Emọs 9 - Edo Bible (E Baibol Ẹdo) Version 1996

Ibuohiẹn E Nọyaẹnmwa

¹ I keghi ya bẹghe vbe Nọyaẹnmwa mudia ke Ogiukpo. I keghi vbe họn vbe. Ọ taa ẹe wẹẹ, “Wa kinmwi odukhunmwu orrẹ ni rre Ọgua Osa ne obọ da ẹe sẹrriọ wẹ ne ẹyotọ ẹre mu rueghe. Wa bunnọ ehia kua, ne uwa gie iran dele gbe avbe emwa nii uhunmwu. I gha gbele iran ni dekẹe vbe uwu avbe emwa nii vbe okuo. Ọkpa ne ọ gha rrie i rrọ, ọkpa ne ọ gha miẹn uhunmwu i rrọ.

² Ọ gha khọn iran ne iran kpahiẹ la ẹrinmwi vbe uwu otọ, te obọ mwẹ gha vba iran, ọ gha khọn iran, iran hin odukhunmwu la ẹrinmwi, te I silo iran tuorre.

³ Iran gha ya lẹre ye odukhunmwu Oke Kamẹl, te I gualọ iran mu. Iran gha lẹre mẹ vbe ototọ okun, I ghi tama Ugbogiorinmwi amẹ ne ọ fian iran re.

⁴ Eghian iran gha viọ iran oghunmwu gha rrie iwe, I gha tama iran wẹ ne a gbele iran an. I wa ta ẹe nẹ wẹ te I ra fuẹn iran an, ẹ i re te I ra ya iran obọ.”

⁵ E Nọyaẹnmwa ne Udazi ne Oghodua ye obọ kan otọ agbọn, ọ keghi mu rueghe. Emwa ni rrọ hia gha khiẹ. Otọ agbọn hia kegha hu yo hu rre zẹ vbe Ẹzẹ e Naẹl.

⁶ Ẹrinmwi ọre Nọyaẹnmwa bọ owa ẹre yi. Ọ keghi fi iso, zẹ vbe ekharha yan otọ agbọn. Ọ datie amẹ ni rre Okun. Ọ keghi hihiẹ ọe ku otọ agbọn e Nọyaẹnmwa ọrọre eni ẹnrẹn.

⁷ E Nọyaẹnmwa khare wẹẹ, “Wa ne ivbi Izrẹl, vbene ẹmwẹ uwa ye mwẹ vbe ekhọe ọ re ẹmwẹ ivbi e Sudan vbe ye mwẹ vbe ekhọe. E Kret ọ re I ke viọ ivbi e Filistin gha dee, I keghi viọ ivbi e Siria ke Kaa gha dee zẹ vbene I viọ uwa ke Igipt gha dee.

⁸ Mẹ ne Nọyaẹnmwa ne Oghodua wa baba Izrẹl ne ẹvbo emwa orukhọ na. I gha wa fuẹn ọnrẹn uan hin otọ agbọn rre, sokpan I i ra fuẹn ehia a ighe ivbi uniẹn Jekọb.

⁹ “I gha yi iyi, a ghi bọnmwẹ ivbi Izrẹl vbene a bọnmwẹ ọka vbe ahẹn. I gha bọnmwẹ iran vbe uwu ẹbu uhunmwu ẹvbo ne a miẹn ehe na hẹ avbe ẹwobi ni rrọọ kua.

¹⁰ A gha gbele avbe emwa orukhọ ni rre emwa mwẹ vbe okuo, iran hia ni kha wẹẹ, ‘Osanobua i gie ọkhọ sunu vbe egbe mwa.’ ”

Adọlegbe Rhie Izrẹl Ye Ihe Ẹdẹ Ne Ọ Dee

¹¹ E Nọyaẹnmwa khare wẹẹ, “Ẹdẹ dee ne I gha dọlegbe rhie arriọba e Devid ne ọ yevbe itowa nian ye ihe. I gha dọlọ ekẹn ne a gbe lẹga ẹre yi, I ghi dọlegbe rhie ẹre ye ihe. I gha dọlegbe bọ ẹe, I ghi gie ẹe do gha ye vbene ọ ka ye de yi vbe ẹghẹ nii.

¹² Rhunmwuda ọnii, ivbi Izrẹl gha khọn mu ehe ne ọ ghi te kẹe vbe Idọm, kevbe avbe uhunmwu ẹvbo hia ni ka re ọghomwẹ dee yi vbe ẹghẹ ọkpa,” erriọ e Nọyaẹnmwa ne ọ ra gie emwi na sunu khare.

¹³ E Nọyaẹnmwa khare wẹẹ, “Ẹdẹ dee ne ọka gha maa ẹgiẹgiẹ gberra vbene a ya rhọ ẹre alimo ayọn ghi vbe wan ẹgiẹgiẹ gberra vbene a sẹtin ya ru ayọn. A vbe oke nekhua gha gin ayọn ne ọ rhiẹnrhiẹn rre. Ọ ghi gha lẹẹ ọre ku otọ.

¹⁴ I gha viọ emwa mwẹ werriegbe gha die otọ iran, iran gha dọlọ ẹvbo iran ne ọ te guọghọ ua bọ. Iran ghi di ẹe ya. Iran gha gbe ugbo azara iran ghi da ayọn ẹnrẹn. Iran gha mu ugbo, iran ghi rhọ emwi ne iran kọe.

¹⁵ I gha gbe emwa mwẹ ẹkun sẹ otọ vbe otọe ne I mu ne iran, a i ghi dọlegbe werriẹ iran owa ọvbehe.” E Nọyaẹnmwa ne Osanobua rua taa ẹe nẹ.