Ẹsta 1 - Edo Bible (E Baibol Ẹdo) Version 1996

E Vasti Ne Amwẹ Ọba Fa Kzakzis Ne Ọba A

^1-2 Ẹkete Ọba ẹre, ne ọ tota yi vbe Susa ne igiogbẹ otọe ẹvbo Pẹsia ọ re Kzakzis ne ọba kegha khaemwisẹ yan agbọn ẹvbo ihinrọn yan iyehan (127), ke India ne gban an gha dee do sẹ e Sudan.

³ Ọ ghi rre ukpo eha ne ọ rriọba, ọ keghi do le evbare tie avbe iran ni rre asẹ kevbe eghaẹvbo ẹre hia sẹ owa. Ivbiyokuo e Pẹsia kevbe Midia keghi vbe gha rre evba, erriọ vbe nọ ne iran ni khaemwisẹ kevbe avbe egbesẹmwegie ni rre otọe nii hia.

⁴ Uki ehan gbalaka ọ re ọ wa ya gha viọ ẹfe ni rre ẹguae ma emwa deba oyọnyọn kevbe uyi ẹkpẹn ọnrẹn.

⁵ Vbe iyeke ọnii, ọba keghi le evbare tie ikpia hia ni rre ore Susa ne igiogbẹ sẹ owa, kevbe iran ni fe kevbe avbe ivbiogue. Uzọla hoho ọ re ọ wa ya vbe otọ. Uwu ogba ne a na rhie ẹhoho vbe ẹguae ẹre iran na ru ẹe.

⁶ Ukpọn ne a ya oru nọfua kevbe ne raghoragho do ọ re a tan lele ogba nii ya te ẹre, a keghi ya okun eto ovbiohuẹ ododo de ẹre ye oroka esiliva mu orre ne a ya okuta ikpẹrọnmwọ ru. A keghi viọ aga nekhua ne a ya esiliva kevbe igoru ru lele ore ẹguae. Emwi ne a ya maa otọ ore nii kegha re ikpokuta ẹrọnmwọ nọfua, ekhae ne ọ baa ne a kpe, ogiete ikpẹrọnmwọ ne ọ fi wainwain kevbe emwi ne ọ ye vbe odan ne raghoragho.

⁷ Ukpu igoru ọ re a ya gha sa ayọn ne emwa, a i vbe miẹn eva ne ọ re aro ọkpa vbọ, ọba keghi vbe gie ayọn ne ọba da kpọ kua.

⁸ Ayọn i vbe mwẹ wẹ ọ fo. Ọba wa tama ivbiodibo ẹguae wẹ ne a gie dọmwadẹ ọghọe da ẹko te vuọn ẹẹn.

⁹ Vbe uwu ẹghẹ na, e Vasti ne Oloi kevbe gha le evbare ne avbe ikhuo vbe ẹrriẹ.

¹⁰ Ọ ghi sẹ ikpẹdẹ ne ogihinrọn ne iran kegha rri evbare na, ọba kegha da ayọn, ẹko hia na gha sẹ ọre ọyẹnmwẹ, ọ keghi tie avbe ọghẹrriẹnoguan ihinrọn ni wa re odibo irẹn tobọ ẹre, iran na ọ re Mehuman, e Bizta, e Habona, e Bigta, Abagta, e Zeta kevbe Kakas.

¹¹ Ọ keghi tama iran wẹ ne iran rhie Vasti ne Oloi gha dee ke ẹe kevbe ẹrhu ẹde vbe uhunmwu ẹnrẹn. Oloi na kegha re okhuo ne ọ mose, ọba keghi te ho ne ọ ya ose ẹre hio ma avbe emwa ni rre asẹ kevbe avbe emwa ne ọ tie se owa hia.

¹² Sokpan, avbe odibo ghi ya tama e Vasti ne Oloi vbene ọba khare, ọ na wẹ rẹn i dee. Emwi na keghi mu ọba ohu ẹsẹse.

¹³ Zẹ vbene ọba ru ẹe, emwi ne ọ ghi dekan ẹmwẹ uhi kevbe emwi uhẹn nẹ, te ọ nọ iran ni rẹn emwi dinmwi ẹsẹse vbene iran roro ẹe yi, rhunmwuda ọnii, ọ keghi gie ne a tie iguọbaziro ẹre, emwa ni gha rẹn vbene a gha ru emwi na hẹ.

¹⁴ Iran ne ọ mobọ tie ye egbe iro vberriọ kegha re Kasiena, e Sieta, Admata, e Tasis, e Meres, e Masena, kevbe Memukan — iran ihinrọn ni rre asẹ vbe Pẹsia kevbe Midia emwa ni rre ukpo ni yosẹ vbe otọe arriọba nii.

¹⁵ Ọ keghi tama emwa na wẹẹ, “Mẹ ne Kzakzis ne Ọba, keghi gie avbe eguọmwadia mwẹ gie Vasti ne Oloi, ọ keghi fieghe uhunmwu ye ẹmwẹ nii, vbe uhi kha wẹ ne a ru ẹre re?”

¹⁶ Ẹre Memukan na tama ọba kevbe ekhaẹmwẹ ọnrẹn wẹẹ, “Ẹ i re ọba ọkpa ọre Vasti ne Oloi yaghae na, sokpan kevbe avbe ekhaẹmwẹ ọnrẹn kevbe ikpia hia ni rre otọe arriọba na.

¹⁷ Okhuoikokhuo vbe otọe arriọba na, ne ọ ghi họn emwi ne Oloi ru na nia, ẹ i ghi ghe ọdọ ẹre sẹ ọmwa. Iran ghi gha tae wẹẹ, ‘Kzakzis ne Ọba gie ne a tie Vasti ne Oloi, ọ ma yo.’

¹⁸ Avbe amwẹ ekhaẹmwẹ ọba ni rre Pẹsia kevbe Midia gha miẹn emwi yae gha kpe ọdafẹn iran ofi banbanna. A i ghi miẹn okhuo ne ọ ghi ra gha ya ọghọ ne ọdọ ẹre ọvbehe, avbe ọdọ ghi do gha mu ohu amwẹ iran.

¹⁹ A deghẹ ọ yẹ ruẹ vbenian Umogun, ye asẹ ọghe ọba tae ladian wẹ ne Vasti ghẹ ghi ye aro kan ruẹn aro ọvbehe. U ghi rhie ukpo ẹre zevbe Oloi ne okhuo ọvbehe ne ọ maa sẹ ọre.

²⁰ A gha na iyẹn ẹmwẹ ne u tae na ma emwa hia vbe otọe arriọba nọkhua na, dọmwadẹ okhuo ghi gha rhie ọghọ ne ọ kere ne ọdọ ẹre, ọre ọdafẹn nọ ra ovbiogue.”

²¹ Ẹmwẹ na keghi wa yẹ ọba kevbe ekhaẹmwẹ ọnrẹn, ọ keghi ru vbene Memukan zẹ iro ẹre.

²² Ọ keghi gie uhunmwu vbe ẹvbo ne iran zẹ kevbe vbene iran ya gbẹn emwi, gha rrie dọmwadẹ ehe ne a ghae otọe arriọba nii yi wẹ dọmwadẹ ọdọ ọ re ọ gha re ọdafẹn ne ọ yan owa ẹre, ẹmwẹ ne ọ tae ọ re ọ gha vbe gha re ọfo ye ẹmwẹ hia.