Filipai 2 - Edo Bible (E Baibol Ẹdo) Version 1996

Imuegberriotọ Kevbe Ukpọlọmwẹ Kristi

¹ Ẹdẹ agbọn ruẹn vbe uwu Kristi rhie iwegbe nuẹn ra? Wẹ gu nene Orhiọn mu obọ ra? Wa mwẹ itohan kevbe ẹnina egbe ra?

² I ya tua uwa khekherriọ wẹ ne uwa ya ẹko mwẹ rhiẹnrhiẹn fo, vbe ekpa ne uwa gha na gha mwẹ ekhọe ọkpa, wa gba gha ho ẹmwẹ egbe, ne uwa vbe gha re ọkpa vbe orhiọn kevbe ekhọe.

³ Wa ghẹ ya ekhọe a gua ye ẹgẹn ọmwa ọkpa ru emwi rhọkpa, ra ekhọe a ba wẹ, sokpan wa gba gha daa ne egbe, vbene u i na ro ighẹ wẹ maa sẹ ọmwa ọvbehe.

⁴ Wa gha ho ọma ye egbe egbe, ẹ i re ne egbe ruẹ ọkpa.

⁵ Wa gie egbe ekhọe nọ gha gu e Jesu vbe gha gu uwa.

⁶ Egbe Osanobua ọre ọ gu ẹe ẹdẹ, sokpan rẹn ma kha wẹ ne irẹn ya ẹkiudu gu Osanobua gha mwa ẹrrẹe.

⁷ Sokpan rẹn keghi ya ekhọe obọ ẹre kuẹ ehia ye otọ, ọ na rhie egbe ye ihe ọguọmwadia, ọ keghi do ye vbe ọmwa kẹkan.

⁸ Ọ na mu egbe rriotọ, odẹ ahọn ẹmwẹ ọre ọ rhie egbe yi ya sẹ uwu, uwu ne ọ wu vbe uhunmwu ugbugbe.

⁹ Rhunmwuda ọnii, Osanobua keghi rhie ẹre ye ehe ne ọ yo sẹẹ vbe odukhunmwu. Ọ na mu eni ne ọ sẹẹ eni hia nẹẹn.

¹⁰ Wẹ, ne a ya gha ya ọghọ ne eni Jesu, emwi hia ni rre ẹrinmwi, ni rre agbọn kevbe ni rre ototọ agbọn. Te ehia gha de iguẹ.

¹¹ Ehia ghi vbe yae go vbe azagba wẹ, Jesu Kristi ọrọre Nọyaẹnmwa ne uyi ọghe Osanobua e Evbavba.

Ne A Gha Baa Vbe Ukpa Vbe Agbọn

¹² Rhunmwuda ọnii, ọse mwẹ ni ghan, vbene uwa wa gha họn ẹmwẹ mẹ ẹghẹ ne I na rre ehe ne uwa ye, ẹghẹ na ọre ọ na mobọ ke nian ne uwa gha họn ẹmwẹ mẹ vbe ne a ghi na miẹn na ighẹ I i ghi rre ehe ne uwa ye. Wa gha ya ohan kevbe uguọmwẹ winna khian, ne uwa miẹn ehe na ru ẹmwẹ imiẹnfan uwa fo,

¹³ rhunmwuda Osanobua ọre ọ winna vbe uwu uwa ne ọ miẹn ehe na guẹ gha ho, kevbe ne u sẹtin gha ru vbene ọ rre irẹn ekhọe.

¹⁴ Gha ru emwi hia vbe ne a i na vian kevbe ne a i na muan ẹmwẹ.

¹⁵ Ne uwa sẹtin gha re ne ẹ i mwẹ abe kevbe ne ọ huanrẹn, zẹ vbe ivbi Osanobua ne ọ gba na fo vbe agbọn ọ kẹkẹe kevbe ẹwobi emwa na. Wa gha fi wainwain vbe uwu ẹbu iran zẹ vbe orhọnmwẹ ne ọ rhie uwanmwẹ ne iso, zẹ vbene uwa na ta ẹmwẹ arrọọ ma iran.

