Ẹsta 8 - Edo Bible (E Baibol Ẹdo) Version 1996

A Tama Avbe Ju Wẹ Ne Iran Gbinna

¹ Vbe ẹdẹ ne ẹdẹrriọ zẹẹ, ọba na wẹ rẹn ya emwi ne Haman ne eghian avbe Ju mwẹ hia ne Ẹsta ne Oloi. Ẹsta keghi tama ọha wẹ ọtẹn irẹn ọre Modekai khin, ke ẹghẹ ni kpao, a keghi kue ne Modekai do gha sẹ ehe ne ọba ye.

² Ọba keghi yuo oroka ne ama asẹ ọre ye hin obọ rre (ọ miẹn e Haman ẹre nẹ) ọ na rhie ne Modekai. Ẹsta na wẹ ne Modekai gha gbe aro ghe emwi ne Haman mwẹ.

³ Ẹsta keghi dọlegbe gu ọba guan. Ọ degbe otọ vbe akharha ẹre, ọ na gha viẹ. Ọ rinmwian ẹn wẹ ne ọ gualọ odẹ la da obọ iro dan ọghe Haman ne ovbie Agag zẹẹ ghe avbe Ju.

⁴ Ọba keghi ne isẹn ọkpọ igoru ọghe ọba da ẹre, rẹn keghi kpaegbe, ọ na kha wẹẹ,

⁵ “Adeghẹ ọ yẹ ruẹ Umogun, a deghẹ u gele mu ẹmwẹ mwẹ ro, a deghẹ ọ vbe kei vbe aro ruẹ, lahọ, tae ne a ya ẹe wewe ẹe la ehe hia wẹ ne a ghẹ ghi mu ẹmwẹ dan ne Haman tae sẹ, ẹmwẹ dan ne ovbi e Hamedata ne ovbi Agag tae wẹ ne a fuẹn avbe Ju ni rre otọe arriọba na hia a.

⁶ Vbia ra ru hẹ, a deghẹ emwi dan na sunu vbe egbe emwa mwẹ, a na vbe gbele avbe etẹn mwẹ.”

⁷ E Kzakzis ne ọba keghi tama Ẹsta ne Oloi kevbe Modekai ne Ju wẹẹ, “Ghe, I si e Haman rrọ nẹ rhunmwuda iro dan ne ọ zẹe ghe avbe Ju, I kevbe viọ emwi ẹnrẹn hia ne Ẹsta,

⁸ sokpan, ẹmwẹ ne a ya eni ọba wewe ladian nẹ, a na vbe mu ama asẹ ọghe ọba gbe ẹe nẹ, ẹ i gie a fiwerriẹ. Sokpan, u sẹtin ya eni mwẹ gbẹn emwi ne ọ khọn ruẹn gie avbe Ju ne u vbe mu ama ọghe ọba gbẹe.”

⁹ Ikpẹdẹ eha yan ugie vbe uki ne ogieha ne a tie ẹre Sivan, ọre emwi na na sunu. Modekai keghi tie avbe ọgbenbe ọba, ọ na talọ ẹmwẹ ne iran gha gbẹnnẹ ye ebe gie avbe Ju ma iran gha gbẹnnẹ ye otọ, kevbe gie avbe ni khaemwisẹ, avbe eghaẹvbo, kevbe iran ne ẹwae ọba ni rre iyaẹvbo ihinrọn yan iyehan ni ke India ya sẹ e Sudan.

¹⁰ E Modekai keghi ye ẹvbo ne iran zẹ gbẹnnẹ ọẹn gie dọmwadẹ iyaẹvbo, kevbe vbene iran ya gbẹn ebe iran. Ọ kevbe gbẹnnẹ gie avbe Ju vbe ẹvbo ne iran zẹ kevbe vbene iran ya gbẹnnẹ emwi yotọ hẹ, vbe eni Kzakzis ọ keghi vbe mu ama asẹ ọghe ọba gbe ẹe.

¹¹ Ebe na keghi kha wẹ ọba gha kue ne avbe Ju ku obọ gbe avbe otu otu vbe dọmwadẹ ehe ne iran ye, ne iran ya gbinna ne egbe iran. A Deghẹ ivbi ẹvboikẹvbo ne ọ rhirhi a gha khin ghi do hẹ rhu uwa kevbe iran kevbe emwi igbinna vbe obọ, wa ghi gu iran gbinna, ne uwa rẹnkhẹn iran an, kevbe amwẹ iran, kevbe ivbi iran. Iran sẹtin wa gbele iran vbene ọkpa ighi na vbe ke ẹe vbọ, iran ghi vbe viọ emwi ne iran mwẹ.

¹² Ẹmwẹ na, te a wẹ ne a mu ẹẹn sẹ la Otọe Arriọba e Pẹsia hia. Vbe ẹdẹ ne iran mwamwa ye otọ ne iran ya gbele avbe Ju, ọnii nọ wẹ ikpẹdẹ ne ogiwera ọghe uki Ada ne ọre uki ne ogiweva.

¹³ Te a ra ya ẹe wewe zẹ vbe uhi, a ghi vbe tae ma emwa hia ni rre dọmwadẹ otọe arriọba, ne avbe Ju miẹn ehe na rria avbe eghian iran ikhi vbe ọ gha sẹ ẹdẹ ne ẹdẹrriọ.

¹⁴ Ugbẹn vbe ọba ghi tae nẹ, iran ni hin ẹsin keghi viọ ẹsin ọba iran na vinnọ la odẹ vbe ulẹ ọbanban. A kevbe wewe uhi na vbe adesẹ ore Susa ne igiogbẹ otọe ni.

¹⁵ Emwi ne Modekai hẹ ye egbe ladian vbe ẹguae kegha re ẹwu ọba ne a ya eto ovbiohuẹ ododo se, ọ kevbe mu ẹde igoru ne mose mose rhuẹ. Ọre Susa hia na gha we ne ẹẹn bọọ.

¹⁶ Ẹko avbe Ju keghi vuọn ne oghọghọ ọghe a fe vbe iwe, ọyẹnmwẹ kevbe akhọnmiotọ.

¹⁷ Ehe ne a rhirhi na tie ẹmwẹ ne ọba tae na, vbe avbe ore nekhua kevbe iyaẹvbo, avbe Ju ghi zobọ vbe iwinna, iran ghi ya oghọghọ titi ẹe deba ọyẹnmwẹ. Vbe ẹmwata, emwa ni bun ọvbehe keghi degbe la e Ju rhunmwuda te ohan iran ghi mu iran.