Ẹksọdọs 9 - Edo Bible (E Baibol Ẹdo) Version 1996

Uwu Avbe Emwirri

¹ E Nọyaẹnmwa keghi khama e Mosis wẹẹ, “Bu ọba Igipt ne u ya tama rẹn wẹẹ, ‘Vbenian ọre Nọyaẹnmwa ne Osanobua avbe Hibru khare, “Gie emwa mwẹ gha khian ya ga mwẹ.

² A deghẹ u ma ye gie iran gha khian, u na ye da iran yi,

³ I gha ya emianmwẹ dan ne I gha mu ku avbe emwirri ruẹ rri uwa oya; avbe ẹsin ruẹn, avbe ekẹtẹkẹtẹ ruẹ, ogologo, ẹmila, ohuan kevbe avbe ewe.

⁴ I gha rhie alughaẹn ye ẹkpo emwirri ivbi Izrẹl kevbe emwirri ivbi Igipt. Ọkpa i ra wu vbe uwu emwirri ivbi Izrẹl.” ’ ”

⁵ Mẹ ne Nọyaẹnmwa bu ẹdẹ ọre nẹ, ọ wẹẹ, akhuẹ na nọ!

⁶ Vbe ikpẹdẹ ne ọ lele ẹe, e Nọyaẹnmwa keghi ru zẹ vbene ọ khare, emwirri ivbi Igipt hia keghi wulo, sokpan ne ọ wu vbe emwirri ivbi Izrẹl i rrọọ.

⁷ Ọba keghi nọ emwi ne ọ sunu, iran keghi tama rẹn wẹẹ emwirri ọkpa kẹkan ma wu vbe ọghe ivbi Izrẹl. Sokpan, rẹn keghi yin ehọ, ọ ma gie emwa nii gha khian.

Uruvba

⁸ E Nọyaẹnmwa keghi tama e Mosis kevbe Errọn wẹẹ, “Ya zẹ uguobọ ọkpa ọghe emuẹn vbe ehe ne a hie erhẹn yi; e Mosis ghi sirra ọba Igipt bọnmwẹ ọẹn ghe odukhunmwu.

⁹ Ọ gha hoho gba otọe Igipt hia zẹvbe ebubẹ ne mosemose, ọ gha ya uruvba ne ọ vẹ khian munọ emwanagbọn kevbe emwirri vbe ehe hia.”

¹⁰ Ẹre iran na zẹ emuẹn vbe ehe ne a hie erhẹn yi, iran na ya mudia ye odaro ọba. E Mosis na bọnmw ọẹn ghe odukhunmwu, ọ keghi ya ye uruvba ne ọ vẹ khian eguọguọ munọ emwanagbọn kevbe emwirri.

¹¹ Avbe ọbo edunna ma ghi sẹtin rre do miẹn e Mosis rhunmwuda, uruvba gba iran egbe hia zẹvbe ne ivbi Igipt nekpa vbe ye.

¹² Sokpan, e Nọyaẹnmwa keghi ya ọba ze vbe udu, ọ ma zẹ ye Mosis kevbe Errọn re zẹ vbene Nọyaẹnmwa khare zẹẹ.

Avan Ne ukhunmwu

¹³ E Nọyaẹnmwa keghi tama e Mosis wẹẹ, “Vbe owiẹ fioo akhuẹ u ghi bu ọba Igipt ne u ya tama rẹn wẹẹ, ‘Vbenian ọre Nọyaẹnmwa ne Osanobua avbe Hibru khare, gie ivbi Izrẹl gha khian ne iran ya ga mwẹ.

¹⁴ Vbe ẹghẹ na nian, wẹ tobọ ruẹ ọre I gha rri ọre oya, deba ekhaẹmwẹ ruẹn, kevbe emwa ruẹn ne u miẹn ehe na rẹn wẹ ọmwa ne ọ yevbe mwẹ i rre agbọn na hiehiere.

¹⁵ Akpawẹ te I ya obọ mwẹ mu emianmwẹ kuọ ruẹ kevbe emwa ruẹn, wa hia gha wulo nẹ.

¹⁶ Sokpan I ke sẹ uwa rae ye agbọn ne I miẹn ehe na rhie ẹtin mwẹ ma ruẹn, kevbe ne otiti mwẹ miẹn ehe na titi gba otọ agbọn hia.

¹⁷ Sevba te u ye hio ku emwa mwẹ, u ma gie iran kpao.

¹⁸ Danmwehọ, ẹghẹ na vbe ẹdẹnakhuẹ, I gha tue avan ne ukhunmwu ku otọ, egbe ne Igipt ma hiẹ miẹn ẹdẹ ke ne a ya bu ẹre.

