Ẹzra 8 - Edo Bible (E Baibol Ẹdo) Version 1996

Emwa Ni Ke Iwe Rre

¹ Iran na ọ re ọ gha re ediọn ẹwae ni gha rre iwe vbe Babilọn, iran na vbe lele Ẹzra gha die Jerusalẹm vbe ẹghẹ ne Atakzaziz na gha re ọgbaisi:

^2-14 E Gẹsiọm ne ọdiọn ẹwae Finihaz Daniẹl ọghe ẹwae Itama E Hatus ne ovbi Siekanaia ọghe ẹwae Devid E Zẹkaraia ọghe ẹwae Parọs, do deba arhin igbe yan ikiọkhọe (150) vbe ẹwae ni, (te a wa gbẹnnẹ ivbi uniẹn ne iran khin yotọ) Eliehoenai ne ovbi e Zerahia ọghe ẹwae Pahoto Moab, do deba arhin uri (200) E Siekenaia ne ovbi e Jehaziẹl ọghe ẹwae Zatu deba arhin iyisẹn eha (300) Ebẹd ne ovbi e Jonatan ọghe ẹwae Adin deba arhin ekigbesiyeha (50) E Jesiaia ne ovbi Atalaia, ọghe ẹwae Ẹlam deba arhin ekigbe siyenẹ (70) E Zebadaia ne ovbi e Maikẹl ọ gha ẹwae Siefatia, deba arhin iyenẹ (80) Obedaia ne ovbi e Jẹhiẹl, ọghe ẹwae Joab deba arhin evairrọvbugie yan uri (218) E Sielomit ne ovbi e Josifaia, ọghe uniẹn e Bani deba arhin iyihinrin (180) E Zẹkaraia ne ovbi e Bebai ọghe ẹwae Bebai, deba arhin evairrọvbọgban (28) E Johanan ne ovbi e Hakatan, ọghe ẹwae Azgad deba arhin igbeyan iyisẹn (110) Ẹlifẹlẹt, e Juẹl kevbe Siemaia, ọghe ẹwae Adonikam, deba arhin iyeha (60) (okiekie iran na ya werriegbe rre) Utai kevbe Zakọ, ọghe ẹwae Bigvai deba arhin ekigbesẹ iyi enẹ (70)

Ẹzra Gualo Avbe Livai Viọ Ye Ọgua Osa

¹⁵ I keghi si avbe emwa nii koko vbe ẹzẹ ne a ye obọ fian ne ọ lẹ ghe Ahava, ma keghi bu agọ ye evba la ikpẹdẹ eha. I keghi miẹn wẹ, avbe ohẹn rre uwu ẹbu nii, sokpan avbe Livai i rrọọ.

¹⁶ I keghi gie ne a tie ihinrin vbe uwu avbe ọkaolotu nii, ena ọ re Eliezẹ, Ariel, e Siemaia, Elnatan, e Jarib, Elnatan, e Natan, e Zẹkaraia kevbe Mẹsiulam, deba emamwaemwi eva, Joarih kevbe Elnatan.

¹⁷ I keghi gie iran bu Ido ne ọkaolotu iran ni rre Kasafia, ne ọ ya tama rẹn kevbe avbe ihua ẹre ne iran gba winna vbe uwu Ọgua Osa, ne iran gie emwa bu ima gha dee ne iran do gha ga Osanobua vbe uwu Ọgua Osa.

¹⁸ Vbe ekpa ẹse ọhẹ Osanobua, iran keghi gie Siẹrebia, e Livai, ne ọ sihe, ne ovbi ẹwae Mali, bu ima gha dee, arhin evai rrọvbugie, vbe uwu avbe ivbi ẹre kevbe etiọnrẹn keghi lele ẹe gha dee.

¹⁹ Iran kevbe gie Hasiabaia kevbe Jesiaia ne ivbi ẹwae Merari deba ugie vbe uwu avbe etẹn iran gha dee.

²⁰ Arhin ugie yan uri (220) ọvbehe kevbe deba ena. Iran na, e Devid kevbe avbe iran ni gue ẹe winna, ọ re ọ zẹ iran ne iran gha ye avbe Livai obọ. Te a wa gbẹnnẹ eni iran hia ye otọ.

Ẹzra Viọ Iran Yo Aguẹ Iran Na Vbe Na Erhunmwu

²¹ A ghi sẹ Ẹzẹ ne a fiaẹn ọghe Ahava, I keghi wẹ ne ima hia yo aguẹ, ne avbe mu egbe rriotọ vbe odaro Osanobua mwa, ne a vbe rinmwiaẹn ne ọ su ima vbe okhian mwa, kevbe ne ọ degue ima kevbe ivbi ima deba emwi ne ima mwẹ hia.

