Filipai 3 - Edo Bible (E Baibol Ẹdo) Version 1996

Uyinmwẹ Ne Ọ Gbae Ọghe Ẹmwata

¹ Vbe ufomwẹ ehia, etẹn mwẹ, te Nọyaẹnmwa gha ye ọyẹnmwẹ nọ gbae sẹ uwa. Ẹ i ru mwẹ ẹsọn a deghẹ I vbe dọlegbe ta ẹmwẹ ne I ka ta yi, te a dọlegbe ya eẹ rhie uwa uhunmwu hin ẹbe rre.

² Wa gha ba iran ni ru emwi dan nii, avbe ekita nii, emwa ni mu yan rẹn wẹ te iran ra gha giagia egbe iran.

³ Rhunmwuda, mẹ nọ, ẹ i re iran ọ re a rhie arhuẹ ẹmwata na, rhunmwuda, Orhiọn ọre ima ya ga Osanobua, ma ghi vbe gha ghọghọ ye agbọn ne ima ye vbe uwu Kristi Jesu. Ma i mu ẹtin yan emwi iruemwi ọghe ore egbe.

⁴ Adeghẹ erriọ nọ, mẹ gha vbe sẹtin mu ẹtin yan egbe emwi vberriọ. A deghẹ orhiọnkpa roro ẹe wẹ iruemwi ọghe ore egbe ọre ọ gha mu ẹtin yan, vbe odẹikodẹ ọre ọna khẹ ke imẹ sẹẹ, ne imẹ ru vberriọ.

⁵ Ọ rre uzọla ọkpa ne a biẹ mwẹ ọre a na rhuẹ mwẹ, ovbi eseserese Izrẹl ọre I khin, uniẹn ọghe Bẹnjamin, ovbi e Hibru na ma gua esagiẹn ọnrẹn. A gha wẹ ne a ta ọghe Uhi avbe Ju ne a ya ru emwi, e Farisi ọre I gha khin.

⁶ I mu aro yọ sẹrriọ wẹ I kegha khu esọsi khian. Zẹ vbene ọmwa gha sẹtin la ekpa a ru vbene nene Uhi khare khian ọmwata sẹ, I kegha re ọmwa ne ẹ i mwẹ abaku ru.

⁷ Sokpan avbe emwi nii hia ne I mẹ gha te gha ka ye okpe ere, ọ rhiae ọre I ghi ka ẹe yi nian, rhunmwuda Kristi.

⁸ Ẹ i re avbe emwi nii ọkpa, te I ghi ka emwi hia ye ọ rhiae rhunmwuda emwi ọvbehe ne ọ ru ighobioye sẹẹ enii, ọnii ọrọre, a rẹn Kristi Jesu Nọyaẹnmwa. Rhunmwuda ẹre, I keghi filo emwi hia kua, I keghi ka ehia ye emwi ne ẹ i mwẹ esa, ne I miẹn ehe na gha mwẹ Kristi.

⁹ Ne I vbe khian ne a wa kugbe ba irẹn fo. Mẹ i ghi mwẹ emwi obọ mwẹ ne I gha ya tie egbe mwẹ ọmwata, egbe ne I gha te la ekpa a ru vbene nene Uhi khare gha mwẹ, ọmwata ne I ghi khin na nian, keghi re ne a la ekpa a ya Kristi yi rhie ne ọmwa, a re ọmwata ne ọ ke obọ Osanobua rre, ne ẹyotọ ẹre re iyayi.

¹⁰ Emwi ne I ghi ho ọrọre ne I rẹn Kristi, ne I vbe miẹn ẹtin arhiọkpaegbe ẹre vbe egbe mwẹ, ne I ghae vbe uwu oya ne ọ re, ne I vbe do gha ye vbe irẹn vbe uwu ne ọ wu.

¹¹ Vbe idaehọ wẹ, a gha vbe huẹn mẹ tobọ mwẹ kpao vbe uwu, la a rrọọ.

Ne A Gha Rhie Ulẹ Ghe Ehe Ne A Kha Re

¹² I ma kha ighẹ I ru rho obọ nẹ vbe ọnọna, ra wẹ I guẹ fo nẹ, te I ye yẹn egbe ghe odaro, ne ọ miẹn ehe na sọ mwẹ obọ, ighẹ ive emwi ne Kristi Jesu ya yan mwẹ nẹ.

¹³ Vbe ne ẹmwata, etẹn mwẹ, mẹ ma yayi wẹ I sẹ evba nii nẹ, sokpan emwi ne I ghi ru ọrọre wẹ, I ghi yan gbe emwi ni rre iyeke mwẹ, I ghi ziga ne I vba emwi ni rre odaro.

¹⁴ Rhunmwuda ọnii, I ghi wa rhulẹ ọwara gha rrie ehe ne a mwa yọ, ne a miẹn ehe na gba ẹkan yọ mwẹ ohọ, ọnii nọ wẹ, utiemwẹ ne Osanobua la ekpa Kristi Jesu tie ọmwa ye agbọn ne ọ rre odukhunmwu.

¹⁵ Emwi na ẹre ọ kere ne ọ gha rre ima hia ekhọe, ma ni khian eniwanrẹn nẹ vbe ẹmwẹ emwi orhiọn. Vbene ọ rhirhi gha ye hẹ, a deghẹ emwi ọvbehe rre eso vbe uwu uwa ekhọe, Osanobua gha rhan otọ ehia ma uwa.

¹⁶ Vbene ọnii a rhirhi gha ye hẹ, wa gie ima rhie owẹ lele ukpowẹ ne ima la de usin do sẹ wanwan na.

¹⁷ Etẹn mwẹ, wa hia gha ghe mwẹ ru emwi. Ma rhie igiemwi esi ye otọ ne uwa nẹ, rhunmwuda ọnii, wa gha ye iran ni lele ẹe ẹro.

¹⁸ Ẹ i re avbiẹ inugba ọre I he ka ta ẹmwẹ na ma uwa yi, te I ghi vbe dọlegbe ta ẹe na, ke imẹ kevbe ameve vbe aro mwẹ, emwa ni bun rrọọ ne uyinmwẹ iran ya khian eghian uwu ne Kristi wu vbe uhunmwu ugbugbe.

¹⁹ Ẹrinmwi erhẹn ọre iran ra na mu omẹ, orriarria egbe iran ọrọre ẹbọ ne iran gho, emwi ne ọ kere ne ekhue ẹre gha mu iran ọre iran ya ghagha, ẹmwẹ emwi agbọn na ọkpa ọre iran mu roro.

²⁰ Sokpan ivbi ẹrinmwi ma khin, te ima vbe rhie aro ye odẹ gha khẹ ne Ọmiọnmwafan tuorre ke ẹrinmwi rre ighẹ Nọyaẹnmwa Jesu Kristi.

²¹ Rẹn ghi fi egbe ne mitan mitan ne ọ sẹtin wu ọghomwa na werriẹ, ọ ghi yae khian vbene egbe uyi ọghe irẹn ye, vbe ekpa ẹtin nii ne irẹn ya sẹtin viọ emwi hia ye ototọ asẹ ọghọe.