Ẹsta 4 - Edo Bible (E Baibol Ẹdo) Version 1996

E Modekai Nọ Ẹsta Iyobọ

¹ E Modekai ghi họn avbe emwi na hia ni sunu, ọ keghi sọ ukpọn ye egbe ẹre ẹkun, ọ keghi viọ ukpọn akhiẹ yọ, ọ keghi zẹ emuẹn yan uhunmwu, ọ keghi khian la ẹvbo nii lẹga vbene ọ na wa kpe orhu eve orriara.

² Rhinrin ọ te do sẹ urho ẹguae. Ọ ma la owa rhunmwuda, a i kue ne ọmwa ne ọ yọ ukpọn akhiẹ la uwu ẹre.

³ Ehe ne otọe ni lae ehe ne ọ rhanmwẹ, ehe ne a ghi na wewe ẹmwẹ na, eve orriara kegha rrọọ vbe uwu ẹbu avbe Ju. Iran kegha yo aguẹ, iran na gha viẹ, iran na gha go, ni bun vbe uwu iran kegha viọ ukpọn akhiẹ ye egbe, iran na lovbiẹ ye uwu emuẹn.

⁴ Ugbẹn vbe eguọmwadia ikhuo ni gue Ẹsta kevbe avbe ọghẹrriẹnoguan ghi tama rẹn emwi ne Modekai ru, orhiọn rẹn ma ghi sotọ. Ọ keghi viọ ukpọn eso gie Modekai ne ọ ya bannọ ukpọn akhiẹ kua, sokpan, ọ ma viọ.

⁵ Ọ keghi tie Hatak, ọkpa vbe uwu ọghẹrriẹnoguan ne ọba viọ nẹẹn zẹ vbe eguọmwadia, ọ na gie ẹe bu e Modekai ne ọ ya nọ rẹn emwi ne iran ru, kevbe emwi ne ọ sii ẹe.

⁶ E Hatak bu e Modekai gha rrie iro ẹvbo ni, vbe onurho ẹguae.

⁷ E Modekai keghi talọ emwi ne ọ sunu vbe egbe irẹn ma rẹn kevbe inu igho ne Haman khare ighẹ rẹn gha mu ye aza ẹguae, a deghẹ a gbele avbe Ju hia a.

⁸ Ọ keghi rhie ọkpa ne Hatak vbe ebe ne a gbennẹ mu ladian vbe Susa wẹ ne wa fuẹn avbe Ju hia a. E Modekai na tama rẹn wẹ ne ọ rhie ebe ni ne Ẹsta, ne ọ vbe rhan otọ vbene emwi hia ye hẹ ma rẹn, ne ọ tama rẹn wẹ ne ọ bu ọba gha khian, ne ọ ya rinmwian wẹ ne ọ tohan emwa rẹn.

⁹ E Hatak keghi wa ru emwi na vberriọ.

¹⁰ Ẹsta kevbe gie ẹre uhunmwu ne ọ khama e Modekai wẹẹ,

¹¹ “A deghẹ ọmwaikọmwa la odẹ ugha vbe ẹguae, ọ na ya miẹn ọba vbe ne a ma na gie na a tie ẹre, te a gbe ọmwa nii uan, ọ re okpia na nọ ra okhuo nọ. Uhi ne ọ rrọọ ọ re ọnii khin, emwa hia wa rẹn ọna ke egbe avbe iguọbaziro kpao ya sẹ egbe avbe emwa ni rre iyaẹvbo hia. Odẹ ọkpa ne a na sẹtin lẹ uhi na fe ọrọre wẹ, a deghẹ ọba ghi niẹn ọkpọ igoru ẹre da ọmwa nii, a i ghi gbe ẹe rua sokpan uki hoho ọ re ọ ghi ye na ne ọba ghi gie na a tie mwẹ sẹ.”

¹² E Modekai ghi họn uhunmwu ne Ẹsta gie gie ẹe,

¹³ ọ gie ne a tama rẹn wẹẹ, “Ghẹ gha ro ighẹ emwi rhọkpa i ra ru uwẹ vbe emwi ne ọ rruan avbe Ju na rhunmwuda ighẹ u rre uwu ẹguae.

¹⁴ U gha hunwan vbe ẹghẹ ne ọ ye vbenian na, iyobọ gha ke ẹrinmwi bu avbe Ju rre, iran ghi miẹn uhunmwu, sokpan wẹ gha wu, deba ẹre ẹgbẹe erha a ghi gbe ero, sokpan, u rẹnrẹn wẹ ẹ i gie a rẹn ọ gha kẹe egbe ẹghẹ vbenian ọ re ọ zẹe ne a na ya ma Oloi!”

¹⁵ Ẹsta keghi rhie ewanniẹn na gie Modekai wẹẹ,

¹⁶ “Ye si avbe Ju ni rre Susa hia koko, wa yo aguẹ ne uwa gha na erhunmwu mẹ. Wa ghẹ re wa ghẹ da la avan eha kevbe asọn eha. Me kevbe ibiẹka ikhuo ni re eguọmwadia mwẹ, gha vbe ru vberriọ. Vbe iyekọni, I gha bu ọba gha khian, a gha rhe miẹn wẹ uhi ma kha vberriọ. A deghẹ te I gha ghi ye uhunmwu khiẹ ọre rhunmwuda ne I na ru vberriọ, a gunmwẹ ye uhunmwu khiẹ ọre.”

¹⁷ Ẹre Modekai ghi na kpao ọ na ya ru emwi hia ne Ẹsta tama rẹn wẹ ne ọ ru.