Ẹzra 10 - Edo Bible (E Baibol Ẹdo) Version 1996

Vbene A Ya Da Obọ Ikhuo Orhunmwuyẹn Ne A Rhie Yi Hẹ

¹ Vbe ẹghẹ ne Ẹzra na vbẹrre gha na erhunmwu vbe odaro Ọgua Osa, ọ na gha viẹ, ọ na vbe gha miẹn avbe orukhọ na kue, ivbi Izrẹl ni bun ẹsẹse, ikpia kevbe ibiẹka, keghi lẹga ẹre, iran na gha viẹ eve orriara.

² Ẹre Siekanaia ne ovbi Jẹhiẹl ne uniẹn Ẹlam na tama Ẹzra wẹẹ, “Ma rra uhi Osanobua nẹ, vbe ekpa ne a na ya gha viọ ikhuo orhunmwuyẹn rọnmwẹ, sokpan ọ rhe ye vberriọ, idaehọ ye rrọ ne ivbi Izrẹl.

³ “Banbanna nian, te ima gha do yan ma Osanobua mwa wẹ ma gha wẹ ne avbe ikhuo orhunmwuyẹn na, kevbe ivbi iran gha rrie. Ma gha ru vbene uwẹ kevbe avbe emwa ni ya uhi Osanobua ru emwi wẹ ne ima ru. Ma gha ru vbene uhi Osanobua khare.”

⁴ Obọ ruẹ ọ re ọ ye wẹ ne u guan ladian, ma gha yaba ruẹ, rhunmwuda ọnii nian, rhie obọ yọ ne u suẹn ọnrẹn ne a ru ẹe.

⁵ Rhunmwuda ọnii, Ẹzra keghi suẹn ọnrẹn vbene ọ na wẹ ne avbe ọkaolotu avbe ohẹn, e Livai kevbe avbe emwa nekpa, ne iran do vẹn ihẹn wẹ iran gha ru vbene Siekanaia zẹ iro ẹre.

⁶ Iyeke ọnii, ọ keghi kpao vbe odaro Ọgua Osa rre, gha rrie owa ne Jehohanan ne ovbi Eliasib dia, ọ na gbe asọn nii vbe evba, ọ na gha khiẹ ye orukhọ avbe ọyiwe nii, ọ ma re, ọ ma da.

⁷ Iran keghi wa gie uhunmwu la Jerusalẹm kevbe Juda hia, wẹ avbe ọkaolotu emwa we ne emwa ni ke iwe rre hia miẹn egbe vbe Jerusalẹm.

⁸ A deghẹ a miẹn ọmwa ne ọ ma rre ọ te ya sẹ ikpẹdẹ eha emwi ne ọ mwẹ, hia gha khian ọghe ẹvbo, a ghi vbe kaẹn fua.

⁹ Vbe uwu ikpẹdẹ eha nii, vbe ikpẹdẹ ugie ọghe uki ne ogihinrin, emwa hia ni rre otọe Juda kevbe Bẹnjamin kegha die Jerusalẹm, iran keghi do si egbe koko vbe ore Ọgua Osa, amẹ keghi wa gha da ẹsẹse, rhunmwuda ne ẹdẹ ma na rra nii, kevbe rhunmwuda ne ọ na re iko kpataki, emwa hia kegha guọ zẹzẹzẹ.

¹⁰ Ẹzra ne ohẹn keghi kpaegbe, ọ na gu iran guan ọ wẹẹ, “Wa ru orukhọ, wa kevbe do ya Izrẹl rri abe vbe ekpa ne uwa na gha viọ ikhuo orhunmwuyẹn rọnmwẹ.

¹¹ Banbanna nian, wa miẹn orukhọ uwa kue, ma e Nọyaẹnmwa ne ọ re Osanobua avbe erha odede ne uwa vbe ru emwi ne ọ yẹ ọre. Wa wannegbe hin uwu ẹbu avbe orhunmwuyẹn ni rre otọ ima rre, ne uwa vbe khulo ikhuo orhunmwuyẹn ne uwa viọ re.”

¹² Emwa ni hia keghi datu rhie ewanniẹn yọ wẹẹ, “Ma gha ru vbene u rhirhi kha.”

¹³ Sokpan iran keghi vbe rhie te ẹe wẹẹ, “Ẹvbo bun gbe, okpamẹ vbe rhọ, ma i sẹtin mudia ye adesẹ ore vbenian. Ọna i re iwinna na a gha ya ikpẹdẹ ọkpa ra eva winna rhunmwuda, ma ne orukhọ na ginna ẹn bun gbe.

