Ẹksọdọs 40 - Edo Bible (E Baibol Ẹdo) Version 1996

A Mu Owa Ukpọn Ehe Ne Nọyaẹnmwa Ye Mudia A ke Ya Ẹe Fi Ohẹn Ne Nọyaẹnmwa

¹ E Nọyaẹnmwa keghi tama e Mosis wẹẹ,

² “Vbe ikpẹdẹ nokaro ọghe uki nokaro, u ghi mu Owa Ukpọn nii mudia, ọghe ehe ne Nọyaẹnmwa ye.

³ U ghi mu avbe uhanhan uhi igbe ye uwu ẹre ne u mu ukpọn onurho ye odaro ẹre.

⁴ U ghi mu eteburu nii la owa ne u viọ emwi ne a ya ru emwi hia yan rẹn. U ghi vbe mu erhan ọmukpa ladian ne u vbe viọ avbe ukpa yọ.

⁵ Mu aka igoru ne a na giẹn eturari ye odaro ẹkpẹti ne avbe uhanhan uhi igbe ye ne u vbe de ukpọn onurho ye onurho Owa Ukpọn nii.

⁶ Mu aka ne a na giẹn emwi ne a ya zọ ese ye odaro Owa Ukpọn nii.

⁷ U ghi vbe mu uwawa akhuẹ ye ẹkpo Owa Ukpọn nii kevbe aka, ne u vbe sa amẹ vuọn rẹn.

⁸ U ghi mu ogba ọlẹga nii mudia ne u vbe de ukpọn onurho ye ehe ne a la la ogba ọlẹga nii.

⁹ “U ghi mu ori ne a nọnọ ye emwa uhunmwu ne u sanmwẹ ọẹn ye owa nii hia kevbe emwi hia nii rre uwu ẹre, vberriọ ọ ghi do khian ne ọ huanrẹn.

¹⁰ U ghi nọnọ ori ye aka ne a na giẹn emwi izọese kevbe avbe emwi ne a lo vbọ ehia. Vbe rriọ ọre u gha ya ya ẹe fi ohan, ọ ghi do gha re ne ọ kakabọ huan.

¹¹ U ghi vbe nọnọ ori ye uwawa akhuẹ ne ọ rrọọ ke ẹe kevbe emwi ne a muẹn yan, erriọ u gha ya ya ẹe fiohan.

¹² “U ghi rhie Errọn ke ẹe kevbe ivbi ẹre gha die onurho Owa Ukpọn ne iran khuẹ akhuẹ iruenmwi.

¹³ U ghi yọ Errọn ukpọn iruenmwi nii, u ghi nọnọ ori ye ọre uhunmwu, odẹ vbe rrọ ọre u gha ya ya ẹe fiohan ne ọ miẹn ehe na gha ga mwẹ zẹ vbe ohẹn.

¹⁴ Viọ avbe ivbi ẹre sikẹ evba ne u yọ iran ẹwu.

¹⁵ U ghi nọnọ ori ye iran uhunmwu, zẹ vbene u vbe ya nọnọ ori ye erha iran uhunmwu nii iran gha ga mwẹ zẹ vbe ohẹn Odẹ vberriọ iran gha re ohẹn rhinrin vbe ẹghẹ ne ọ dee.”

¹⁶ E Mosis keghi ru emwi hia zẹ vbene Nọyaẹnmwa wẹ ne ọ ru ẹe.

¹⁷ Rhunmwuda ọnii, vbe ikpẹdẹ nokaro ọghe ukpo nokaro vbe ọ ghi rre ukpo eva ne iran kpao vbe Igipt, a ke ghi mu Owa Ukpọn nii mudia.

¹⁸ E Mosis keghi mu Owa Ukpọn nii mudia, ọ keghi ru ẹzi ẹre yọ, ọ na ru edọnmwẹ ọnrẹn, ọ keghi vbe gbalọ ogba ugbugbe ẹre lele ẹe, ọ na vbe baba ọkpọ ẹre ye otọ.

¹⁹ Ọ keghi tan Owa Ukpọn nii yan ehe ne a dia nii, ọ na vbe mu emwi ne a ya gue Owa Ukpọn nii rhu ẹe, zẹ vbene Nọyaẹnmwa kha ma rẹn.

