Emọs 3 - Edo Bible (E Baibol Ẹdo) Version 1996

¹ Wa ne ivbi Izrẹl, wa danmwehọ uhunmwu na ne Nọyaẹnmwa gie vbe ekpa uwa, emwa uhunmwu ẹvbo ni hia fẹẹrẹ ne Nọyaẹnmwa viọ ke Igipt gha dee:

² “Vbe avbe uhunmwu ẹvbo hia ni rre agbọn na, wa ọkpa ọre I rẹnrẹn, wa ọkpa ọre I vbe gbe aro ghe vbọ. Ọnii ọre ọ si ẹe ne orukhọ uwa na re emwi ne ọ mu ohan, ọnii ọ si ẹe ne a na miẹn wẹ ẹ i mwẹ I ma rri uwa oya yọ.”

Iwinna Akhasẹ

³ Arhin eva gha sẹtin gba kpaegbe gha rrie ehe ra vbe ẹ i re te iran ka gba taa ẹe ye otọ nẹ?

⁴ Oduma vbe davan vbe uwu ẹgbo ra vbe ẹ i re te ọ gbe emwi nẹ? Ovbi oduma vbe zuyọn vbe uwu uvun ra vbe ẹ i re te obọ ẹre vba emwi nẹ?

⁵ Ifi vbe mu ahianmwẹ ra deghẹ ẹ i re te a ke ẹre? Ifi wa vbe gheghe dọn ra adeghẹ ẹ i re emwi ọ dọn rẹn?

⁶ A gha họn urhu okpe okuo vbe ẹvbo, ne ohan ghẹ mu emwa ni rrọ ra? Ọkhọ vbe sunu vbe ẹvbo ra vbene Nọyaẹnmwa ma na gie?

⁷ E Nọyaẹnmwa ne Udazi i da ru emwi vbe ne ọ ma na ka ta ẹe ma avbe akhasẹ ne eguọmwadia ẹre nẹ.

⁸ Oduma gha davan, de ọmwa ne ohan i ra mu. E Nọyaẹnmwa ne Udazi gha guaan nẹ, de ọmwa ne ọ gha sẹtin wẹ rẹn i ra ta uhunmwu ne ọ gie?

Ọfuan Ọghe Sameria

⁹ Wa tama iran ni rre ẹguae vbe Igipt kevbe Asdọd wẹẹ: “Wa ya si egbe koko ye oke ni rre ọkpẹn e Sameria ne uwa ya ghe otighi kevbe emwi dan ne iran ru vbe evba.”

¹⁰ E Nọyaẹnmwa khare wẹẹ, “Emwi ne emwa na ya okuo igbe kevbe imu viọ, ọ re iran viọ vuọn owa iran ne mose mose. Iran ma kue rẹn vbene a ru emwi uhẹn hẹ.

¹¹ Rhunmwuda ọnii, eghian gha lẹga otọ iran, iran ghi dunmwu odin iran, iran ghi fu avbe emwi ni rre owa iran ne mose mose viọ.”

¹² E Nọyaẹnmwa khare wẹẹ, “Zẹ vbene ọsuohuan rhọ owẹ ra ehọ ohuan ne oduma gbe re vbe otọ, erriọ zẹẹ, ibozẹghẹ ọ re ọ ra miẹn uhunmwu vbe ivbi e Sameria, ni niẹn obọ niẹn owẹ ua lele aga ne purhẹ iran.

¹³ Wa danmwehọ nian, ne uwa gu ivbi uniẹn Jekọb guan ye otọ khẹ ọ dee,” erriọ e Nọyaẹnmwa, Udazi ne Oghodua khare.

¹⁴ “Ẹdẹ ne I gha rri ivbi Izrẹl oya ye orukhọ ne iran ru, I gha dunmwu Ogiukpo ne ọ rre Bẹtẹl rua, a gha vbe kpannọ igẹngẹn Ogiukpo hia kua, ehia ghi dele kuotọ.

¹⁵ I gha dunmwu avbe owa ne a bọ ẹre ọghe okhuakhua kevbe ọghe owowo kua; avbe owa ne a ye akọn eni tee gha rẹnkhẹn uan, a gha dunmwu dọmwadẹ owa nekhua hia a.”