Ẹzra 4 - Edo Bible (E Baibol Ẹdo) Version 1996

Idobo La Ẹmwẹ Ọgua Osa Ne A Dọlọ Bọ

¹ Avbe eghian ivbi Juda kevbe Bẹnjamin keghi họn wẹ emwa ni ke iwe rre gha dọlegbe bọ Ọgua Osa e Nọyaẹnmwa ne Osanobua Izrẹl.

² Rhunmwuda ọnii iran keghi bu e Zerubabẹl kevbe avbe ọkaẹgbẹe, iran tama iran wẹẹ, “Wa gie ima yaba uwa bọ Ọgua Osa na. Osanobua ne uwa ga ọ re ima vbe ga, te ima wa vbe zọ ese ghe ẹre ke ne Esahadọn ne ọgbaisi Asiria ya wẹ ne ima gha dee do yin edinran gha dee.”

³ Ẹre Zerubabẹl, e Jọsua kevbe avbe ọkaẹgbẹe na tama iran wẹẹ, “Ma i mwẹ emwi na a ya iyobọ uwa ru vbe Ọgua Osa ne ima bọ ne Nọyaẹnmwa ne Osanobua ima, ma gha tobọ ima bọe zẹ vbene Sairọs ne ọgbaisi e Pẹsia tama ima.”

⁴ Ẹre emwa nii ka rre otọe ni dee na suẹn gha ye egbe wọ avbe Ju, iran kegha ye ohan mu iran, iran na gha da iran obọ owa nii ne a bọ yi.

⁵ Iran kevbe viọ igho odieke gie avbe emwa e Pẹsia ni rre asẹ vbe oga ọba ne iran mu idobo yọ. Erriọ iran wa gha ru ẹe la ẹghẹ ne Sairọs ne Ọgbaisi ya ẹe vbe ẹkete ya sẹ ẹghẹ e Dariọs ne ọgbaisi.

Idobo La Ẹmwẹ E Jerusalẹm Ne A Dọlọ Bọ

⁶ Ugbẹn vbe Zakzis ne ọgbaisi ghi da la ẹkete, eghian emwa ni rre Juda kevbe Jerusalẹm keghi gbẹnnẹ ebe rhu iran.

⁷ Erriọ vbe nọ, ẹghẹ ne Atakzaziz ne ọgbaisi e Pẹsia na vbe gha rre ẹkete, e Bislam, e Mitredat, e Tabil kevbe ivbi otu iran keghi gbẹn ebe mu gie ọgbaisi. Ẹvbo Arameik ọ re iran ya gbẹn ebe nii, Iran na wẹ ne a zedu ẹre vbe a gha tie ẹre.

⁸ Ye vbe deba ọnii, e Rehum ne ne ọ khaemwisẹ kevbe Simsiai ne ọgbaisi otọe nii kevbe gbẹn ebe na yan e Jerusalẹm mu gie Atakzaziz ne Ọgbaisi wẹẹ:

⁹ “E Rehum ne ne ọ khaemwisẹ, e Simsiai ne ọgbenbe ẹvbo, iran ne iho mwa kevbe iran ni bu ohiẹn, kevbe avbe emwa ọvbehe ni rre asẹ, avbe emwa ni ke Erek rre, kevbe Babilọn kevbe Susa vbe otọ Ẹlam.

¹⁰ Do deba avbe emwa nekpa ne Asiọbanipal nọkhua ne ovbi udu munọ hin ẹvbo iran rre, ọ na ya viọ iran ye Sameria kevbe ehe ọvbehe vbe obọ Orrie ọghe Otọe ni lẹga Yufretes, ọ re ọ gbẹn ebe na.”

¹¹ Ẹmwẹ ne ọ rre nene ebe ọ re ọna khin: “Eguọmwadia ni rre obọ orrie ọghe Otọe ni lẹga Yufretes Atakzaziz ne ọgbaisi.