¹⁹ Banbanna nian, tama emwa ruẹn ne iran viọ emwirri hia ne u mwẹ vbe ore la owa, avan ne ukhunmwu ra dele yan emwa hia kevbe avbe emwi rri hia ne a ma viọ la owa, ehia gha wulo!’ ”

²⁰ Afianma keghi fian eso vbe uwu ekhaẹmwẹ ọba Igipt rhunmwuda ẹmwẹ ne Nọyaẹnmwa ta ẹe, iran na viọ eviẹn kevbe emwirri la owa.

²¹ Sokpan eso vbọ ma zẹ ye ẹmwẹ ne Nọyaẹnmwa ta ẹe, iran na sẹ eviẹn kevbe emwirri iran rae ye adesẹ ore.

²² Ẹre Nọyaẹnmwa na tama e Mosis wẹẹ, “Niẹn ọkpọ ruẹ da iso, avan ne ukhunmwu gha dele ye ehe hia vbe otọe Igipt, yan emwa nagbọn, emwirri kevbe irunmwu ni rre ehe hia.”

²³ Ẹre Mosis na niẹn ọkpọ ẹre da iso. E Nọyaẹnmwa na rhọ avan ne ukhunmwu kevbe ayan ku otọe. E Nọyaẹnmwa na rhọ avan ne ukhunmwu yan Igipt.

²⁴ Avan ne ukhunmwu nọ wo vbe egbe kegha dele, ayan na gha yan rhai rhai gbe okin lẹga. Avan ne ukhumwu ne ọ wo vbe egbe sẹ ne Igipt he miẹn ke ne a ya bu ẹre nọ.

²⁵ Avan ne ukhunmwu kegha dunmwu emwi hia nii ghi rre adesẹ ore sẹ otọ vbe Igipt hia, emwa hia kevbe emwirri hia. Ọ na gha siẹn rhu erhan nii rre oha hia, ọ na dunmwu erhan hia a.

²⁶ Ikinkin e Gosiẹn, ehe ne avbe ivbi Izrẹl ye ọkpa ọre a ma na họn ẹmwẹ avan ne ukhunmwu.

²⁷ Ọba keghi gie ne a tie Mosis kevbe Errọn, ọ. wẹẹ, “Banbanna nian, I ru orukhọ nẹ, e Nọyaẹnmwa rri ase, mẹ vbe emwa mwẹ rri abe.

²⁸ Na erhunmwu ghe Nọyaẹnmwa! Egbe avan ne ukhumwu kevbe ayan na wọ mwa. I yan ighẹ 1 gha gie uwa gha khian, wa i ghi khian mudia kpẹe sẹ ona.”

²⁹ E Mosis keghi tama rẹn wẹẹ, “I gha wa da lahin adesẹ ore ẹvbo rre, I gha niẹn obọ ghe ehe ne Nọyaẹnmwa ye. Avan ne ukhumwu gha da obọ yi ayan i ghi ra vbe gha rrọọ ọvbehe, ne uwa miẹn ehe na rẹn ighẹ Nọyaẹnmwa ọre ọ yan agbọn na.

³⁰ Sokpan mẹ rẹnrẹn wẹ ke uwẹ kevbe ekhaẹmwẹ ruẹn, ne ọ he muohan e Nọyaẹnmwa, ẹ i re rrọọ.”

³¹ Iyokho kevbe ọka ke wa rhiara, rhunmwuda, ọka te wo nẹ, iyokho te vbe gbele ukhu.

³² Sokpan avbe ọka irhuarhua ma rhia rhunmwuda okiekie ọre iran ya wo.

³³ E Mosis keghi kpao vbe ehe ne ọba Igipt ye rre, ọ na la ore ẹvbo. Ọ keghi viọ obọ da odukhunmwu ọ na erhunmwu ghe Nọyaẹnmwa, avan ne ukhunmwu kevbe ayan keghi da obọ yi yi, amẹ ne ọ rho kevbe da obọ yi.

³⁴ Ugbẹn vbe ọba ghi miẹn wẹ amẹ ne ọ rhọ, kevbe avan ne ukhunmwu da obọ yi nẹ, ọ kevbe dọlegbe ru khọ, rẹn vbe ekhaẹmwẹ ọnrẹn keghi ye yin ehọ.

³⁵ Ọba ma gie ivbi Izrẹl gha khian, zẹ vbene e Nọyaẹnmwa wa ta ẹe ye otọ zẹẹ.