Ẹsta 7 - Edo Bible (E Baibol Ẹdo) Version 1996

¹ Ẹre Ọba kevbe Haman na gba gha khian ne iran ya gu Ẹsta ne Oloi rri evbare ukpogieva.

² Ehe ne iran na da ayọn ni ọba keghi nọ rẹn ukpogieva wẹẹ, “Ẹsta ne Oloi, de emwi ne u ho? Tama mwẹ, ọ gha sẹ uẹ obọ, I gha sẹtin ghae otọe arriọba mwẹ mu obọkpa vbọ ne uẹn.”

³ Ẹsta ne Oloi keghi wanniẹn wẹẹ, “A deghẹ ọ yẹ ruẹ Umogun ne u ru mẹ vbene I nọ rẹn, emwi ne I ho ọrọre wẹ ne a gie imẹ kevbe emwa mwẹ di agbọn ya.

⁴ Ke imẹ kevbe emwa mwẹ, a khiẹnnẹ ima nẹ wẹ ne a gbele ima an. Akpawẹ te a khiẹnnẹ ima kua kevbe a ya gha re eviẹn emwa ọvbehe, I ghẹ zẹdẹ kpokpo uẹ, I gha hẹko hunwan, sokpan, te a ghi ra fuẹn ima an na, ne ima wa wu gbe ẹro.”

⁵ Ẹre Kzakzis ne ọba na nọ Ẹsta wẹẹ, “De ọmwa ne ọ ra din ru egbe emwi vberriọ yi? Nene ọmwa vbo yi?”

⁶ Ẹsta keghi wanniẹn wẹẹ, “Oghian ima ne ọ zẹ ima kpokpo ọrọre ọmwa dan na ighẹ Haman.” E Haman keghi ye ohan nọkhua bolo aro a gha ghe ọha kevbe Oloi.

⁷ Ọba keghi ye ohu nọkhua gua kpao, ọ keghi ladian vbe uwu owa, ọ na gha rrie ogba ne a na rhie ẹhoho vbe uwu ẹguae. E Haman bẹghe ẹre nẹ wẹ ọba gha rri irẹn oya ye emwi na, rẹn keghi rhunmwuda ọnii mudia ne ọ rinmwian Ẹsta ne Oloi wẹ ne a ghẹ gbe irẹn ruan.

⁸ Rẹn ghi wa deguo ye aga nọkhua ne Ẹsta tota yi ne ọ rinmwian ẹn wẹ ne ọ tohan irẹn. Ọba na wa dọlegbe ke uwu ogba la owa, Ọba ghi wa bẹghe ẹre vberriọ ọ keghi datu wẹẹ, “Te oko na ra wa vbe sirra mwẹ gha mu Oloi yagha vbe ehe ne imẹ ye vbe ẹguae mwẹ ra?” Ọba ma he ta ẹmwẹ na fo vbe avbe ọghẹrriẹnoguan mu emwi gue Haman uhunmwu.

⁹ Ọkpa ne a tie ẹre Habona vbe uwu iran keghi kha wẹẹ, “E Haman ru emwi na sẹrriọ wẹ, ọ ru erhan ne a si ọmwa rrọ yi ye owa ẹre, wẹ ne irẹn si e Modekai ni ne ọ miẹn uwẹ ne Umogun fan, rrọ yọ? Ibata ekigbesiyenẹ ọre wa nọ vbe uyomwẹ.”

¹⁰ Ọba keghi kha wẹẹ, “Wa si e Haman rrọ yọ!” x e Haman rrọ ye erhan ne ọ yo ne a si emwa rrọ yi ne ọ te gba ye otọ khẹ Modekai. Ẹre ohu ọba ghi na rriotọ.