Ẹsta 6 - Edo Bible (E Baibol Ẹdo) Version 1996

Ọba Mu Egie Ne Modekai

¹ Vbe asọn ne a kha na, ọba ma miẹn ovbe, ọ na wẹ ne a mu ebe ne a gbẹnnẹ emwi ni sunu vbe otọe arriọba yi rre ne a do gha tie ẹre ma iran.

² Ehe ne iran tie vbọ, usun ẹmwẹ ni rrọọ kegha re vbene Modekai ya rẹn ekhuan ne iran khuan khẹ ọba ne iran gbe ẹe rua hẹ, ekhuan ne Bigtana kevbe Tẹrẹs avbe eghẹrriẹnoguan eva ni khẹ onurho ọba khuan khẹ ọre.

³ Ọba keghi nọ wẹẹ, “De emwi ne ima he ru ya mu uyi yọ ọre egbe ne asan ẹre ẹse ye emwi na ighẹ Modekai.” Avbe eguọmwadia ẹre keghi wanniẹn wẹẹ, “A ma ru emwi rhọkpa ne ẹẹn.”

⁴ Ọba keghi nọ wẹẹ, “Irriegie mwẹ rhọkpa rre ẹguae ra?” Vbe ẹghẹ ne a kha na te Haman he wa da la ẹguae ne ọ do khama ọba wẹ ne a si Modekai rrọ ye ehe ne a si emwa rrọ yi ne irẹn ru ye otọ.

⁵ Eguọmwadia ni keghi tama ọba wẹẹ, “E Haman rre emwa na, ọ ho ne ọ miẹn ọẹn.” Ọba keghi kha wẹẹ, “Wa tama rẹn ne ọ la owa.”

⁶ Ẹre Haman na la owa. Ọba keghi tama rẹn wẹẹ, “Ọmwa ọkpa rrọ ne i ho ne I i mu uyi ye ọre egbe. Vbe I a gha ru ne ọmwa na?” E Haman keghi rorọe vbe ekhọe ẹre wẹẹ, “De ọmwa ne ọba ho ne ọ mu uyi ye ọre egbe na yi? Mẹ wa nọ.”

^7-8 Rẹn keghi rhunmwuda ọnii wanniẹn ọba ẹmwẹ wẹẹ, “Wẹ ne iran viọ ukpọn ọba rre ukpọn ne uwẹ tobọ ruẹ hẹ ye egbe. U ghi mu emwi itegbe ọghe ẹrọnmwọ ne ọba lo ye ẹsin uwẹ tobọ ruẹ uhunmwu.

⁹ U ghi wẹ ne ọkpa vbe uwu iran ne ukpo ẹre yo sẹẹ vbe ekhaẹmwẹ ruẹn ya mu ọmwa na egbe, ne a ya ẹsin na mu ẹẹn ya lẹga vbe ore ẹvbo. Ọkhaẹmwẹ ni ghi tae vbe iran a gha khian wẹ, ‘Wa ghe vbene ọba san ọmwa ne ọ ho ne ọ mu uyi ye ọre egbe ẹse hẹ!’ ”

¹⁰ Ẹre ọba ghi na tama e Haman wẹẹ, “Zẹgiẹ ya viọ nene ukpọn kevbe ẹsin ne u ya mu uyi ye Modekai ne Ju egbe. Wa ru avbe emwi ne u tae nii hia ne ẹẹn. U gha miẹn ọẹn vbe ọ tota ye onurho ẹguae.”

¹¹ Ẹre Haman na ya viọ ẹwu kevbe nene ẹsin. Ọ keghi hẹ ẹwu ni ye Modekai egbe. E Modekai keghi hin nene ẹsin, ẹre Haman na rhie ẹre la ore ẹvbo nii, ọna gha tama emwa nii vbe ehe ne ọ na rhie ẹre khian nii wẹẹ, “Wa ghe vbene ọba san ọmwa ne ọ ho ne ọ mu uyi re ọre egbe ẹse hẹ.”

¹² E Modekai keghi werriegbe gha rrie onurho ẹguae, vbene Haman na zẹgiẹ gha rrie owa. Ekhue keghi mu ẹẹn sẹrriọ wẹ te ọ ghi viọ obọ gue aro.

¹³ Ọ keghi na iyẹn emwi ne ọ sunu vbe egbe irẹn ma amwẹ ọnrẹn kevbe avbe esiọre. Okhuo nii kevbe avbe esiọre ni wan ni keghi tama rẹn wẹẹ, “U hẹko laghe iyeke ne Modekai khian nẹ. E Ju rẹn khin, obọ ruẹ i sẹtin ke ukhunmwu ne ẹẹn. Vbene a i na gba awẹawẹ, ọ gha ma ruẹn.”

A Gbe Haman Ruan

¹⁴ Te iran he ye guan vbe avbe ọghẹrriẹnoguan ni rre ẹguae do zẹgiẹgiẹ rhie Haman kpao gha rrie ehe ne Ẹsta na le evbare khẹ iran.