Ẹsta 9 - Edo Bible (E Baibol Ẹdo) Version 1996

Avbe Ju Fuẹn Eghian Iran An

¹ Ọ keghi do sẹ ikpẹdẹ ne ogiwera ọghe Ada, ẹdẹ ne a ra ru vbene ọba gie, ne eghian avbe Ju rhie ekhọe yi wẹ obọ iran gha rhanmwẹ avbe Ju. Sokpan, ne ọ gha na te gha yerriọ, obọ avbe Ju keghi ke ukhunmwu ne iran.

² Ehe ne avbe Ju ye vbe dọmwadẹ ẹvbo, iran keghi koko mu egbe ne iran ya gu ọmwaikọmwa ne ọ te ra ru iran emwi gbinna. Ohan iran kegha mu emwa hia vbe ehe hia. A ma vbe miẹn ọmwa ne ohan gie ẹe mu aro igbinna da iran.

³ Vbe ẹmwata, avbe emwa hia ni ghi rre ukpo asẹ vbe iyaẹvbo hia, avbe nikhaemwisẹ, eghaẹvbo, ukọ ọba, keghi yi avbe Ju obọ, rhunmwuda ohan e Modekai mu iran.

⁴ Agbọn hia keghi wa rẹn vbe otọe arriọba ni hia fẹẹrẹ wẹ ọmwa ne ọ mwẹ ẹtin ọre Modekai ghi khin vbe ẹguae, kevbe wẹ te ẹtin ẹnrẹn dọlegbe kpọlọ yọ.

⁵ Rhunmwuda ọnii, avbe Ju sẹtin ru avbe eghian iran emwi ne ọ khọn iran. Iran keghi ya umozo yan iran, iran na rẹnkhẹn iran an.

⁶ Vbe Susa ne ọ re igiogbẹ tobọ ẹre, avbe Ju keghi gbele arhin iyisẹn isẹn (500).

^7-10 Eso vbe usun emwa ne iran gbele kegha re igbe vbe ivbi e Haman ne ovbi e Hamedata, avbe eghian avbe Ju ighẹ Pasiandata, e Dalfọn, Aspata, e Porata, Adalaia, Aridata, e Pamasta, Arisai, Aridai kevbe Vaizata. Sokpan, iran ma fu emwi rhọkpa viọ.

¹¹ Vbe ẹdẹ ne ẹdẹrriọ zẹẹ, iran keghi ya na iyẹn uwu emwa ne a gbele vbe Susa ma ọba.

¹² Rẹn keghi tama Ẹsta ne Oloi wẹẹ, “Arhin iyisẹn isẹn (500) ọre avbe Ju gbele vbe Susa ọkpa kẹkan, deba ivbi e Haman igbe, vbe ọ ghẹ ghi wa gha ye hẹ vbe avbe iyaẹvbo! De emwi ne u ghi ye ho nian? Ọ gha sẹ uẹ obọ. Tama mwẹ emwi ọvbehe ne u ho, o gha se ue obọ.”

¹³ Ẹsta keghi wanniẹn wẹẹ, “A deghẹ ọ yẹ ruẹ Umogun, gie avbe Ju ni rre Susa vbe ru emwi ne iran ru ẹre na vbe ẹdẹ nakhuẹ, ne iran silo ikun ivbi e Haman igbigbe rrọ ye erhan ne a si emwa rrọ yi.”

¹⁴ Ọba keghi wẹ ne iran ru emwi na, a keghi ya ẹe wewe vbe Susa. A keghi viọ ikun ivbi e Haman igbigbe rrọ ye aza ne emwa miẹn.

¹⁵ Vbe ikpẹdẹ ne ogiwenẹ ọghe Ada avbe Ju ni rre Susa kevbe dọlegbe si egbe koko, iran na dọlegbe gbele arhin iyisẹn eha (300) ọvbehe ba ẹre vbe ore ẹvbo nii. Sokpan, iran ma vbe fu emwi viọ.

¹⁶ Avbe Ju ni rre iyaẹvbo kevbe si egbe koko, iran na gbinna ne egbe iran, iran keghi wabọ avbe eghian hin ehe ne iran ye rre, vbene iran na gbele arhin arria isẹn isen irrọvbe iyenẹ (75,000) ni khuiwu iran, sokpan, iran ma fu emwi viọ.

¹⁷ Ọna kegha re ikpẹdẹ iwera vbe Ada. Vbe ikpẹdẹ ne ọ lele ẹe ne ọ re ikpẹdẹ iwenẹ, iran ma ghi gbele emwa. Iran keghi lo ẹre zẹ vbe ẹdẹ oghọghọ ne a na re kevbe ne a na da.

¹⁸ Sokpan, ikpẹdẹ ekesugie ọ re avbe Ju ni rre Susa ya ru ne a ya kẹtin, rhunmwuda, ikpẹdẹ iwera kevbe ikpẹdẹ iwenẹ, ọ re iran ya gbele avbe eghian iran, iran keghi da obọ yi vbe ikpẹdẹ ekesugie.

