Ẹksọdọs 36 - Edo Bible (E Baibol Ẹdo) Version 1996

¹ “E Bezalẹl, Oholiab kevbe emwa ifuẹro hia ne Nọyaẹnmwa rhie irẹnmwi kevbe ẹwaẹn na, ni vbe rẹn emwi hia ne a gha ya bọ ehe ne ne ọ huanrẹn nii, iran ghi ru emwi hia zẹ vbene Nọyaẹnmwa ta ẹe.”

Emwa Nii Zẹ Ọhẹ Nibun Rre

² E Mosis keghi tie Bezalẹl, Oholiab kevbe emwa ifuẹro hia ne Nọyaẹnmwa rhie ẹtin na, kevbe emwa hia ni mu egbe ne iran ya ru iyobọ, ọ tama iran wẹ ne iran suẹn iwinna.

³ Iran keghi miẹn e Mosis emwi izọhẹ hia ne ivbi Izrẹl viọ rre ne a ya bọ owa ne ọ huanrẹn nii. Ivbi Izrẹl keghi ye gha viọ emwi izọhẹ iran gie Mosis owiowiẹ.

⁴ Ẹre iran ni fuẹro nii, ni winna vbe iwinna ọghe owa ne ọ huanrẹn ne a bọ nii, keghi sẹ iwinna edọmwadẹ ọghọe rae, iran na gha dee.

⁵ Iran tama e Mosis wẹẹ, “Emwi ne emwa nii viọ rre bun gbe, ọ sẹẹ emwi ne a gha ya winna iwinna ne Nọyaẹnmwa wẹ ne a winna.”

⁶ Ẹre Mosis ghi na wẹ ne a ta ẹe gba agọ hia wẹẹ, “Omwa rhọkpa, ọre okpia ra okhuo nọ, ghẹ ghi viọ emwi rre ne a ya bọ owa ne ọ huanrẹn nii.” Ọna ọre ọ ghi ye emwa nii da obọ emwi ne a viọ rre yi.

⁷ Emwi ne iran viọ rre keghi bun gberra ne a gha lo ya winna iwinna nii fo.

Ubọmwẹ Owa Ukpọn Ehe Ne Nọyaẹnmwa Ye

⁸ Iran ni ghi fuẹro sẹ vbe uwu iran nii winna nene iwinna kegha bọ Owa Ukpọn nii. Igbu ukpọn igbe ne a ya eto ovbiohuẹ ne vbukhẹẹ ne a mẹ, ne raghoragho, ne ọ vboro rhan-an, kevbe eto ohuan ne a ye emwi ni zẹ ifuẹn do ona yi.

⁹ Ọkpọkpa vbe avbe igbu ni kegha re ọkpọ iwenẹ vbe utanmwẹ kevbe ọkpọ eva vbe uvbẹmwẹ, ukpọlọmwẹ ọkpa ọre ehia khin.

¹⁰ Ọ keghi dọlọ isẹn vbe uwu igbu nii kugbe ye ọkpa, ọ keghi vbe dọlọ ne isẹn nii dekẹe ye ọvbehe.

¹¹ Ọ keghi halọ uvun ne a dọlọ ukpọn ne raghoragho mu lẹga ehọ ọghe ne ọ ke ore vbe ọkpọkpa.

¹² Ọ keghi do uvun ekigbe siyeha ye ukpọn nokaro, ekigbe siyeha kevbe gha rre ne ogieva vbe ne ọ na gua ẹe ro.

¹³ Ọ keghi sẹ uvun ekigbe siyeha ọghe igoru, evba ọre ọna dọlọ eveva kugbe. Ọna kegha re owa ukpọn ehe ne Nọyaẹnmwa ye ọkpa.

¹⁴ Ọ keghi vbe do igbu owọrọ ọghe eto ẹwe ne ọ ya gue owa ukpọn ne a dia nii.

¹⁵ Ọkpọkpa vbe igbu nii kegha re ọkpọ ekesugie vbe utanmwẹ kevbe ọkpọ eva vbe uvbẹmwẹ, ehia kegha re umwọmwẹ vbe ukpọlọmwẹ.

¹⁶ Ọ keghi dọlọ isẹn kugbe ye ọkpa, ọ keghi vbe dọlọ ehan nii dekẹe ye ọkpa.

¹⁷ Ọ keghi do uvun ekigbe siyeha ya ehọ igbu ne okiekie vbe enokaro kevbe uvun ekigbe siyeha vbe enọkpa.

