbe ne ọ ma sẹ.

¹³ I mwẹ ẹtin ne I ya ye egbe miẹn emwi hia vbe ekpa ẹtin ne Kristi rhie mẹ.

¹⁴ Sokpan emwi esiesi ọre uwa ru, ne uwa na rro mwẹ rre vbe ẹghẹ ọlọghọmwa.

¹⁵ Wa ne emwa Filipai tobọ uwa rẹnrẹn ẹsẹse wẹ, ẹghẹ ne I na kpao vbe Masidonia rre, vbe ẹghẹ ne a na wa da suẹn gha kpe orhu Iyẹn Ne ọ maa, wa ọkpa ọrọre esọsi ne ọ yọ mwẹ obọ, wa ọkpa ọre ọ gun mwẹ ghae vbe ere ne I re kevbe emwi ne ọ wi mwẹ.

¹⁶ Ọ gberra uhukpa ne a miẹn wẹ, ẹghẹ, ne I na i mwẹ iyobọ vbe Tẹsalonaika, wa keghi gie ne a rhie gun mwẹ.

¹⁷ Ẹ i re wẹ emwi ọhẹ ọre ọ gha khọn mwẹ ne a miẹn, sokpan, I kegha ho ne a rhie ere ne a re ba igho ne aroro ye otọ ne uwa.

¹⁸ Rhunmwuda ọnii, wa ghe ebe ọ sẹ mwẹ obọ ọghe emwi hia ne uwa he hẹ gun mwẹ, ọ wa vbe sẹ kpọ kua. Emwi ne uwa viọ ne Epafroditọs viọ gu mwẹ, sẹ mwẹ obọ nẹ nian, emwi ne I ho hia gbae. Te ena ye vbe emwi izọ ese ne ọ winhin ne a ya mu ohan gie Osanobua, emwi ne ọ yẹ ọre, ne ọ gha vbe rhan obọ miẹn.

¹⁹ Debare, Osanobua mwẹ ne ẹfe ẹre kpọkua vbe uwu Kristi Jesu, gha kpe emehe emwi ne uwa i mwẹ hia.

²⁰ Osanobua mwa kevbe Erha mwa ọre uyi gha rrọọ na ẹdẹ kevbe ẹdẹdẹmwẹdẹ. Isẹ.

Otuẹ Okiekie

²¹ Wa wẹ emwa Osanobua hia ni re ọghe Kristi Jesu do. Etẹn ni gun mwẹ rre edinran wẹ uwa do.

²² Emwa Osanobua ni rre edinran hia wẹ uwa do, kpataki iran ni rre ẹguae e Nọgbaisi.

²³ Te ẹsọhẹ ọ ghe Nọyaẹnmwa Jesu Kristi gha gu uwa hia gha rrọọ.