²⁰ Ọ keghi viọ avbe uhanhan Uhi Igbe nii ọ na viọ iran ye uwu ẹkpẹti nii.

²¹ Ọ keghi filo avbe ọkpọ nii la uwu ẹgba ne ọ rre ẹkpẹti nii, ọ na dele avbe ukpọn onurho nii degue ẹre yọ. Erriọ ọre ọ ya gie ẹe degue ẹre ighẹ ẹkpẹti nii ne avbe uhanhan uhi igbe ye, zẹ vbene Nọyaẹnmwa tama rẹn.

²² Ọ keghi mu eteburu nii ye uwu Owa Ukpọn nii vbe odẹ okuọ vbe a ma he la uwu ukpọn onurho.

²³ Ọ keghi vbe mu ebrẹd ne a ya zẹ ọhẹ gie Nọyaẹnmwa yan rẹn, zẹ vbene Nọyaẹnmwa tama rẹn.

²⁴ Ọ keghi mu erhan ọmukpa ye uwu Owa Ukpọn, ọ na mu aro da eteburu vbe odẹ ekẹn ọghe Owa Ukpọn.

²⁵ Ọ keghi rhu ukpa nii yan rẹn vbe odaro Nọyaẹnmwa, zẹ vbene Nọyaẹnmwa tama rẹn.

²⁶ Ọ keghi mu aka ọghe igoru nii ye uwu Owa Ukpọn vbe odaro ukpọn onurho.

²⁷ Ọ keghi giẹn eturari nẹ ọ winhin nii vbe uhunmwu ẹnrẹn zẹ vbene Nọyaẹnmwa tama rẹn.

²⁸ Ọ keghi dele avbe ukpọn onurho nii ye onurho Owa Ukpọn nii.

²⁹ Ọ keghi mu aka ne a na giẹn emwi izọese ye onurho Owa Ukpọn nii. Ọ keghi ya emwi izọese ne a wa giẹn uan zọ ese vbe uhunmwu ẹnrẹn, kevbe evbare ne a ya zẹ ọhẹ zẹ vbene Nọyaẹnmwa tama rẹn.

³⁰ Ọ keghi mu uwawa akhuẹ ye ẹkpo Owa Ukpọn nii ke aka, ọ na sa amẹ ne a ya khuẹ yọ.

³¹ E Mosis, Errọn kevbe avbe ivbi ẹre keghi kpe obọ kevbe owẹ iran vbọ.

³² Iran gha la Owa Ukpọn ra te iran ra gha rrie aka, iran ghi khuẹ zẹ vbene Nọyaẹnmwa tama e Mosis.

³³ Ọ keghi mu ogba ọlẹga nii mudia lẹga Owa Ukpọn nii kevbe aka, ọ kevbe de ukpọn onurho ye onurho ọlẹga nii. Ẹre Mosis na winna iwinna nii hia fo.

Okuku Vbe Uhunmwu Owa Ehe Ne Nọyaẹnmwa Ye

³⁴ Okuku keghi rhu yan Owa Ukpọn nii awanwan ne ẹ i gie a ghe ọghe Nọyaẹnmwa keghi vuọn rẹn.

³⁵ E Mosis ma sẹtin la uwu Owa Ukpọn nii rhunmwuda okuku ne ọ rhu uẹ yan rẹn, uyi ọghe Nọyaẹnmwa keghi vuọn rẹn.

³⁶ Ẹghẹikẹghẹ ne ivbi Izrẹl ya si ke ago ọkpa gha rrie ọvbehe, te iran miẹn wẹ okuku nii si hin uhunmwu owa ukpọn nii rre nẹ.

³⁷ A deghẹ okuku nii ma kpa, iran i vbe si gha rrie ago ọvbehe.

³⁸ Okuku nii ne ọ rhie maa wẹẹ e Nọyaẹnmwa rre evba ghi gha mudia yan Owa Ukpọn nii vbe avan, erhẹn ghi vbe gha ba vbọ vbe asọn vbe ehe ne ivbi Izrẹl hia gha na sẹtin bẹghe vbe uwu ẹghẹ hia ne iran ya gha si ke agọ dinna agọ.