¹² “Ma wẹ ne a guẹ rẹn Umogun wẹ avbe Ju ni ke otọe ruẹ ni, kevbe ehe ọvbehe rre, do yin e Jerusalẹm nian, iran gha dọlegbe bọ ẹvbo dan ne ọ sọtẹ nii. Iran suẹn gha gbe ekẹn ne ọ lẹga ẹre nẹ, ẹ i ghi rre gbe iran bọe fo.

¹³ Umogun, a gha miẹn wẹ, a dọlegbe bọ ẹvbo na kevbe ekẹn ne a gbe lẹga ẹre fo; emwa ni gha da obọ igho uhunmwu ne a zẹ mu guẹ, ẹghẹ nii, ẹfe ruẹ zẹ vbe ọba ghi do dibu.

¹⁴ Banbanna nian, rhunmwuda ighẹ te ima rre asa ọghe uwẹ ne Umogun, ma ma ho ne emwi vberriọ sunu, ọre ima ghi na zọe vbe iro nian wẹ,

¹⁵ ne a ya gualọ uwu emwi ne avbe enikaro, avbe erha a odede gbẹnnẹ yotọ. A gha ru ẹe vberriọ, u gha miẹn wẹ te ẹvbo na wa sọtẹ ẹdẹdẹmwẹdẹ, kevbe wẹ ke ẹkpo nẹdẹ gha dee, ukpokpo ọ re ọ rhie ne avbe ọba kevbe avbe ogie isi hia. Ivbi ẹvbo ni, keghi re emwa nẹ i gie a kha yan. Ọnii ọ re ọ si ẹe ne a na dunmwu ẹvbo ni uan.

¹⁶ Rhunmwuda ọnii, aro ima dae wẹ, a deghẹ a dọlegbe bọ ẹvbo na, na vbe gbe ekẹn ne ọ lẹga ẹre fo, ẹtin ruẹn ighi sọe Umogun wẹ ne u ye gha kha yan avbe otọe ẹvbo ni rre orrie Yufretes.”

¹⁷ Ọgbaisi keghi rhie ewanniẹn na gie iran: “E Rehum ne ne ọ khaemwisẹ, e Simsiai ne ọgbenbe ẹvbo, e Sameria kevbe otọe nekpa vbe odẹ Orrie ọghe Yufretes, I giotuẹ uwa.

¹⁸ “A tie ebe ne uwa gbẹn gun mwẹ nẹ, a vbe zẹ edu ẹre ma mwẹ.

¹⁹ I vbe gie nẹ wẹ ne a gualotọ ẹre, a keghi gele miẹn wẹ ke ẹkpo nẹdẹ gha dee, te Jerusalẹm wa sọtẹ ọba, kevbe wẹ etẹ kevbe ọgbẹti ọ re a miẹn vbọ.

²⁰ Avbe ọba ni mwẹ ẹtin ka vbe rriọba vbe evba yi, iran na gha kha yan ehe ne otọe Orrie Yufretes sẹe ke ne ọ rhan mwẹ hia, iran keghi vbe gha koko igho otọ.

²¹ Rhunmwuda ọnii, wa ya khama iran wẹ ne avbe emwa ni da obọ owa ne a dọlọ bọ ni yi rhinrin I te vbe do gie uhunmwu rre.

²² Wa ru emwi na ẹgiẹgiẹ ne iran ghẹ ghi fi obọ yọmwẹ unu.”

²³ A ghi wa tie ebe ne Atakzaziz ne ọgbaisi gbẹn rre na ma Rehum, e Simsiai kevbe ihua iran, iran keghi wa zẹgiẹ rhulẹ gha rrie Jerusalẹm, iran na ya da avbe Ju obọ yi vbe ẹvbo ne iran bọ.

A Vbe Dọlegbe Suẹn Iwinna Vbe Ọgua Osa

²⁴ A te da obọ iwinna yi nẹ vbe Ọgua Osa, ọ keghi da obọ yi rhinrin ya sẹ ukpo ne ogieva ne Dariọs ne ọgbaisi e Pẹsia la ẹkete.