¹⁶ Wa gha ru vberriọ, wa gha gun mwẹ ya zọmọ vbe Ẹdẹ Kristi, rhunmwuda ọ gha rhie maa wẹ edomian kevbe iwinna mwẹ, ẹ i re ne a mu rhia.

¹⁷ Ogha kẹe, te a ra gbe esagiẹn arrọọ mwẹ ye otọ zẹ vbe emwi imuohan ye ese ne iyayi uwa zọ ghe Osanobua. Ọ gha yerriọ I gha ghọghọ, I gha vbe ghae ne uwa hia vbe oghọghọ mwẹ na.

¹⁸ Erriọ zẹẹ ọre ovbe kei ne uwa gha ghọghọ, ne uwa vbe ghae sẹ imẹ obọ vbe oghọghọ uwa.

Timoti Kevbe Epafroditọs

¹⁹ I mu ẹtin yan Nọyaẹnmwa Jesu Kristi ighẹ I gha sẹtin gie Timoti bu uwa gha dee, vbe ọ ma he kpẹe wan, ne ẹmwẹ uwa ne I họẹn miẹn ehe na rhie igiẹdu mẹ.

²⁰ Rẹn ọkpa ọre I miẹn ne emwi ne ọ rre imẹ ekhọe vbe rre ọre ekhọe, kevbe ne ọ vbe zẹ ye ẹmwẹ uwa.

²¹ Emwa nekpa hia, ẹmwẹ ne egbe iran ọre iran rhie aro daa, ẹ i zẹdẹ re ẹmwẹ iwinna Jesu Kristi.

²² Wa tobọ uwa miẹn vbene ọ vbe ta egbe ọmwa ne irẹn khin hẹ, vbe imẹ vbe ọre gba winna, zẹ vbe ọmọ vbe erha ye iwinna iyẹn ne ọ maa.

²³ I gha rẹn vbene emwi khian gha ye mwẹ hẹ nẹ, I gha gi ẹe bu uwa gha dee.

²⁴ I vbe mu ẹtin yan Nọyaẹnmwa ighẹ mẹ tobọ mwẹ gha vbe rherhe do miẹn uwa.

²⁵ I roro ẹe wẹ, ọ kere ne I gi ẹe bu uwa gha dee ighẹ Epafroditọs, ọmwa ne ọ mudia ke mwẹ vbe iwinna kevbe igbinna, ọmwa ne uwa vbe miẹn gha gie ẹre uhunmwu vbe iyobọ ne uwa ru mẹ.

²⁶ Ọ wa ho ne ọ miẹn uwa hia rhunmwuda, ọ wa rueghe ẹre orhiọn ighẹ ẹmwẹ ne uwa na họn wẹ egbe ma te rran rẹn.

²⁷ Ẹmwata nọ wẹ egbe ma te rran rẹn, ọ te wa wu fo, sokpan Osanobua keghi tohan rẹn, ẹ i re rẹn ọkpa, sokpan kevbe imẹ ba re, ne ọ na mu akhiẹ ne ọ sẹre ni hin mwẹ uhunmwu rre.

²⁸ Ena hia rre usun emwi ne I na ho ne I gi ẹe bu uwa gha dee, ne ẹko uwa dọlegbe rhiẹnrhiẹn vbe uwa a miẹn ọẹn, ẹghẹ nii, a ghi ho akhiẹ mwẹ bẹkun.

²⁹ Rhunmwuda ọnii, wa ghi ye oghọghọ rhan obọ miẹn rẹn zẹ vbe ọtẹn ne okpia vbe uwu Nọyaẹnmwa. Wa gha ye ọghọ ne emwa vbene irẹn ye nii.

³⁰ Rhunmwuda te ọ rhie uhunmwu mwẹ atataobọ, ọ te ra wa wu ba ẹmwẹ iwinna Kristi, ne ọ miẹn ehe na rhie iyobọ mẹ, egbe ne uwa ma sẹtin rhie mẹ.