²² Ekhue ma gunmwẹ nọ ọgbaisi wẹ ne ọ viọ ivbiyokuo ne ima ne iran gha su ima khian, rhunmwuda mẹ tama rẹn nẹ wẹ te Osanobua fiangbe, emwa hia ni mu ẹtin yan rẹn, sokpan, ọ ghi gha mu ohu emwa hia ni fi iyeke gbe ẹe, ọ ghi gha rri iran oya.

²³ Rhunmwuda ọnii, ma kegha rrie aguẹ, a na na erhunmwu ghe Osanobua ne ọ degue mwa, ọ keghi họn erhunmwu mwa.

Emwi Ne A Ya Zẹ Ọhẹ Ye Ọgua Osa

²⁴ I keghi zẹ Siẹrebia kevbe Hasiabaia vbe uwu avbe ohẹn ni sẹre deba iran igbe ọvbehe.

²⁵ I keghi do mwa avbe esiliva, igoru kevbe emwi ne a ya le evbare ne Ọgbaisi, avbe iran ni gue ẹe zẹ iro, iran ni rre ukpo vbe ehe ne ọ ye, kevbe ne avbe ivbi Izrẹl hẹ rre ne a gha lo vbe Ọgua Osa, I na viọ ne avbe ohẹn.

^26-27 Emwi ne I viọ ne iran ena khin: esiliva, etọni ekesọgban, ọkpan esiliva iyisẹn — uwan igbeyan ikiọkhọe (150) igoru, uwan iyisẹn isẹn yan arria isẹn ihinrọn (7,500) ọkpan igoru ugie — uwawa ne giẹrẹ ekigbesẹ iyi ene yan uri (270) ọkpan oze ni mose eva ne ọ wa vbe ma vbe ọkpan igoru.

²⁸ I keghi tama iran wẹẹ, “Emwa iruemwi wa khin ne Nọyaẹnmwa ne Osanobua avbe erha uwa odede, deba avbe ọkpan esiliva ra ọghe igoru ne emwa ya zẹ ọhẹ akekhọerre gie ẹe.

²⁹ Wa hẹko gha gbearoghe iran, wa te do sẹ Ọgua Osa. Wa gha sẹ ugha avbe ohẹn, wa ghi mwa iran, wa ghi viọ ne avbe ọkaolotu avbe ohẹn. Kevbe avbe Livai, kevbe avbe ọkaolotu ivbi Izrẹl ni rre Jerusalẹm.”

³⁰ Rhunmwuda ọnii, avbe ohẹn kevbe avbe Livai kegha gbearoghe avbe esiliva kevbe igoru kevbe avbe ọkpan, ne iran viọ gha rrie Ọgua Osa vbe Jerusalẹm.

³¹ Ikpẹdẹ ne ogiweva ọghe uki ne okaro ọ re ima na kpao vbe Ahava ne ẹzẹ ne a fian ẹn gha die Jerusalẹm. Osanobua ima keghi wa deba ima, ọ na degue mwa hin obọ odekun ọghe avbe eghian kevbe a lẹre khẹ ọmwa vbe ima rre okhian nii.

³² Ma ghi sẹ Jerusalẹm, ma keghi ya ikpẹdẹ eha hẹwẹ.

³³ Ọ ghi sẹ ikpẹdẹ ne ogienẹ, ma kegha rrie Ọgua Osa, ma keghi mwa avbe esiliva kevbe igoru kevbe avbe ọkpan, ma keghi viọ ne Meremot ne ohẹn ighẹ ovbi Uraia. Emwa ni gha gue ẹe rre evba kegha re Eliaza ne ovbi Finihaz deba e Livai eva, e Jozabad ne ovbi Jesua kevbe Noadaia ne ovbi e Binnui.

³⁴ A keghi do ka emwi hia, ne mwa ẹnrẹn, a na wa vbe gbẹnnẹ ehia ye otọ vbe ọwarọkpa nii.

³⁵ Emwa hia ni ke iwe rre keghi viọ emwiokọ rre wẹ ne a giẹn ọnrẹn ya zọ ese ghe Osanobua Izrẹl.

³⁶ Iran kevbe mu ebe ne ọgbaisi gbẹn ne iran, iran na mu ne nọ khaemwisẹ kevbe iran ni rre asẹ vbe otọe Orrie Yufretes, iran na vbe ye obọ ya iran ẹre kevbe ugamwẹ vbe Ọgua Osa.