Emọs 4 - Edo Bible (E Baibol Ẹdo) Version 1996

¹ Wa danmwehọ ẹmwẹ na, wa ne ikhuo e Sameria, ni ti ye egbe vbe ẹmila ne a koko vbe Basian, ni ru emwa ni ma wegbe khọ, ni wọ avbe ivbiogue uhunmwu, ni nọ wẹ ne avbe ọdafẹn iran gha dẹ ayọn gie iran.

² Zẹ vbene Nọyaẹnmwa ne Udazi na re nọhuanrẹn, ọ yan nẹ wẹẹ, “Ẹdẹ dee ne a gha ya ẹghọ silo uwa ladian, dọmwadẹ ọghọe vbe uwu uwa gha ye vbe ehẹn ne ọ rre ẹghọe.

³ A ghi kpolo uwa gha rrie ehe ne ekẹn ne a gbe lẹga ẹvbo ne ọ ghi sikẹ evba sẹẹ, a ghi filo uwa kua.”

Izrẹl Ma Ye Rhie Ẹwaẹn Yuhunmwu

⁴ E Nọyaẹnmwa ne Udazi khare wẹẹ, “Wa ne ivbi Izrẹl, wa gha rrie ehe nọhuanrẹn ne ọ rre Bẹtẹl ne uwa ya ru orukhọ khekherriọ! Wa gha rrie Gilgal ne uwa ya ye ẹtin uwa hia ru orukhọ! Wa tua obọ yọ, ne uwa gha munọ aranmwẹ rre ne a ya gha zọ ese owiẹ owiẹ, ne uwa vbe gha viọ aghae ye ihigbe ọwua rre ẹdẹ eheha.

⁵ Wa gie obọ kẹe ne uwa ya ye ebrẹd kpọnmwẹ Osanobua, ne uwa vbe gha ya ee rhuọ khian ighe emwi ne uwa ya ru yan emwi ihaoko. Egbe emwi vberriọ ọre a na miẹn uwa.

⁶ “Mẹ ọ re ọ ru ẹe ne ohanmwẹ na fi la otọe uwa hia, sevba wa ma dọlegbe bu mwẹ rre.

⁷ Ẹghẹ ne ọ wa kei ne amẹ na rhọ ye emwiokọ uwa. I keghi dobọ amẹ yi ne ọ ghẹ rhọ. I gha gie amẹ rhọ vbe ẹvbo ọkpa, I i ghi vbe gie ẹe rhọ vbe nọkpa.

⁸ Amẹ ghi rhọ ye ugbo ọkpa, sokpan nọkpa ghi kaka a. Emwa ne ohanmwẹ amẹ gbe ya khian ne vburriẹ vburriẹ ghi ke ẹvbo nibun gha die ẹvbo ọkpa ne iran rhie aro yi wẹ iran gha na miẹn amẹ wọn, sokpan amẹ ne ọ gha sẹ iran wọn i rrọ. Sevba, wa ma ye bu mwẹ rre.

⁹ “I gie ẹhoho owowo rre ne ọ kaka uwa emwiokọ ua. Irhiso rri ugbo uwa kevbe ogba azara, erhan ohọ kevbe ọghe oliv. Sevba wa ma ye bu mwẹ rre.

¹⁰ “I gie egboghogbogho yan uwa zẹ vbe ne I giee ẹe rrie Igipt. I gbele igbama uwa vbe okuo, I keghi viọ uwa ẹsin kpao. I ye ẹwia orinmwi khiọ uwa ihue vbe agọ uwa. Sevba, wa ma ye bu mwẹ rre.

¹¹ “I fuẹn eso vbe uwu uwa a, zẹ vbene I fuẹn Sọdom kevbe Gomorra, wa ni miẹn uhunmwu vbọ keghi yevbe ovbi erhan ne ọ giẹn khian, a keghi rhie ẹre hin erhẹn rre. Sevba, wa ma ye bu mwẹ rre,” erriọ Nọyaẹnmwa khare.

¹² “Rhunmwuda ọnii nian, I ra do rri uwa oya, wa ne ivbi Izrẹl. Rhunmwuda ne I ra na ru emwi na, wa mu egbe ne obọ ibuohiẹn mwẹ vba uwa!”

¹³ Osanobua ọ re ọ yii avbe oke nekhua, ọ keghi vbe yii avbe ẹhoho. Ọ gie ọmwa ne agbọn rẹn emwi ne ọ rre irẹn ekhọe, ọ sẹtin ye avan khian asọn, ọ ghi vbe gha khian vbe ehe ne ọ yo vbe agbọn. Eni ẹnrẹn ọrọre Nọyaẹnmwa, Osanobua ne Oghodua.