Emọs 1 - Edo Bible (E Baibol Ẹdo) Version 1996

¹ Ẹmwẹ Emọs ne Ọsuohuan ne ovbi ẹvbo ne a tie ẹre Tẹkoa ọ re ena khin. A ghi tie ẹre ukpo eva ne igbohiotọ ra sunu, vbe ẹghẹ ne Uzaia na gha re ọba e Juda, e Jeroboam na vbe gha re ọba Izrẹl, Osanobua keghi rhie emwi na hia vbe ekpa Izrẹl ma Emọs.

² Emọs khare wẹẹ, “E Nọyaẹnmwa van okan ke Oke Zaiọn rre, urhu ẹre vanhiẹn ke Jerusalẹm rre. Avbe ehe ne aranmwẹ na rria hia giẹn uan.”

Ohiẹn Avbe Ẹvbo Ni Yin Ke Izrẹl Ne Osanobua Buru: E Siria

³ E Nọyaẹnmwa khare wẹẹ, “Tẹ ivbi e Damaskọs wa gha ru orukhọ yan egbe yan egbe, rhunmwuda ọnii, I gha wa rri iran oya ye emwi na. Ekhọe ababe ọ re iran ya gha ru emwi ne iran ru ivbi e Giliad re.

⁴ Rhunmwuda ọnii, I gha rhu erhẹn ye ẹguae ne ọ bọe ighe Hazaẹl ne Ọba, I gha giẹn ehia mu otọ ighe ẹvbo ne a gbe odin ga ọghe Bẹnhadad.

⁵ I gha dunmwu onurho e Damaskọs rua, I ghi viọ emwa ni rre Iya Avẹn, kevbe ne ọ khaemwisẹ Bẹtẹdẹn kpao. A gha viọ ivbi e Siria oghunmwu gha rrie Kaa.”

E Filistia

⁶ E Nọyaẹnmwa khare wẹẹ, “Te ivbi e Gaza wa gha ru orukhọ yan egbe yan egbe, rhunmwuda ọnii, I gha wa rri iran oya ye emwi na. Iran kun emwa hia ni wa rre ẹvbo hoho kpao, iran na ya khiẹnnẹ iran eviẹn ne ivbi Idọm.

⁷ Rhunmwuda ọnii, I gha mu erhẹn ye ekẹn ne a gbe ga e Gaza. I gha vbe giẹn odin ne a gbe ga ẹre hia a.

⁸ I gha viọ iran ni khaemwisẹ vbe Asdọd kevbe Askẹlọn kpao, I gha rri Ẹkrọn ne ẹvbo oya. Ivbi e Filistin ni ghi kẹe hia gha wulo.”

Taia

⁹ E Nọyaẹnmwa khare wẹẹ, “Te ivbi e Taia wa gha ru orukhọ yan egbe yan egbe, rhunmwuda ọnii, I gha wa rri iran oya ye emwi na. Iran wa viọ emwa hia ni rre ẹvbo ohoho kpao gha rrie iwe vbe Idọm, ọ ma ghi ye ebe ọseagbakhin ne iran gha rhie obọ yi.

¹⁰ Rhunmwuda ọnii, I gha mu erhẹn ye ekẹn ne a gbe lẹga e Taia, I ghi vbe giẹn odin ẹnrẹn hia sẹ otọ.”

Idọm

¹¹ E Nọyaẹnmwa khare wẹẹ, “Te ivbi Idọm wa gha ru orukhọ yan egbe yan egbe, rhunmwuda ọnii, I gha wa rri iran oya. Iran keghi gha ru ọbafi ivbi Izrẹl ne etẹn iran, iran ma ghi vbe mwẹ itohan hiehie ghe iran. Ohu iran i zẹdẹ mwẹ erọkhọrọkhọ, ẹ i vbe fo iran vbe ekhọe.

¹² Rhunmwuda ọnii I gha rhu erhẹn ye ore Tẹman, I ghi giẹn odin e Bozra sẹ otọ.”

Amọn

¹³ E Nọyaẹnmwa khare wẹẹ, “Te ivbi Amọn wa gha ru orukhọ yan egbe yan egbe, rhunmwuda ọnii, I gha wa rri iran oya ye emwi na. Vbe okuo ne iran khọn ba ẹmwẹ otọ, uhin ighe te iran gha va ẹkpoliyẹkẹ ẹko vbe Giliad.

¹⁴ Rhunmwuda ọnii, I gha mu erhẹn ye ekẹn ne a gbe ga e Raba, I ghi vbe giẹn odin ẹnrẹn sẹ otọ. Ẹghẹ nii, iran gha tu okokoko vbe ẹdẹ okuo, igbinna ghi gha khọn emwi hia khian zẹ vbe okpẹhoho.

¹⁵ Ọba iran ke ẹe kevbe ekhaẹmwẹ iran, ehia gha yo iwe.”