Failimọn 1 - Edo Bible (E Baibol Ẹdo) Version 1996

¹ E Pọl ne ọ rhunmwuda Kristi Jesu re oleghan kevbe ọtẹn mwa ighẹ Timoti, ọre ọ gbẹn ebe na gie uẹ, Failimọn ne ogieva ima ne ima gba winna.

² Kevbe esọsi ne a do vbe owa ruẹ, kevbe ọtẹn ima ne okhuo ighẹ Afia, kevbe ogieva ima ne ima gba re ovbiyokuo ighẹ Akipọs.

³ Osanobua ne Erha mwa kevbe Nọyaẹnmwa Jesu Kristi ne ọ rhie ẹsọhẹ kevbe ọfumwegbe ne uwa.

Aho Ẹmwẹ Ọmwa Kevbe Iyayi Failimọn

⁴ Failimọn ne ọtẹn mwẹ, ẹghẹ ne I rhirhi ya na erhunmwu hia, ọre I ya so eni ruẹn, I ghi rhie ekpọnmwẹ ne Osanobua.

⁵ Rhunmwuda I họn ẹmwẹ aho ẹmwẹ ọmwa ne u mwẹ ghe emwa Osanobua hia, kevbe iyayi ne u mwẹ vbe uwu Nọyaẹnmwa Jesu.

⁶ Erhunmwu mwẹ ọrọre wẹ, vbene ima na gba mu obọ na, zẹ vbe emwa ni yayi, te ọ gha ye ima rẹn otọ ẹre sẹ ayọ, ighẹ dọmwadẹ afiangbe ne ima mwẹ vbe uwu ẹdẹ agbọn mwa vbe uwu Kristi.

⁷ Ọtẹn mwẹ ne ọ ghan, aho ẹmwẹ ọmwa ruẹn wa yẹ ọyẹnmwẹ sẹ mwẹ ẹsẹsẹmwẹse, ọ keghi vbe rhie ẹtin yọ mwẹ iwu, rhunmwuda, u ye ekhọe emwa Osanobua hia gua kpao.

Ọ Nọ Rẹn Ne Onisimọs

⁸ Rhunmwuda ọ na, I sẹtin wa si agbada vbe unu tae, zẹ vbe ọtuẹn vbe uwu Kristi, wẹ, ghe emwi ne u gha ru, ne ọ kere ne u ru.

⁹ Sokpan aho ẹmwẹ ọmwa ọre ọ ghi ya mwẹ wẹ, te I gha rinmwian. Erriọ I gha ru ẹe, a gha rhie miẹn wẹ, mẹ ne Pọl nọ, ọmwa ne ọ re ukọ ne Kristi ya zẹ ihe egbe, kevbe zẹ vbene ọ ye banbanna, I keghi vbe rhunmwuda ẹre gha re oleghan.

¹⁰ Rhunmwuda ọnii, I ra nọ ruẹn emwi ọkpa, rhunmwuda Onisimọs ne ovbi mwẹ vbe uwu Kristi, rhunmwuda, ehe ne I na rre uwu eghan vbe emwa na, ọre I na khian erhae vbe ekpa ọghe orhiọn.

¹¹ Vbe ẹghẹ ọkpa yi, ẹ i te mwẹ esa ne ọ ye nuẹn, sokpan, wanwan na nian, ihe kpataki ọre ọ ghi ye ne imẹ kevbe uwẹ.

¹² I khian gi ẹe werriegbe bu ruẹ gha dee nian, vbene ọ dee orhiọn mwẹ lele ẹe dee.

¹³ Ọ te khọn mwẹ ne I wẹ ne ọ gun mwẹ tota vbe uwu eghan vbe emwa na, vbe ehe ne I ye ba ẹmwẹ Iyẹn Ne ọ maa, ne ọ gha ru iyobọ ne uwẹ gha te ru mẹ, mẹ.

¹⁴ Vbene ọ rhirhi gha ye hẹ, I ma ho ne I ya obọ yẹn ruẹn ehọ gha ru iyobọ mẹ, sokpan, I ho ne u ye ekhọe obọ ruẹ ru ẹe. Rhunmwuda ọnii, I i ra ru emwi rhọkpa vbe ẹ i re te u kue yọ nẹ.

¹⁵ Ọ gha kẹe, te Onisimọs kpao sẹ uẹ rae vbe ẹghẹ kherhe, ne ọ miẹn ehe na bu ruẹ rre do gha re ọ wuẹ rhinrin ẹdẹ.

¹⁶ Rhunmwuda, vbe wanwan na nian, ẹ i ghi re ọviẹn kẹkan, ọ sẹe ọnii nẹ, ọtẹn ne ọ ghan vbe uwu Kristi ghi nọ. U miẹn ehe ne ọ ghi ye mẹ nian! Inuinu ọre ehe ne ọ ye ne uwẹ gha ya sẹẹ, zẹ vbe ọviẹn kevbe zẹ vbe ọtẹn vbe uwu Nọyaẹnmwa!

¹⁷ Rhunmwuda ọnii, a deghẹ u gele ka mwẹ ye ogieva ruẹ, rhan obọ miẹn rẹn la owa, zẹ vbe ne u gha vbe rhan obọ miẹn imẹ la owa.

¹⁸ A deghẹ ọ ru ẹ emwi khọ ra te ọ rri ọ osa, ka ẹe yọ mwẹ urhu.

¹⁹ I gha tobọ mwẹ ye obọ mwẹ gbẹn ọnọna vbọ: Mẹ Pọl gha ha ruẹ re. (Ẹ i re ne I gha na ghi vbe gha ye ruẹ ẹre rre ighẹ iyọha wẹ tobọ ruẹ yẹ mwẹ re.)

²⁰ Rhunmwuda ọnii, ọtẹn mwẹ, lahọ ya emwi na ghe mwẹ aro, vbe ekpa ọghe Nọyaẹnmwa, ya ẹko mwẹ rhiẹnrhiẹn zẹ vbe ọtẹn vbe uwu Kristi.

²¹ Aro mwẹ dae vbene I wa gbẹn ebe na wẹ, u gha ru vbene I khare, vbe ẹmwata, I rẹnrẹn ighẹ u gha ru gberra vbene I khare.

²² U ghi wa dọlọ ughugha ọkpa yi ye otọ khẹ mwẹ, rhunmwuda, I mwẹ idaehọ wẹ Osanobua gha họn erhunmwu uwa hia, ne a dọlọ rhie mwẹ bu uwa gha dee.

Otuẹ Okiekie

²³ Epafras ne ọ vbe gun mwẹ rre uwu eghan vbe ekpa Kristi Jesu, wẹ uwa do.

²⁴ Erriọ vbe nọ, ihomwa ne ima gba winna ighẹ avbe Mak, Aristakọs, e Demas kevbe Luk vbe wẹ uwa do.

²⁵ Te ẹsọhẹ Nọyaẹnmwa Jesu Kristi gha guẹ gha rrọọ.