Filipai 1 - Edo Bible (E Baibol Ẹdo) Version 1996

¹ E Pọl kevbe Timoti, emwa ni re eguọmwadia Kristi Jesu, ọre ọ gbẹn ebe ne gie emwa Osanobua hia ni rre Filipai, iran ni ya Jesu Kristi yi, deba avbe olotu esọsi kevbe iran ni ru iyobọ.

² Te Osanobua ne Erha mwa kevbe Nọyaẹnmwa Jesu Kristi gha rhie ẹsọhẹ kevbe ọfumwegbe ne uwa.

Erhunmwu Ne Pọl Na Ne Iran Ni Gha Tie Ebe Ẹre

³ Ẹghẹikẹghẹ ne I rhirhi a ya mu ẹmwẹ uwa ro, ọre I ya kpọnmwẹ Osanobua mwẹ ne uwa hia.

⁴ Ẹghẹikẹghẹ ne I rhirhi a ya na erhunmwu ne uwa, ẹko ọyẹnmwẹ ọre I ya na ẹn.

⁵ Rhunmwuda vbe ne uwa ya ru iyobọ mẹ hẹẹ vbe ẹmwẹ iyẹn ne ọ maa, ke ikpẹdẹ ne okaro dandaandan do sẹ wanwanna.

⁶ Rhunmwuda ọnii, aro mwẹ wa da ọna wẹ, Osanobua nọ suẹn iwinna esi na vbe uwu uwa, gha ru ẹe gha khian rhinrin a te do ru ẹe fo, vbe Ẹdẹ Kristi Jesu.

⁷ Ẹmwẹ uwa i lahin ekhọe mwẹ rre, rhunmwuda ọnii, emwi ne ọ kere nọ ne ẹmwẹ uwa gha ye rriọ vbe ekhọe mwẹ. Rhunmwuda, wa hia gun mwẹ ghae vbe emwi ne Osanobua ya mu ọghọ yọ mwẹ egbe na, kevbe ẹghẹ ne I na rre uwu eghan na, kevbe ẹghẹ ne idobo i na rrọọ mẹ, vbe i a gha mu ẹmwẹ iyẹn ne ọ maa gui, kevbe I a vbe gha ya ẹre igiẹ mu otọ.

⁸ Osanobua rẹnrẹn wẹ ẹmwata ọre I ta vbe i a kha wẹ, vbene ẹmwẹ uwa rrọ mwẹ ekhọe, uwu ekhọe Kristi Jesu tobọ ẹre ọre ọ ke rre.

⁹ Erhunmwu ne I na ne uwa ọre ọna khin, I na erhunmwu wẹ ne aho ẹmwẹ ọmwa uwa gha wan yọ ghodaro ghodaro deba irẹnmwi ẹmwata kevbe iro ne ọ gbae.

¹⁰ Ne uwa miẹn ehe na sẹtin gha zẹ emwi ne ọ maa sẹ. Ẹghẹ nii, wa ghi fe vbe obọ a ma ru emwi la uro kevbe a gu ọmwa gui vbe Ẹdẹ Kristi.

¹¹ Ẹdẹ agbọn uwa ghi do vuọn ne avbe emwi ne ọre ne ọ maa, ọghe ẹmwata ne a ghe ginna ọmwa, ne Jesu Kristi ọkpa sẹtin rhie ladian ne uyi kevbe urhomwẹ Osanobua.

Kristi Ọrọre A Rre Agbọn

¹² I ho ne uwa rẹn etẹn mwẹ, wẹ, emwi hia ni sunu vbe egbe mwẹ, wa ru iyobọ ye alaghodaro iyẹn ne ọ maa.

¹³ Emwi ne ọ ghi sunu ọrọre wẹ, avbe ivbiyokuo ni khẹ ẹguae hia, kevbe emwa ọvbehe ni rre emwa na, rẹnrẹn wẹ emwi ne I rre eghan ba ọrọre wẹ ọguọmwadia Kristi ọre I khin.

¹⁴ Ne I na rre eghan na, keghi vbe rhie udinmwẹ ne etẹn ne ikpia ni bun vbe uwu Kristi, sẹrriọ wẹ edẹgbedẹgbe ọre iran ghi ya din yọ vbe ne iran na kpe orhu ẹmwẹ ni vbe ne a i na fian afianma.

¹⁵ Ọ rhe ye rriọ, eso vbọ kpe orhu Kristi rhunmwuda oya ọmwa da ọmwa kevbe ẹmwẹ ne a ru, sokpan eso wa ya ẹkoata kpe orhu.

