Ẹksọdọs 7 - Edo Bible (E Baibol Ẹdo) Version 1996

¹ E Nọyaẹnmwa keghi kha wẹẹ, “Ghe, I khian ya uwẹ ru vbene Osanobua ye ne ọba. Ọtuẹn ighẹ Errọn ghi gha guan nuẹn zẹ vbe akhasẹ ruẹ.

² Emwi ne 1 mẹ rhirhi yi ẹre iyi nuẹn, u ghi tama Errọn, rẹn ghi tama ọba ọghe Igipt ne ọ gie ivbi Izrẹl kpao hin ẹvbo ẹre rre.

³ Sokpan, I gha ru ẹe ne ọba ze vbe udu, uhin vbe I gha ye winna iwinna ọyunnuan kevbe ọghe ama nibun nẹ vbe Igipt.

⁴ Ọba Igipt i ra rhie ehọ ne uwa ta yi, ẹghẹ nii 1 gha fi otọ nii emwi, I ghi rri ivbi Igipt oya ẹsẹse, mẹ ghi viọ ivbiyokuo mwẹ, ivbi Izrẹl ne emwa mwẹ ladian hin otọe Igipt rre.

⁵ Ivbi Igipt gha rẹn wẹ mẹ ọrọre Nọyaẹnmwa vbe ẹghẹ ne I gha na kpa obọ mwẹ fi iran emwi, I ghi vbe viọ ivbi Izrẹl hin otọ iran rre.”

⁶ E Mosis kevbe Errọn keghi ru vbene Nọyaẹnmwa yi iyi ma iran.

⁷ E Mosis keghi re ọmọ ukpo iyenẹ, Errọn keghi re ọmọ ukpo eha yan iyenẹ vbe ẹghẹ ne iran na gu ọba Igipt guan.

Ọkpọ Ne Mosis Ya Tua Otọ

⁸ E Nọyaẹnmwa keghi khama e Mosis kevbe Errọn wẹẹ,

⁹ “A deghẹ ọba wẹ ne uwa ya iwinna ọyunnuan rhie ma ighẹ wa nọ, u ghi tama Errọn wẹ ne ọ rhie ọkpọ ne u ya tua otọ ne u fi ẹe fi otọ vbe odaro ọba ne u ya ẹe khian ẹyẹn.”

¹⁰ E Mosis kevbe Errọn keghi bu ọba, iran na ru vbene e Nọyaẹnmwa tama iran. Errọn keghi fi ọkpọ ne ọ ya tua otọ fi otọ vbe odaro ọba kevbe emwa iwinna rẹn, ọ keghi fiwerriẹ khian ẹyẹn.

¹¹ Ẹre ọba na tie avbe umẹwaẹn kevbe ọbo edunna rẹn hia, iran keghi vbe ya ọbo edunna iran ru vberriọ.

¹² Iran keghi filo ọkpọ ne iran ya tua otọ ku otọ, ehia keghi khian ẹyẹn, sokpan ọkpọ ọghe Errọn keghi rhọ ọghe iran re.

¹³ Ọba keghi yin ehọ, ọ ma zẹ ye Mosis kevbe Errọn re zẹ vbene Nọyaẹnmwa khare.

Ọkhọ Rruan Igipt Esagiẹn

¹⁴ Ẹre Nọyaẹnmwa na tama e Mosis wẹẹ, “Ọba yin ehọ gbe, ọ ma gie emwa na kpao.

¹⁵ Bu ẹre gha khian vbe owiẹ vbe ọ gha rrie ẹzẹ Nail. U ghi diakhẹ ọre vbe ọkpẹn ẹzẹ. U ghi rhie ọkpọ ne ọ khian ẹyẹn nii mwẹ obọ.

¹⁶ U ghi tama ọba wẹẹ, ‘E Nọyaẹnmwa ne Osanobua ọghe avbe emwa Hibru ọre ọ gie mwẹ ne I do tama ruẹn wẹẹ, gie emwa mwẹ kpao ne iran ya ga mwẹ vbe ato, sokpan do sẹ ewanwanna, u ma zẹ yọ.’

¹⁷ Enian ọre Nọyaẹnmwa khare nian, ‘Emwi ne I ra ru na gha rhie ma ruẹn wẹ mẹ ọrọre Nọyaẹnmwa. Ghe ẹre, I ra ya ọkpọ na fi ẹzẹ emwi, ọ ghi khian esagiẹn.

¹⁸ Avbe ehẹn ghi wulo, ẹzẹ na gha vbe gha wia sẹrriọ wẹ ivbi Igipt i ghi ra sẹtin wọn amẹ ọnrẹn.’ ”

¹⁹ E Nọyaẹnmwa keghi tama e Mosis wẹẹ, “Tama Errọn ne ọ rhie ọkpọ ruẹ ne ọ niẹn ẹnrẹn da ehe ne amẹ ghi ye vbe otọ Igipt hia, avbe ẹzẹ, ẹzẹ ne afian miẹn egbe, kevbe avbe ọghọdọ, avbe amẹ ni rrọọ gha khian esagiẹn. Amẹ gha khian esagiẹn gba otọ ni fo, esagiẹn gha rrọọ ya sẹ egbe avbe erhan kevbe amẹ ne ọ lẹ ke okuta lẹkua rre.”

²⁰ E Mosis kevbe Errọn keghi ru zẹ vbene Nọyaẹnmwa tama iran. Vbe odaro ọba kevbe ekhaẹmwẹ ọnrẹn, Errọn keghi tọn ọkpọ ẹre mu, ọ na ya fi ẹzẹ emwi. Amẹ ne ọ rrọọ hia keghi khian esagiẹn.

²¹ Avbe ehẹn ni rre ẹzẹ keghi wulo, ọ keghi gha wia sẹ vberriọ ne amẹ ọnrẹn ma na gie ivbi Igipt wọn. Esagiẹn keghi gba Igipt hia.

²² Ẹre ọbo edunna ọghe ọba na vbe ya ẹbo edunna ru ẹe, ọba keghi dọlegbe yin ehọ sayọ. Ọ ma zẹdẹ zẹye Mosis kevbe Errọn re zẹ vbe ne Nọyaẹnmwa kha re

²³ Ọba keghi fi egbe werriẹ, ọ na gha rrie ẹguae ẹre vbe ne ọ na ma vbe zẹdẹ zẹ ye ona.

²⁴ Ivbi Igipt keghi tọn nọ uvun lele ọkpẹn ẹzẹ ne iran ghi na wọn amẹ rhunmwuda iran ma sẹtin wọn vbe amẹ ẹzẹ.

²⁵ Ikpẹdẹ ihinrọn ọre ọ yae vbe Nọyaẹnmwa ghi fi ẹzẹ emwi nẹ.