Ẹzra 3 - Edo Bible (E Baibol Ẹdo) Version 1996

Ugamwẹ Dọlegbe Suẹn

¹ Vbene ọ ghi te sẹ odẹ uki ne ogihinrọn, ivbi Izrẹl hia keghi gbe ẹkun sẹ otọ vbe dọmwadẹ ẹvbo iran. Iyeke ọnii, iran hia keghi si egbe koko vbe Jerusalẹm.

² Ẹre Jọsua ne ovbi e Jehozadak, avbe ohẹn ne ihua ẹre kevbe Zerubabẹl ne ovbi e Sitiẹl, deba avbe etiọnrẹn hia, keghi koko dọlọ Ogiukpo ọghe Osanobua Izrẹl bọ ne iran miẹn ehe na gha giẹn emwi ne a ya zọ ese zẹ vbene a mwamwa ẹẹn ye ebe Uhi e Mosis ne ọmwa Osanobua.

³ A gha rhe miẹn wẹ ohan emwa ni gha rre otọe nii wa gha mu ivbi Izrẹl ni ke iwe rre, iran keghi ye dọlọ Ogiukpo bọ ye ehe ne ọ te kagha ye. Iran na dọlegbe suẹn gha giẹn ese vbọ ota vbe owiẹ kpẹkpẹkpẹ.

⁴ Iran kevbe ru Emwiukpo Irhu zẹ vbene a mwamwa ẹẹn yi. Ẹdẹgbegbe ọ re iran ya zọ ese ne a vbe mwa ye ẹdẹ nii.

⁵ Ye vbe deba ọnii, iran kevbe gha zọ ese ne a giẹn ikun ẹnrẹn hia, kevbe ese ne a zọ vbe ẹghẹ Emwiukpo Uki Ọgbọn, kevbe ẹghẹ ugamwẹ ni dekẹe hia ne a na si egbe koko ga e Nọyaẹnmwa; do deba avbe izọ ese ne a ya ọ kekhọerre zọ ghe Nọyaẹnmwa.

⁶ A gha rhe miẹn wẹ, iran ma he suẹn gha dọlegbe bọ Ọgua Osa, iran keghi suẹn gha giẹn ese ne Nọyaẹnmwa vbe ikpẹdẹ ne okaro ọghe uki nogihinrọn.

A Suẹn Gha Dọlọ Ọgua Osa Bọ

⁷ Emwa nii keghi zẹ igho ne a ha ne iran ni ya okuta bọ owa kevbe avbe owinna, iran keghi vbe ni evbare kevbe ayọn kevbe ofigbọn oliv, ne a viọ gha rrie Taia kevbe vbe Saidọn, ne a ya dẹlẹ erhan vbe ẹgbo e Lebanọn, kevbe ne a vbe guae la okun gha rrie Jopa. E Sairọs ne ọgbaisi ọghe Pẹsia kue yọ nẹ, a kegha ru avbe emwi na hia.

⁸ Ẹre ọ ghi na sẹ uki ne ogieva ne iran sẹ ehe ne a bọ Ọgua Osa yi vbe Jerusalẹm, iran keghi suẹn iwinna. E Jerubabẹl, e Jọsua kevbe ivbi ẹvbo iran ni dekẹe, avbe ohẹn kevbe avbe Livai, vbe ẹmwata, ne a wa kha wẹ, emwa hia ni ke iwe gha die Jerusalẹm, ehia na ku obọ gbe vbe nene iwinna. Avbe Livai hia ni ghi sẹ ọmọ ukpugie gha rrie odukhunmwu nẹ, a keghi viọ iran ye iwinna ọghe ne a dọlọ Ọgua Osa ni bọ.

⁹ E Jesua ne Livai, avbe ivbi ẹre nikpia kevbe avbe etiọnrẹn, kevbe Kadmiẹl vbe ivbi ẹre nikpia (ẹwae Hodavaia) keghi ku obọ gbe ne iran gha gbe aro ghe Ọgua Osa ne a dọlọ bọ. (Avbe Livai ne ivbi ẹwae Henadad keghi vbe gha ru iyobọ ne iran vbọ).

¹⁰ Ugbẹn vbe iran ghi suẹn gha gbe ẹyotọ Ọgua Osa nii, avbe ohẹn ni viọ ẹwu iran yọ keghi viọ okpe, iran na mudia ye ihẹ iran, avbe Livai ne ivbi uniẹn Asaf kevbe viọ ukusẹ, iran na mudia ye evba. Iran keghi rho e Nọyaẹnmwa zẹ vbene a mwamwa ẹẹn ye otọ ke ẹghẹ e Devid ne ọba gha dee.

¹¹ Iran keghi sihuan ghe Nọyaẹnmwa iran na gha rra ẹre wẹẹ, “E Nọyaẹnmwa maa, etẹbitẹ ọre aho ẹmwẹ ọmwa rẹn khin ghe Izrẹl.” Emwa hia keghi wa ya ẹtin hia gha wee, iran na gha rho e Nọyaẹnmwa rhunmwuda, a suẹn iwinna ẹyotọ Ọgua Osa ne a gbe nẹ.

¹² Ni bun vbe uwu avbe ohẹn ni khian eniwanrẹn sẹ, kevbe avbe Livai, kevbe avbe ọkaẹgbẹe rẹn Ọgua Osa nokaro. Iran ghi miẹn vbe a gbe ẹyotọ Ọgua Osa na, iran kegha viẹ ghẹ ghẹghẹ. Sokpan, emwa nekpa ni rre evba kegha we uwemwẹ oghọghọ.

¹³ A ma ghi sẹtin rẹn ne ọ ghi re urhu eve vbọ ra ne ọre urhu oghọghọ rhunmwuda, vbene iran ya gha go, te a wa gha họn nẹẹn vbe arriavbehe.