¹⁹ Ọnii ọ sii ẹe ne avbe Ju ni re ivbi ẹvbo ne a giere na na ya ikpẹdẹ ne ogiwenẹ ọghe uki Ada hẹwẹ, iran ghi vbe gha ghọghọ ẹdẹ ne a ya re kevbe ne a ya da, kevbe ne a ya ye evbare zẹ ọhẹ gie egbe.

Emwiukpo E Purim

²⁰ E Modekai keghi gbẹnnẹ avbe emwi na ye otọ, ọ keghi vbe gbẹnnẹ ebe gie avbe Ju ni sikẹ owa kevbe ni rre urria vbe Otọe Arriọba e Pẹsia hia wẹ,

²¹ ne iran gha ya ikpẹdẹ ne ogiwera, kevbe ne ogiwenẹ vbe uki Ada hẹwẹ ukpo ukpo.

²² Ọna kegha re ẹdẹ ne avbe Ju fuẹn avbe eghian iran vbene iran na rhie iran obọ hin ẹkun rre, ọna kegha re uki ne a fiwerriẹ ke vbe ọghe akhiẹ kevbe iro han ọmwa rre khian ọghe oghọghọ kevbe ọyẹnmwẹ. A keghi tama iran wẹ ne iran gha ya evbare ne a re ya ghọ egbe ye ẹdẹ ne ẹdẹrriọ rre, deba evbare ne a le fian gie egbe kevbe ne a tie emwa ọvbehe sẹ owa yi, a ghi vbe gha rhie ne avbe ivbiogue.

²³ Rhunmwuda ọnii, avbe Ju keghi ru vbene Modekai khare, ọ keghi do khian emwi ukpo ne a ru ukpo ukpo.

²⁴ E Haman ne ovbi e Hamedata ne ovbi uniẹn Agag, ọmwa ne ọ re eghian avbe Ju keghi yan uta (e Purim ọre iran tie ẹre) ne ọ ya rẹn ẹdẹ ne irẹn gha fuẹn avbe Ju rua, rhunmwuda, te irẹn te wa mwamwa ẹn wẹ ne iran wu gbe ero.

²⁵ Sokpan, Ẹsta keghi ya miẹn ọba, ọ re ọba na gbẹn ebe sẹrriọ ne a ghi na miẹn wẹ e Haman ọ re ọ ghi ya uhunmwu mu emwi ne ọ mwamwa ẹn vbe egbe avbe Ju, a kevbe silo irẹn vbe ivbi ẹre rrọ ye erhan ne a silo emwa rrọ yi.

²⁶ Ọnii ọ sii ẹe ne a na tie avbe irhiẹdẹ na e Purim, emwi ne iran yae kha ọrọre “Uta.” Rhunmwuda ebe ne Modekai gbẹn na, kevbe rhunmwuda emwi ne ọ sunu vbe egbe iran hia.

²⁷ Avbe Ju keghi yi uhi ye otọ ne egbe iran, ivbi uniẹn iran, kevbe avbe emwa ni gha dẹ egbe la e Ju wẹ ọ gha sẹ ẹghẹ ọre, a ghi gha ru emwi ukpo ikpẹdẹ eva na ukpo ukpo, zẹ vbene Modekai khare.

²⁸ Iran keghi tae mu olọ yan rẹn wẹ, uniẹn avbe Ju hia vbe ẹdẹnakhuẹ vbe uhunmwu iyaẹvbo hia, kevbe dọmwadẹ ẹvbo, ghi gha ya ẹdẹ e Purim rre, ne iran gha ru emwiukpo ẹre vbe ẹdẹ ne ọ de hia.

²⁹ Ẹre Ẹsta ne Oloi, ne ovbi Abihẹl, kevbe Modekai, na do gbẹn ebe vbe eni irẹn, ọ na rhie asẹ hia ne eni ẹnrẹn mwẹ yọ, ye ẹmwẹ e Purim ne Modekai ka vbe gbẹn ebe ẹre yi.

³⁰ Avbe Ju hia ọ re a gbẹnnẹ ebe nii gie, a keghi gha ẹre gba iyaẹvbo ihinrọn yan iyehan (127) ne ọ rre Otọe Arriọba e Pẹsia. Ọ keghi na erhunmwu ọfumwegbe kevbe ẹkun ne ọ sotọ gie avbe Ju.

³¹ Ọ na tama iran wẹ ne iran kevbe ivbi uniẹn iran, ne iran gha ru emwiukpo a Purim vbe ẹghẹ ọre, zẹ vbene iran vbe da obọ mu ẹmwẹ ẹghẹ ne a ya yo aguẹ kevbe ẹghẹ akhiẹ. Ẹsta ne Oloi kevbe Modekai, ọ re ọ gba gbẹn uhi na ne iran.

³² Iyi ne Ẹsta yi, ne ọ ya rhie obọ ye ẹmwẹ uhi e Purim yi ẹre okhi, a keghi gbẹn ọẹn ye ebe ohian ne a kii.