¹⁸ Ọ keghi ru aban oze ekigbe siyeha ne ọ ya dee eveva kugbe ne ọ do gha re owa ukpọn ọkpa.

¹⁹ Ọ keghi ya ohian ogho ne ọ baa se ugue yan owa ukpọn nii kevbe ohian ẹmila ne mose ne a gha wa yan ọnii.

²⁰ Ọ keghi ya erhan akasia ru ọkpọ ni mudia kpasi ọghe Owa Ukpọn.

²¹ Ọ keghi ru edọnmwẹ ọnrẹn ọkpọkpa ne ọ gha re ibata ekesugie vbe utanmwẹ kevbe akhuẹn obọ eha irrọvbọgban vbe uvbẹmwẹ.

²² Ọ keghi vbe ya abọ ọkpa fian te eveva ne a ya gha de iran kugbe ọ keghi ru edọnmwẹ ọghe Owa Ukpọn ne a dia nii, deba ne avbe rhie te ẹe hia.

²³ Ọ keghi ru edọnmwẹ ugie ye odẹ ekẹn vbọ.

²⁴ Ọ kevbe ru ẹzi ẹre iyeva ọghe esiliva ne a viọ ye ototọ ẹre, ẹzi eva vbe edọnmwẹ ọkpọkpa.

²⁵ Iran keghi ru edọnmwẹ ugie ye odẹ ahọ ọghe owa ukpọn,

²⁶ kevbe emwi ne a mu ẹẹn yan ọghe esiliva iyeva, eveva vbe ẹzi edọnmwẹ ọkpọkpa.

²⁷ Vbe iyeke Owa Ukpọn nii, vbe ascfẹn orrie vbọ, ọ keghi vbe ru edọnmwẹ ehan.

²⁸ Ọ kevbe ru edọnmwẹ eva ye igọgọ odieke Owa Ukpọn nii.

²⁹ Ẹdọnmwẹ igọgọ na, a keghi ku ẹe gbe vbe ototọ, a keghi vbe ku ẹe gbe gha khian ya sẹ odukhunmwu, ya sẹ ọmwa nokaro vbene a ya ru edọnmwẹ eva nii rre igọgọ ẹre, ọre ọnii khin.

³⁰ Ọ nii rhie ma wẹ edọnmwẹ erẹnrẹn ọre ọ gha rrọọ kevbe wẹ ẹzi enẹ irrọvbugie ọghe esiliva eva vbe ototọ ọkpọkpa.

³¹ Ọ keghi vbe ya erha akasia ru erhan ne a mu gbe odẹ, isẹn ghi gha rre edọnmwẹ vbe asefẹn ọkpa ọghe Owa Ukpọn nii.

³² Isẹn vbe edọnmwẹ ne ọ rre asefẹn nọkpa kevbe isẹn vbe asefẹn orrie vbe iyeke ẹre.

³³ Ọ keghi ru ogba ugbugbe ẹre ne ọ sẹ adesẹneva ideghedeghe edọnmwẹ nii ne ọ ke obọkpa ya sẹ obọ nọkpa.

³⁴ Ọ keghi ya igoru rhu edọnmwẹ nii, ọ na vbe viọ ẹgba igoru lele ẹe ne ọ mu ogba ugbugbe nii ne a vbe ya igoru rhu mwẹ.

³⁵ Ọ keghi ya eto ohuan ne raghoragho, ne ọ vboro rhan-an kevbe ne ọ baa, ru ukpọn onurho ẹre deba eto ovbiohuẹ ne vbukhẹẹ ne a mẹ, ne a vbe ye ama avbe emwi ni zẹlẹ ifuẹn mu ona lele.

³⁶ Ọ keghi ya erhan akesia enẹ ru ọkpọ ne ọ da nene ukpọn onurho yi, a ya igoru rhu ẹe, a keghi vbe viọ aban igoru lele ẹe, ọ kegha re ẹzi esiliva enẹ ne ọ da avbe ọkpọ nii yi.

³⁷ Ọ keghi ya eto ohuan ne raghoragho, ne ọ vboro rhan-an kevbe ne ọ baa deba eto ovbiohuẹ ne vbukhẹẹ ne a do ama ya zẹ ose yi ru ukpọn onurho Owa Ukpọn nii.

³⁸ Ọ keghi ru ọkpọ isẹn ne a kan aban lele, ọ keghi ya igoru rhu ikinnegbe ẹre kevbe odukhunmwu ẹnrẹn, ọ keghi ru ẹzi isẹn ye nene ọkpọ.