Emọs 7 - Edo Bible (E Baibol Ẹdo) Version 1996

Umian Irhiso

¹ I keghi miẹn umian ne ọ ke ehe ne Nọyaẹnmwa ne Udazi ye rre. I keghi bẹghe ẹre vbe ọ yi oghẹn irhiso, vbe a gha da wa fian irunmwu ne ẹsin re ọghe ọba, vbe avbe irunmwu nii ghi wa dọlegbe suẹn gha zọọ.

² Vbe uwu umian nii, I keghi bẹghe vbe avbe irhiso wa rri irunmwu ni ghi bi nunuunu hia vbe otọe nii, ọre imẹ na kha wẹẹ, “E Nọyaẹnmwa ne Udazi, yabọ emwa ruẹn, vbe iran ra ya miẹn uhunmwu hẹ vbe ọna? Iran wa kanmwa, iran ma vbe wegbe!”

³ E Nọyaẹnmwa keghi fi ekhọe werriẹ, ọ keghi kha wẹẹ, “Emwi ne u miẹn i ghi ra sunu.”

Umian Ọghe Erhẹn

⁴ I keghi vbe miẹn umian ọvbehe ke ehe ne Nọyaẹnmwa ne Udazi ye gha dee. Vbe uwu ẹre, I keghi bẹghe ẹre vbe ọ mu egbe ne ọ do ya erhẹn rri emwa rẹn oya. Erhẹn ni keghi giẹn okun nọkhua ne ọ rre uwu otọ, ọ keghi vbe suẹn gha giẹn otọe kẹkan.

⁵ Ọre imẹ na kha wẹẹ, “Dobọyi e Nọyaẹnmwa Osanobua. Vbe emwa ruẹn ra ya miẹn uhunmwu hẹ vbe ọna? Iran wa kanmwa, iran ma vbe wegbe!”

⁶ E Nọyaẹnmwa keghi vbe fi ekhọe werriẹ ọ wẹẹ, “Ọna i ghi ra vbe sunu.”

Umian Emwi Ne A Ya Mwa Egbekẹn

⁷ I keghi vbe miẹn umian ọvbehe ke ehe ne Nọyaẹnmwa ye rre. Vbe uwu ẹre, I keghi bẹghe ẹre vbe ọ mudia ke ekẹn ne a ya emwi ne a ya mwa egbekẹn mwaa vbe a gbe ẹe, rẹn keghi vbe mwẹ emwi ne a ya mwa egbekẹn vbe obọ ẹre.

⁸ Rẹn keghi nọ mwẹ wẹẹ, “Emọs de emwi ne u bẹghe yi?” Mẹ keghi wanniẹn wẹẹ, “Emwi ne a ya mwa egbekẹn.” Rẹn keghi kha wẹẹ, “Te I ya ọna kha wẹ te emwa mwẹ ye vbe egbekẹn ne ẹ i rre uviẹn. Mẹ i ghi ra fi ekhọe werriẹ ọvbehe, te I gha rri iran oya.

⁹ A gha fuẹn ọnrẹn uan ighẹ ehe ne ivbi uniẹn Aizik na ru ugamwẹ. A gha ye ehe nọhuanrẹn ọghe Izrẹl khian itowa. I gha ru ẹe ne uniẹn e Jeroboam ne Ọba gbẹro.”

Emọs Kevbe Amezaia

¹⁰ Amezaia ne ohẹn ne ọ rre Bẹtẹl keghi gie ne a tama Jeroboam ne Ọba Izrẹl wẹẹ, “Emọs gha khuan isọtẹ khẹ ruẹ vbe ehe ne avbe emwa ye. Ẹmwẹ ne ọ guan gha wa fuẹn uhunmwu ẹvbo na.

¹¹ Vbenian ọre ọ khare wẹẹ, ‘E Jeroboam gha wu ye okuo, a gha vbe kun ivbi Izrẹl ke ẹvbo iran kpao gha rrie iwe.’ ”

¹² Ẹre Amezaia ghi na khama Emọs wẹẹ, “Ọnii sẹe, akhasẹ, gha rri Juda ne u ya gha kpe orhu vbe odọ.

¹³ Gie iran gha ha ruẹ osa yọ. Ghẹ ghi guan ẹmwẹ akhasẹ vbe emwa vbe Bẹtẹl ọvbehe. Ehe ne Ọba na ga ọ re ọna khin, Ọgua Osa ẹvbohoho.”

¹⁴ Emọs keghi wanniẹn wẹẹ, “Mẹ i re egbe avbe akhasẹ ne ọ miẹn igho ye ne ọ na guan ẹmwẹ akhasẹ, ọsuohuan ọ re I khin, I vbe gbe aro ghe avbe erhan ohọ.

¹⁵ Sokpan e Nọyaẹnmwa keghi rhie mwẹ hin ehe ne I na su ohuan rre, ọ na tama mwẹ wẹ ne I ya gha guan ẹmwẹ akhasẹ ma ivbi Izrẹl ne emwa irẹn.

¹⁶ “Rhunmwuda ọnii nian, danmwehọ vbene Nọyaẹnmwa kha hẹ. U wẹ ne I dobọ ẹmwẹ akhasẹ ne I ta yi, ne I ghẹghi talọ ku ivbi Izrẹl.

¹⁷ Rhunmwuda ọnii nian, Amezaia, e Nọyaẹnmwa tama ruẹn wẹẹ, ‘Amwọn gha khian ebabotu ye ughe. A gha gbele ivbuẹ ua vbe okuo. A gha gia otọe ruẹ, a ghi munọ ọẹn ne emwa ọvbehe, wẹ tobọ ruẹ ghi ya wu ye ẹvbo iran ni gho ẹbọ. Vbene a i na gbe awẹawẹ, a gha viọ ivbi Izrẹl kpao vbe otọe iran gha rrie iwe.’ ”