Ẹzra 1 - Edo Bible (E Baibol Ẹdo) Version 1996

E Sairọs Wẹ Ne Avbe Ju Gha Rrie Owa

¹ Vbe ukpo ne okaro ne Sairọs ya gha re ọgbaisi e Pẹsia, e Nọyaẹnmwa keghi ru ẹe ne ẹmwẹ ne ọ la unu e Jerimaia ne akhasẹ ta do sẹ. Ọ keghi rhie ẹre ye Sairọs ekhọe, ne ọ ta ẹmwẹ na ladian, kevbe ne ọ gbẹnnẹ ọẹn ne a vbe tie ẹre ne emwa hia vbe otọe arriọba ẹre hia wẹẹ,

² “Ẹmwẹ ne Sairọs ne Ọgbaisi ọghe Pẹsia tae ọ re ọna khin, E Nọyaẹnmwa ne Osanobua ọghe Ẹrinmwi ọre ọ ya mwẹ ru nọ khaemwisẹ yan uhunmwu otọ agbọn hia, ọ kevbe ya ẹe wa iwinna mẹ wẹ ne I bọ Ọgua Osa ne irẹn vbe Jerusalẹm ne ọ rre Juda.

³ Osanobua ne ọ yaba uwa hia ni re emwa rẹn. Wa ghi do gha rrie Jerusalẹm ne uwa ya dọlegbe bọ Ọgua Osa ọghe Nọyaẹnmwa ne Osanobua Izrẹl, Osanobua ne a go wan vbe Jerusalẹm.

⁴ A deghẹ arhienso vbe uwu emwa rẹn ni rre iwe na gualọ iyobọ ne ọ gha ya dọlegbe gha rrie owa, emwa ẹdogbo ẹre ghi ru iyobọ na ne iran. Iran ghi viọ esiliva kevbe igoru ne iran, evbare kevbe aranmwẹ ne a ya kun ihẹ, deba emwi imuohan nẹ ne iran gha viọ ladian vbe Ọgua Osa ọghe Osanobua vbe Jerusalẹm.”

⁵ Ẹkpo nii, ọ re avbe ọkaẹgbẹe ni rre ẹwae ni rre Juda kevbe Bẹnjamin, avbe ohẹn kevbe avbe Livai, deba emwa ọvbehe hia ne Osanobua ghi rhie ye ọre ekhọe, na mu egbe, ne iran do ya bọ Ọgua Osa ọghe Nọyaẹnmwa ne ọ rre Jerusalẹm.

⁶ Emwa ẹdogbo iran hia keghi yi iran obọ vbene iran na viọ emwi nibun ne iran: emwi ne a ya le evbare ọghe esiliva, igoru, evbare, aranmwẹ ni mu ihẹ, emwi ewe ọvbehe kevbe emwi ne a ya mu ohan vbe Ọgua Osa.

⁷ E Sairọs ne Ọgbaisi keghi viọ avbe ọkpan kevbe ukpu ne Nebukiadneza ne ọba viọ vbe Ọgua Osa ne ọ rre Jerusalẹm, ọ na ya viọ ye aro ẹbọ ẹre, ne iran.

⁸ Ọ keghi viọ ehia, ne Mitredat, ne olotu iran ni gbe aro ghe aza ọba, rẹn na do gbẹnnẹ ehia ye ebe ne Siẹshaza, nọ khaemwisẹ yan e Juda.

^9-10 Vbe nian: ọkpan igoru ne a ya zọ ese, ọgban (30) ọkpan esiliva ne a ya zọ ese, arria isẹn (1,000) avbe ọkpan ọvbehe, ọkpairrọvbọgban (29) ọkpan igoru ne giẹrẹ, ọgban (30) ọkpan esiliva ne giẹrẹ, igbeyan arria eva (410) emwi ne a ya le evbare ni dekẹe arriaisẹn (1,000)

¹¹ Ehia kegha re ọkpan igoru kevbe esiliva arria eva yan arria isẹn isen (5,400) deba emwi ọvbehe eso ne Siẹsbaza hẹ mwẹ vbe irẹn kevbe emwi ọvbehe ni te rre iwe kpao vbe Babilọn gha die Jerusalẹm.