Emọs 8 - Edo Bible (E Baibol Ẹdo) Version 1996

Umian Okhuae Ọmọ Erhan

¹ I keghi vbe miẹn umian ọvbehe ne ọ ke ehe ne Nọyaẹnmwa ne Udazi ye rre. Vbe uwu umian na, I keghi bẹghe okhuae ọmọ erhan.

² E Nọyaẹnmwa keghi nọọn wẹẹ, “Emọs, de emwi ne u bẹghe yi?” Mẹ keghi wanniẹn wẹẹ, “Okhuae ọmọ erhan.” E Nọyaẹnmwa keghi kha wẹẹ, “Ufomwẹ Izrẹl ne emwa mwẹ rre nẹ. Mẹ i ghi dọlegbe fi ekhọe werriẹ vbe ekpa oya ne I gha rri iran re.

³ Vbe ẹdẹ ne ẹdẹrriọ, egbọ ne a te viọ vbe uwu ẹguae gha khian utumwẹ akhiẹ. Ikun orinmwi gha gba ehehia. A ghi ya gha la iran kua vbene a i na vbe ta ẹmwẹ ọkpa.”

Ọfuan Izrẹl

⁴ Wa danmwehọ ẹmwẹ na, wa ni ya owẹ rrilo ne ẹ i mwẹ ginna otọ, ne uwa na vbe ho ne uwa fuẹn avbe ivbiogue ni rre ẹvbo hinrre.

⁵ Wa ghi gha tama egbe wẹẹ, “Ma gha sẹtin mudia ne irhiẹdẹ fo nẹ ma keghi ya gha khiẹnnẹ avbe ọka ima? De ẹghẹ ne Ẹdẹ Ikẹtin ra ya gberra yi ne ima miẹn ehe na suẹn emwi gha khiẹn? Ẹghẹ nii, ma ghi fian yan emwi hia, ma ghi gha ya omwa ne ọ ma gba mwa emwi, ma ghi mu esike ye vbene ọ gha ya mu emwa ni gu ima dẹlẹ emwi ru.

⁶ “Ma sẹtin khiẹn ọka ne ẹ i maa aghanghan. Ma gha gualọ ovbiogue ne ọ ma sẹtin ha osa ne ọ rre ọre urhu, egbe igho ne a ya dẹ e esanda eva kẹkan, ma ghi dẹ ọe ya ru ọviẹn.”

⁷ E Nọyaẹnmwa ne Osanobua Izrẹl vẹn ihen nẹ wẹẹ, “Mẹ i ra mianmian emwi dan ne iran ru.

⁸ Rhunmwuda ọnii, otọe gha mu rueghe, emwa ni rre otọe nii hia ghi miẹn akhiẹ. A gha mu ẹvbo nii hia rueghe. Ọ ghi gha hẹ yo hẹ rre zẹvbe Ẹzẹ e Naẹl.

⁹ Ẹghẹ dee ne I gha na ru ẹe ne owẹn defua vbe ogiavan, otọ agbọn ghi so ebiebi vbe ogiavan ogioghogho. Mẹ ne Nọyaẹnmwa ne Udazi ọre ọ taa ẹe. I gha ya emwiukpo ne uwa ru khian irorinmwi, I ghi fi ihuan ọyẹnmwẹ ne uwa so werriẹ khian ugomwẹ akhiẹ.

¹⁰ I gha ru ẹe ne uwa khiokhio eto, na uwa vbe viọ ukpọn akhiẹ ye egbe. Wa ghi ye vbe evbibiemọ ni khiẹ ukpọmọkpa ne iran biẹe. Tẹ ẹdẹ ne ẹdẹrriọ ra wa rriara ne ebi ro.

¹¹ “Ẹghẹ dee, ne I gha na gie ukhunmwu la otọe nii, ohan mwẹ ghi gha gbe emwa, sokpan ẹ i re ohanmwẹ evbare, ovbamẹ gha gbe iran, sokpan ẹ i re amẹ, ne a wọn. Ohanmwẹ kevbe ovbamẹ ẹmwẹ ne ọ ke ehe ne Nọyaẹnmwa ye rre gha gbe iran. Mẹ ne Nọyaẹnmwa ne Udazi ọ re ọ taa ẹe.

¹² Emwa gha zozo ke Okun Nọwu gha rrie Okun e Meditẹrrenian, kevbe lẹga ke okuọ ya sẹ ekẹn. Iran ghi gualọ uhunmwu ne Nọyaẹnmwa gie rre vbe ehe hia, sokpan iran i ra miẹn.

¹³ Vbe ẹdẹ ne ẹdẹrriọ, avbe igbama ikpia kevbe ikhuo gha fọrhiọn ba ẹmwẹ ovbamẹ nii.

¹⁴ Iran ni vẹn ẹbọ e Sameria, iran ni kha wẹẹ, ‘I vba ẹbọ ne Dan’ ra ‘I vba ẹbọ ne Biẹsiẹba’ iran ni gha dele guọghọ ua, iran i ghi vbe kpao ọvbehe.”