¹⁶ Aho ẹmwẹ ọmwa ọre ọ ya iran na ru vberriọ, rhunmwuda iran rẹnrẹn wẹ te Osanobua yae fian okhuo mẹ wẹ, ne I ya gha mu ẹzọ iyẹn ne ọ maa na gui.

¹⁷ Iran nekpa i ya ẹkoata kpe orhu e Kristi, sokpan ekhọe emwidamwẹ ọghe ne ọ rẹn ọghọe ọkpa, iran ho ne iran dọlegbe si ẹti yọ mwẹ urhu vbe ne I na rre uwu eghan na.

¹⁸ Ọnii ma mwẹ emwi ne ọ si. Te ọyẹnmwẹ ye sẹ mwẹ yọ sokpan ne a kpe orhu e Kristi, ọre ọ ghe ẹkoata ra ọghe ibeleku. Ẹn, te ọyẹnmwẹ ra ye gha sẹ mwẹ.

¹⁹ Rhunmwuda, mẹ rẹnrẹn wẹ, rhunmwuda erhunmwu uwa, kevbe rhunmwuda iyobọ ne ọ ke Orhiọn Jesu Kristi rre, a gha fan mwẹ fua.

²⁰ Rhunmwuda, emwi ne I mobọ ho kevbe ne I danmwehọ ẹre, ọrọre ne a ghẹ miẹn ighẹ I ma ghi sẹtin winna iwinna mwẹ, sokpan ne a miẹn wẹ vbe ẹghẹ hia, kpataki vbe iwinna na, ne ẹtin gha rre iwu, vbe ne a gha na miẹn wẹ, egbe mwẹ hia ọre I ghi ya rhie uyi gie Kristi, te I rre agbọn ra te I wu.

²¹ Rhunmwuda, de emwi ne ọ mobọ re a rre agbọn na yi? Zẹ vbe ọghomwẹ, Kristi ọre nọ. Rhunmwuda ọnii, uhin ighẹ emwi ne ọ maa sẹ ọnii ọre uwu gha ghi rhie rre.

²² Sokpan, a deghẹ I gha rre agbọn, ọre I gha na winna iwinna ne a ho sẹ ọre egbe sẹ, I ma rẹn ne I gha ghi ru vbọ.

²³ Te aro mwẹ ghi rre eran rre eran. Ọ wa khọn mwẹ ne I sẹ agbọn na rae ne I ya tota ke Kristi, ọnii ọ wa re emwi ne ọ maa sẹ ẹsẹse.

²⁴ Sokpan, rhunmwuda uwa, ne ọ he ru ekpataki sẹẹ ọrọre ne I gha rre agbọn.

²⁵ Aro mwẹ wa da ọnọna, rhunmwuda ọnii, te I khian gha rre agbọn, I gha deba uwa hia gha rrọọ, ne I miẹn ehe na rhie ba alaghodaro kevbe oghogho uwa vbe uwu iyayi.

²⁶ Rhunmwuda ọnii, I gha ghi dọlegbe gu uwa gha rrọọ, I gha gie uwa ya ghan sẹ ayọ vbe ẹdẹ agbọn uwa vbe uwu Kristi Jesu.

²⁷ Banbanna nian, emwi ne a mobọ kha ọrọre ne uyinmwẹ uwa gha re vbene iyẹn ne ọ maa ho ne ọ gha ye, vbene a gha na miẹn wẹ, te I ghi sẹtin rre do miẹn uwa ra I ma sẹtin rre, I ghi gha họn wẹ, wa mudia vbene ekhọe uwa na kugbe vbe ọghe emwi ne uwa ru, wa ghi ku obọ gbe gha gbinna khian ne iyayi, kevbe iyẹn ne ọ maa.

²⁸ Wa ghẹ gie ohan eghian uwa mu uwa, wa gha mwẹ udinmwẹ vbe ẹghẹ hia, ọna ghi gie iran rẹn wẹ, te uwa ra khọn miotọ vbene iran ra na gbe kuẹn, rhunmwuda Osanobua ọ re ọ ra rhie akhọnmiotọ ne uwa.

²⁹ Rhunmwuda, a yae ru mwa ẹse nẹ wẹ, ne uwa gha ga Kristi, ẹ i re vbe ne a na ya irẹn yi ọkpa, sokpan vbe ne a na vbe rri oya ne irẹn.

³⁰ Wanwanna nian, wa gha sẹtin gun mwẹ gbinna igbinna na, ọkpa nii ne uwa miẹn vbe I gbinna ẹghẹ ne ọ gberra nọ, ọnii ọ re I ye gbinna khian na, zẹ vbene uwa họẹn.