Ẹzra 5 - Edo Bible (E Baibol Ẹdo) Version 1996

¹ Vbe ẹghẹ ne a kha na, akhasẹ eva, a tie ọkpa e Hegai, kevbe nọkpa Zẹkaraia ne ovbi Ido keghi suẹn gha ya eni Osanobua Izrẹl gu avbe Ju ni rre Juda kevbe Jerusalẹm guan.

² Ugbẹn vbe Zerubabẹl ne ovbi e Sitiẹl kevbe Jọsua ne ovbi e Jehozadak ghi họn ẹmwẹ ne iran ta, iran keghi suẹn gha dọlegbe bọ Ọgua Osa ne ọ rre Jerusalẹm avbe akhasẹ eva ni keghi yi iran obọ.

³ Uhin vbe ọwarọkpa nii, ọ re Tatenai ne Ne ọ khaemwisẹ otọe Orrie Yufretes, e Sieta Bozenai kevbe avbe emwa ni rre asẹ ne ihua iran, na gha die Jerusalẹm, iran keghi nọ wẹẹ, “Gha ọ rhie asẹ ne uwa ya bọ Ọgua Osa na, kevbe ne uwa vbe viọ emwi hia yọ?”

⁴ Iran kevbe nọ eni emwa ni gu iran bọ nene Ọgua Osa.

⁵ Sokpan, Osanobua keghi mudia ne iran ne avbe olotu e Ju, rhunmwuda ọnii avbe ivbi e Pẹsia ni rre asẹ nii keghi wẹ iran i ra ru emwi rhọkpa vbe ẹ i re te iran ka gbẹn ebe gie Dariọs ne ọgbaisi keghi ne ọ vbe rhie ewanniẹn gie iran nẹ.

⁶ Ebe ne iran gbẹn ya tama nọgbaisi ọ re ọ na khin:

⁷ “E Dariọs ne Ọgbaisi, u gha tọ u kpẹre.

⁸ “Ma ho ne u rẹn Umogun wẹ ma yo otọ e Juda, ma keghi do miẹn wẹ iran gha dọlegbe bọ Ọgua Osa Osanobua nọkhua nii, iran gha ya avbe okuta nekhua kevbe olila ne a viọ lele ekẹn bọe. Te iran wa mu aro yọ gha ye ifuẹro ru ẹe, ọ hẹko mwẹ iran uhunmwu khian.

⁹ “Ma keghi nọ avbe ọkaolotu iran wẹ ne iran tama ima ọmwa ne ọ rhie asẹ ne iran ya dọlegbe bọ Ọgua Osa ni kevbe ne iran vbe dẹlẹ emwi hẹ yọ.

¹⁰ Ma keghi vbe nọ eni iran ne ima miẹn ehe na tama ruẹn emwa ni re ọkaolotu vbe iwinna na.

¹¹ “Iran keghi wanniẹn wẹẹ, ‘Eguọmwadia Osanobua ọghe ẹrinmwi kevbe agbọn ọre ima khin, te ima dọlegbe bọ Ọgua Osa ne ọba ne ọ mwẹ ẹtin ọghe Izrẹl ka bọ, ọ na dẹlẹ emwi yọ vbe ẹghẹ ne ọ kpee fua, gha dee.

¹² Sokpan, ugbẹn vbe avbe erha mwa odede ghi ya ohu mu Osanobua Ẹrinmwi, ọ na gie Nebukiadneza ne Ọba e Babilọn ya khọn iran, uniẹn ivbi e Kialdia ọ re ọba na khin. Iran keghi guọghọ Ọgua Osa a, iran na viọ emwa ni gha rrie iwe vbe Babilọn.

¹³ Ọre ọ ghi na sẹ ukpo ne okaro ne Sairọs ne ọba la ẹkete zẹ vbe ọgbaisi ọghe Babilọn, e Sairọs keghi gie wẹ ne a dọlegbe bọ Ọgua Osa ni.

¹⁴ Ọ na viọ iran werriegbe rre ighẹ avbe emwi ne a lo vbe Ọgua Osa ọghe igoru ke ọghe esiliva ne Nebukiadneza viọ vbe Ọgua Osa ne ọ rre Jerusalẹm, ọ na ya viọ ẹre ye aro ẹbọ vbe Babilọn. E Sairọs ne ọgbaisi keghi viọ avbe emwi na ne ọkpia ọkpa ne a tie ẹre Siẹsbaza ne irẹn ya ru nọ khaemwisẹ ọghe Juda.

¹⁵ Nọgbaisi nii keghi tama rẹn wẹ ne ọ viọ avbe emwi ni werriegbe gha rrie Ọgua Osa ne ọ rre Jerusalẹm, ne ọ vbe dọlọ bọ Ọgua Osa ye ehe ne ọ te ka gha ye yi.

¹⁶ Ẹre Siẹsbaza na do gbe ẹyotọ ẹre, te a ghi bọe khian kevbe ẹghẹ nii gha dee do sẹ wanwan na, sokpan a ma he ye bọe fo.’

¹⁷ “Wanwanna nian Umogun, a deghẹ ọ yẹ ruẹ, u sẹtin wẹ ne a gualọ otọe emwi na vbe ehe ne a gbẹnnẹ ẹmwẹ ẹguae yi, ne a miẹn ehe na rẹn a deghẹ e Sairọs gele wẹ ne a dọlọ Ọgua Osa ne ọ rre Jerusalẹm bọ ra ẹn o, vbe iyeke ọnii, wẹ ghi vbe gie ima rẹn vbene ẹmwẹ na ye hẹ vbe ekhọe uwẹ.”