Ẹsta 3 - Edo Bible (E Baibol Ẹdo) Version 1996

E Haman Mwamwa Ẹn Ne Ọ Gbele Avbe Ju Hia A

¹ Ọ ghi kpee fua kherhe, e Kzakzis ne ọba keghi rhie okpia ọkpa ne a tie ẹre Haman ye ukpo iyasẹ. E Haman na kegha re ovbi e Hamedata ne ovbi uniẹn Agag.

² Ọba keghi tama avbe irriegie ẹre hia wẹ ne iran gha diguẹ vbokho uhunmwu rriotọ ya gha rhie ọghọ ne ẹẹn. Iran hia keghi gele gha ru vberriọ sokpan e Modekai ne ọ khare wẹ rẹn i ru ẹe.

³ Avbe irriegie nekpa ni rre oga ọba keghi gha nọ rẹn otọ emwi ne ọ ọ sii ẹe ne ọ ma na họn ẹmwẹ ọba.

⁴ Iran keghi kpikpi ẹe ẹdẹgbegbe wẹ ne ọ ru vberriọ, sokpan, ọ ma zẹ ye iran ẹre, ọ wẹẹ, “E Ju ọre imẹ khin, I i sẹtin ya uhunmwu rhanmwẹ otọ ne Haman.” Iran keghi ya ta ẹmwẹ na ma e Haman, iran na gha ghe a deghẹ ẹ i miẹn emwi ru e Modekai re yọ.

⁵ E Haman ghi miẹn wẹ e Modekai ma mu egbe ne ọ gha ya diguẹ vbokho uhunmwu rriotọ ne irẹn, okuosu keghi rre ọe.

⁶ Ọ ghi họn wẹ e Ju nọ, ọ na kha wẹ ẹ i re Modekai ọkpa rẹn gha rri ọre oya, ọ na ya mwamwa ẹn wẹ ne irẹn gbele ivbi e Ju hia ni rre otọe Arriọba e Pẹsia.

⁷ Ọ ghi rre ukpo nogiweva ne Kzakzis rriọba, vbe uki ne okaro ne a tie ẹre Nisan, e Haman na wẹ ne a yan uta (e Purim ọ re iran tie nene emwi) ya gualọ, ẹghẹ ne ọ kei yi ne irẹn gha ya mu emwamwa dan irẹn sẹ. Iran keghi do bu ẹre ye ikpẹdẹ ne ogiwera vbe uki ne ogiweva ne a tie ẹre Ada.

⁸ E Haman keghi bu ọba ya tama rẹn wẹẹ, “Ivbi ẹvbo eso rre otọe ruẹ na, iran tagha gba otọe na hia, a i vbe miẹn iyaẹvbo ne a i na miẹn iran, ilele ẹvbo iran ma zẹdẹ gu ọghe ẹvbo ọvbehe rhọkpa ro vbe otọe na. Ye vbe sẹ ọnii, iran i ye uhi ẹvbo na ru emwi, rhunmwuda ọnii, ẹ i re emwi ne ọ gha fu egbe a deghẹ a sẹ iran rae.

⁹ A deghẹ ọ yẹ ruẹ Umogun, wa tae wẹ, ne a gbele iran an. U gha tae vberriọ, mẹ yan rẹn nian wẹ I gha mu etọni esiliva ekesọgban irrọvbe arria eva (375) ye otọ vbe aza ẹguae ne a ya gha winna iwinna otọe arriọba na.”

¹⁰ Ọba keghi yuo oroka ne irẹn rhie ye obọ, ne a ya yi ama ye ẹmwẹ ne ọ tae, ne a miẹn ehe na tie ẹre ẹmwata, ọ na rhie ne eghian avbe Ju ighẹ Haman ne ovbi e Hamedata ne uniẹn Agag.

¹¹ Ọba keghi tama rẹn wẹẹ, “Ke emwa nii, kevbe igho ne iran mwẹ, ya gha rae, emwi ne ọ ghi khọn ruẹn, ru iran ẹre.”

¹² Ọ ghi sẹ ikpẹdẹ ne ogiwera ọghe uki ne okaro, e Haman keghi tie avbe ọgbenbe ọba, ọ na gha guan ne iran wa gha gbẹn ọẹn vbene irẹn ya tae nii, ẹmwẹ ne ọba tae, ne a gha vbe zedu ẹre ye ẹvbo ne a zẹ ke odẹ ne a ya gbẹnnẹ emwi ni rre otọe arriọba nii hia ne a viọ gie avbe irriegie ni khaemwisẹ, kevbe ewọe ọba hia. Eni e Kzakzis ọ re a ya ta ẹmwẹ na, a na ya oroka ẹre yi ama asẹ yọ.

¹³ Iran keghi viọ ne emwa ni rhulẹ, ne iran viọ ẹre gba iyaẹvbo ni rre otọe arriọba nii hia. Emwi ne a gbẹn yọ ọrọre wẹ, a rhie ẹdẹ ọkpa ye otọ, ọnii nọ wẹ ikpẹdẹ ne ogiwera ọghe Ada, a ghi gbele avbe Ju hia kevbe ọmaẹn kevbe ẹghele, ikpia kevbe ikhuo, a wẹ ne a gbele iran an, vbe ne a i na vbe tohan ọmwa, wa ghi vbe viọ emwi iran hia.

¹⁴ Emwi ne a wẹ ne a ya wewe na, a ghi gie emwa hia họn ẹn vbe avbe iyaẹvbo hia, ne emwa hia miẹn ehe na mu egbe ye otọ vbe ọ gha sẹ ẹdẹ ne ẹdẹrriọ.

¹⁵ Zẹ vbene ọba khare, ọ keghi ya ẹmwẹ na wewe vbe Susa ne igiogbẹ ẹvbo ni, iran ni rhulẹ keghi rhie iyẹn ni gha rrie dọmwadẹ iyaẹvbo. Ọba kevbe Haman keghi tota, iran na gha da ayọn, vbene adesẹ ore ẹvbo ni na khian ne a fian otighi fi.