¹⁴ Gie iran ni rre asẹ vbe uwu ima mudia vbe Jerusalẹm ne iran guan ye ẹmwẹ na. A ghi rhie ẹghẹ yọ ne iran ni mwẹ ikhuo orhunmwuyẹn ya lele avbe ọkaolotu kevbe ni bu ohiẹn vbe ẹvbo nii gha dee. A gha ruẹe vberriọ, a gha sẹtin miẹn wẹ ohu ne Osanobua mu ye ẹmwẹ na gha dobọyi.”

¹⁵ A ma miẹn ọmwa ne ọ gbe odan ye ẹmwẹ na gberra Jonatan ne ovbi Asahẹl kevbe Jazeia ne ovbi e Tikva, ne Mẹsiulam kevbe Siabetai ne Livai ye ẹre ike.

¹⁶ Avbe iran ni ke iwe rre keghi rhan obọ miẹn emwamwa na rhunmwuda ọnii, Ẹzra ne ohẹn keghi zẹlẹ emwa vbe avbe ọkaẹgbẹe dọmwadẹ ewae, ọ na gbẹnnẹ eni iran ye otọ. Iran keghi suẹn gha gualọ otọ emwi na vbe ikpẹdẹ ne okaro ọghe uki ne ogigbe.

¹⁷ Vbe uki eha ghi te gba, iran keghi gualọ ẹmwẹ ikhuo orhunmwuyẹn ne emwa viọ re hia miẹn fo.

Emwa Ni Viọ Ikhuo Orhunmwuyẹn

¹⁸ Eni emwa ni viọ ikhuo orhunmwuyẹn ọ re ena khin: Avbe ohẹn kevbe ẹwae ne iran ke rre: Ewae Jọsua kevbe etiọnrẹn, ivbi e Jehozadak ni rrọọ kegha re Maaseia Eliezẹ, e Jarib kevbe Gedalaia.

¹⁹ Iran keghi yan wẹ iran gha khulo amwẹ iran, iran keghi ya ogho zọ ese ye orukhọ iran.

²⁰ Ẹwae Imẹ: e Hanani kevbe Zebadaia

²¹ Ẹwae Harim: e Maaseia, Elaija, e Siemaia, e Jẹhiẹl kevbe Uzaia

²² Ewae Pasiọ: Eliọnai, Maaseia, Ismaẹl, e Netanẹl, e Jozabad kevbe Elasa

²³ Avbe Livai: e Jozabad, Simẹi, e Kelaia (rẹn a vbe tie ẹre Kelita) e Pẹtahia, e Juda kevbe Eliezẹ

²⁴ Ikpemaba: Eliasib Iran ni khẹ Ọgua Osa, e Sialọm, e Tẹlẹm kevbe Uri

²⁵ Avbe emwa ọvbehe ni dekẹe: Ewae Parọs, e Ramaia, Izia, e Malkija, e Mijamin, Eliaza, e Malkija kevbe Benaia,

²⁶ Ẹwae Ẹlam: e Matanaia, e Zẹkaraia, Jẹhiẹl, Abdi, e Jeremọt kevbe Elaija

²⁷ Ẹwae Zatu: Eliọnai, Eliasib, e Matanaia, e Jeremọt, e Zabad kevbe Aziza.

²⁸ Ẹwae Bebai, e Jehohanan, e Hananaia, e Zabai kevbe Atlai

²⁹ Ẹwae Bani: e Mẹsiulam, e Malọk, Adaia, e Jasiub, e Sieal kevbe Jeremọt

³⁰ Ewae Pahat Moab: Adna, e Kiehal, e Benaia, e Maaseia, e Matanaia, e Bezalẹl, e Binnui kevbe Manasẹ

^31-32 Ẹwae Harim: Eliezẹ, Isija, e Malkija, e Siemaia, e Simiọn, e Bẹnjamin, e Malọk kevbe Siemaria

³³ Ewae Hasium: e Matenai, e Matata, e Zabad, Ẹlifẹlẹt, e Jerimai, e Manasẹ kevbe Simẹi.

^34-37 Ẹwae Bani: e Maadai, Amram Uel, e Benaia, e Bedeia, e Kieluhi, e Vanaia, e Meremot, Eliasib, e Matanaia, e Matenai kevbe Jaasu

^38-42 Ẹwae Binnui: e Simẹi, e Siemaia, e Natan Adaia, e Maknadebai, a Siasia, e Siarai, Azarẹl e Sielemia, e Siemaria, e Sialọm, Amaraia kevbe Josẹf

⁴³ Ẹwae Nebo: e Jeil, e Matitaia, e Zabad, e Zebina, e Jadai, e Joẹl kevbe Banaia

⁴⁴ Iran na hia ọ re ọ wa viọ ikhuo orhunmwuyẹn, iran keghi khulo iran, iran na wẹ ne iran kevbe emọ ne iran biẹlẹe gha rrie.