Ẹksọdọs 6 - Edo Bible (E Baibol Ẹdo) Version 1996

¹ Ẹre Nọyaẹnmwa na tama e Mosis wẹẹ, “U gha miẹn emwi ne I gha ru ọba re ban. I gha ya obọ ne ọ tọn muẹn ne ọ miẹn ehe na gie iran gha khian. Vbe ẹmwata I gha ru ẹe ne ọ ya obọ ẹre khulo uwa ladian hin ẹvbo ẹre rre.”

Osanobua Tie Mosis

² Osanobua keghi gu e Mosis guan wẹẹ, “Mẹ ọrọre Nọyaẹnmwa.

³ I rhie egbe ma Ebraham, Aizik kevbe Jekọb zẹ vbe Osanobua Ne Oghodua. Sokpan, I ma ya eni mwẹ ne ọ huanrẹn ighẹ Nọyaẹnmwa rhie egbe ma iran.

⁴ I vbe gu iran ta ile vbe ne I na yan wẹẹ, I gha mu otọ Kenan ne iran, otọe ne iran gha ye, zẹ vbe orhunmwuyẹn.

⁵ Banbanna nian, I họn utumwẹ obalọ ọghe ivbi Izrẹl nẹ, emwa ne ivbi Igipt ya khian eviẹn, I keghi ye ile mwẹ rre.

⁶ Rhunmwuda ọnii, wẹ ghi ya tama ivbi Izrẹl wẹẹ, ‘Mẹ ọrọre Nọyaẹnmwa, I gha fannọ uwa ye otọ vbe obọ iwinna ekuẹnkuẹn ne ivbi Igipt ya ẹtin munọ uwa ya winna. I gha miẹn uwa fan hin uwu eviẹn ne uwa ye ne iran. I gha fannọ uwa ye otọ vbe ekpa ne I gha na tọn obọ mwẹ ne wegbe mu ne I ya rri iran oya nọ mu ohan.

⁷ I gha ya uwa ru emwa mwẹ, mẹ ghi gha re Osanobua uwa. Wa gha vbe rẹn ighẹ mẹ ọre Nọyaẹnmwa ne Osanobua rua vbe I gha fannọ uwa ye otọ hin ọviẹn ọmwa rre vbe Igipt.

⁸ I gha viọ uwa gha rrie otọe nii ne I mobọ yan wẹ 1 gha mu ne Ebraham, Aizik kevbe Jekọb. I gha mu ne uwa ne ọ gha re ọwua, mẹ ọrọre Nọyaẹnmwa.’ ”

⁹ E Mosis keghi ya ta ẹmwẹ na ma ivbi Izrẹl, sokpan iran ma rhie ehọ nẹẹn ta yi rhunmwuda, ihe eviẹn ne iran ye, ya egbe wọ iran.

¹⁰ Ẹre Nọyaẹnmwa na khama e Mosis wẹẹ,

¹¹ “Gha khian, ya tama ọba Igipt wẹ ne ọ gie ivbi Izrẹl kpao vbe otọe ẹre rre.”

¹² Sokpan e Mosis tama Nọyaẹnmwa wẹẹ, “Ugbẹn vbe a miẹn wẹ nene ivbi Izrẹl tobọ iran ma rhie ehọ mẹ ta yi, vbọzẹ ne ọba Igipt gha na rhie ehọ mẹ ta yi? Mẹ nọ, I i guara guan.”

¹³ Ẹ Nọyaẹnmwa keghi yi iyi ma e Mosis kevbe Errọn ne iran ya tama ivbi Izrẹl kevbe ọba Igipt wẹ te a gie iran wẹ ne iran viọ ivbi Izrẹl ke otọe Igipt ladian.

Ivbi Uniẹn Ẹ Mosis Kevbe Errọn

¹⁴ E Riubẹn ne ovbi e Jekọb ne ọdiọn biẹlẹ emọ enẹ, Hanọk, Palu, Hẹzrọn kevbe Kami, ena ọre erha odede uniẹn iran.

¹⁵ E Simiọn biẹlẹ emọ ehan: Jemuẹl, Jamin, Ohẹn, Jakin, Zoha kevbe Siọl, ne okhuo ne ọre ovbi e Kenan biẹe: enii ọrọre erha odede uniẹn ne a tie ginna iran.

¹⁶ Ena ọrọre eni ivbi Livai kevbe emọ ne iran biẹlẹe: Gẹsiọn, Kohat kevbe Merari; iran ọrọre erha odede iran ne a tie ginna iran. Ukpo eha irrọvbe ikiọkhọe (137) ọre Livai ya vbe agbọn.

¹⁷ Ivbi e Gẹsiọn eva ena khin: Libni kevbe Simẹi kevbe ivbi uniẹn iran.

¹⁸ Ivbi Kohat enẹ kegha re Amram, Iza, Hibrọn kevbe Uziẹl. Ukpo Ihinrọn irrọvbe ikiọkhọe (133) ọre Kohat ya vbe agbọn.

¹⁹ Ivbi e Merari eveva kegha re Meali kevbe Musi. Ena kegha re ivbi uniẹn Livai kevbe emọ ne ọ biẹlẹe.

²⁰ Amram keghi rhie Jokebẹd ne ovbiye erhae rọnmwẹ. Rẹn ọre ọ biẹlẹ Mosis kevbe Errọn nẹẹn. Ukpo eha irrọvbe ikiọkhọe (137) ọre Amram yae vbe agbọn.

²¹ Ivbi Iza eheha kegha re Kara, Nefes ke Zikri.

²² Ivbi Uziẹl eheha kegha re Misiaẹl, Elzafan ke Sitri.

²³ Errọn keghi rhie Ẹlisiẹba ne ovbi Aminadab ne ọtẹn Nasiọn rọnmwẹ; ọ keghi biẹlẹ Nadab, Abihu, Eliaza kevbe Tama nẹẹn.

²⁴ Ivbi e Kora eheha kegha re Asi, Ẹlkana kevbe Abiasaf, ena kegha re ivbi uniẹn avbe Kora.

²⁵ Eliaza ne ovbi Errọn keghi rhie ọkpa vbe uwu avbe ivbi Putiẹl rọnmwẹ, ọ na bie Finihaz nẹẹn. Ena ọre ọ gha re avbe ọkaẹgbẹe ọghe avbe ẹgbẹe Livai, zẹ vbe uniẹn dọmwadẹ ọghọe.

²⁶ Nene Errọn kevbe Mosis na ọre Nọyaẹnmwa tama wẹẹ, “Viọ avbe ivbi Izrẹl ke Igipt ladian.”

²⁷ Iran ọrọre emwa ne ọ tama ọba ọghe Igipt wẹẹ ne ọ fannọ ivbi Izrẹl kua.

Iyi Ne Nọyaẹnmwa Yi Ma e Mosis kevbe Errọn

²⁸ Ẹghẹ ne Nọyaẹnmwa na gu e Mosis guan vbe otọe Igipt.

²⁹ Ọ tama rẹn wẹẹ, “Mẹ ọrọre Nọyaẹnmwa, tama ọha ọghe Igipt ẹmwẹ ne I tama ruẹn hia.”

³⁰ Sokpan e Mosis tama e Nọyaẹnmwa wẹẹ, “U rẹnrẹn ghẹ I i guara guan, ọba ọghe Igipt i rhie ehọ mẹ ta yi?”