Emọs 5 - Edo Bible (E Baibol Ẹdo) Version 1996

Utiemwẹ Ye Afiekhọewerriẹ

¹ Wa ne ivbi Izrẹl wa danmwehọ ihuan orinmwi ne I ra so yan uwa:

² Izrẹl ne uvbi de guọghọ ua, ẹ i ghi kpaegbe vbe otọ ẹdẹ! A he ẹe ye ehe ne ọ lovbiẹ yi vbe otọ. A ma miẹn ọmwa ne ọ si ẹe kpaegbe.

³ E Nọyaẹnmwa ne Udazi khare wẹẹ, “Ẹvbo ọkpa vbe Izrẹl ghi gie ivbiyokuo arriaisẹn ladian, sokpan, iyisẹn ọ re ọ ghi ra werriegbe rre vbọ; ẹvbo ọvbehe ghi vbe gie iyisẹn ladian, sokpan, igbe ọ re ọ ghi ra dọlegbe rre vbọ.”

⁴ E Nọyaẹnmwa tama ivbi Izrẹl wẹẹ, “Wa bu mwẹ gha dee, wa gha di agbọn ya.

⁵ Wa ghẹ yo ya ga vbe Biẹsiẹba. Wa ghẹ yo ya gualọ mwẹ vbe Bẹtẹl, e Bẹtẹl gha la ọrhiae rrie. Wa ghẹ ye Gilgal, a mu emwa ni rrọ uhunmwu da iwe nẹ.”

⁶ Wa bu e Nọyaẹnmwa gha khian, wa gha di agbọn ya. Adeghẹ wa ma yo, ọ gha hẹ rhu ivbi Izrẹl zẹvbe erhẹn. Erhẹn nii gha giẹn iran an ighe iran ni rre Bẹtẹl, a i ra vbe miẹn ọmwa ne ọ gha sẹtin dọ ẹre yọ.

⁷ Ọghe uwa fo nẹ, wa ni khiẹn ohiẹn bu, ni vbe mu emwa buzọ ẹre aro ua vbe emwi ne ọ wa khẹke iran!

⁸ E Nọyaẹnmwa ọ re ọ yii avbe orhọnmwẹ, iyọkhọkọ kevbe Agho. Ọ ye ebiebi khian uwanmwẹ kevbe avan khian asọn. Ọ gha datie amẹ ni rre okun ọ ghi hihiẹ ọe ku otọ. E Nọyaẹnmwa ọrọre eni ẹnrẹn.

⁹ Rẹn ọ re ọ zẹ ọkhọ rruan iran ni wegbe kevbe emwi ne iran ya khẹ egbe.

¹⁰ Wa ni khuiwu iran ni gbeta ye a i ta ẹmwata unu vbe iko, iran ghi rhie ẹmwata ne ọ rrọ ta.

¹¹ Wa wọ avbe ivbiogue uhunmwu, wa keghi vbe do iran ọka viọ. Rhunmwuda ọnii, wa i yin owa okuta ne mose mose ne uwa bọlọe, ra na uwa da ayọn ne ọ ke ugbo azara ne uwa gbe rre.

¹² I rẹn vbene orukhọ uwa khọrhiọn sẹ hẹ, kevbe vbene a i ghẹru ne uwa ru vbe bun hẹ. Wa ọ re ọ zẹ emwa ẹmwata owẹ, wa ọ re ọ rhie igho odieke, wa i gia bu ohiẹn ẹmwata ne ivbiogue vbe iko.

¹³ Rhunmwuda ọnii, ọmwa wa hẹko hunwan ọ re ọ maa sẹ vbe egbe ẹghẹ dan vbenian!

¹⁴ Wa rhie ekhọe yọ ne uwa gha ru emwi ne ọ gbae, ẹ i re emwi dan, ne uwa miẹn ehe na diagbọnya. Ẹghẹ nii ọ re Nọyaẹnmwa ne Oghodua gha na yaba uwa zẹ vbene uwa ta ẹe na ighe ọ yaba uwa.

¹⁵ Wa gie emwi dan gha sọnnọ uwa, wa gie emwi esi gha yẹ uwa, ne uwa vbe miẹn wẹ ohiẹn ẹmwata ọkpa ọ re a bu vbe iko. Ughaghe, e Nọyaẹnmwa gha mwẹ itohan ghe iran ni ghi rre agbọn vbe ivbi ẹvbo na.

¹⁶ Rhunmwuda ọnii, e Nọyaẹnmwa ne Udazi ne Oghodua khare wẹẹ, “Eve kevbe ugomwẹ akhiẹ gha rre ore ẹvbo nii. Uhin wẹ te a ra ya tie avbe ọgbugbo nii iran do deba iran ni miẹn igho viẹ eve orinmwi, gha khiẹ emwa ni wulo.

¹⁷ Ugomwẹ gha rre uwu ogba azara hia. Emwi na hia sunu rhunmwuda, I dee ra do rri uwa oya.” Erriọ Nọyaẹnmwa khare.

¹⁸ U miẹn vbe ọ gha ba so uwa hẹ wa ni rhie aro ye odẹ gha khẹ ẹdẹ e Nọyaẹnmwa. De emwi ne uwa ro ighe wa gha miẹn vbọ yi? Ẹdẹ ne ọ so ebiebi khian gha nọ ne uwa, ighe ẹ i re ẹdẹ uwanmwẹ.

¹⁹ Te ọ ra yevbe ne ọmwa lẹ ne oduma, ọ na dekun akpakomiza! Ra ọmwa ne ọ lẹ la owa, ọ na rhie obọ yan ekẹn, ẹyẹn keghi sa a ẹe.

²⁰ Ebiebi ọ re ẹdẹ e Nọyaẹnmwa rhie dee ighe ẹ i re uwanmwẹ, ẹdẹ omẹ nọ, urramwẹ ẹdẹ i rrọ hiehiere.

²¹ E Nọyaẹnmwa khare wẹẹ, “Ugie ugamwẹ ne uwa do hia wa sọnnọ mwẹ, I i ghi ho ne I bẹghe iran.

²² Wa gha viọ emwi imuohan ne a giẹn uan, kevbe ọghe ọka gunmwẹ, mẹ i ghi miẹn uwa re. Mẹ i ghi rhan obọ miẹn avbe aranmwẹ ne uwa bẹre ne uwa ya gha ha oko gunmwẹ.

²³ Wa dobọ ihuan owogho ne uwa so yi; I i ghi ho ne I họn ẹmwẹ akpata ne uwa kpe.

²⁴ Ye ihe enena, wa gie ohiẹn ẹmwata gha lẹ vbe ẹzẹ, kevbe uyinmwẹ ẹmwata zẹ vbe ẹzẹ ne ẹ i ka.

²⁵ “Ivbi Izrẹl, I ma miẹn uwa ese ra emwi imuohan vbe ukpo iyeva nii ne I ya viọ uwa la uwu ato gberra.

²⁶ Sokpan, banbanna nian, rhunmwuda ne uwa na ya gha gho e Sakut ne ogie ẹbọ uwa, kevbe Kaiwan ne ẹbọ orhọnmwẹ uwa, te uwa ra hẹ avbe ẹbọ na vbe uhunmwu.

²⁷ Vbe ẹghẹ ne I gha na viọ uwa gha rrie iwe vbe odẹ vbe a gberra e Damaskọs nẹ.” Erriọ Nọyaẹnmwa ne a tie ẹre Osa ne Oghodua khare.