Ẹksọdọs 35 - Edo Bible (E Baibol Ẹdo) Version 1996

Ilele Ẹdẹ Ikẹtin

¹ E Mosis keghi tie ivbi Izrẹl hia si koko, ọ keghi tama iran wẹẹ, “Emwi ne Nọyaẹnmwa yi ẹre iyi wẹ ne uwa gha ru ọre ena khin:

² Ẹdẹ ehan ọre uwa gha ya gha winna sokpan ẹdẹ ne ogihinrọn ghi gha re Ẹdẹ Ikẹtin ne ọ huanrẹn ne uwa, Ẹdẹ ọghe Ikẹtin ne a ya fiohan ne ime ne Nọyaẹnmwa. Ọmwaikọmwa ne ọ winna ẹn ẹdẹrriọ, a gha gbe ẹe rua.

³ Wa ghẹ kue hie erhẹn vbe owa uwa vbe Ẹdẹ Ikẹtin.”

Izọhẹ Ọghe Ehe Ne Ọ Huanrẹn

⁴ E Mosis keghi tama emwa Izrẹl hia wẹẹ, “Emwi ne Nọyaẹnmwa yi ẹre iyi ọre ọna khin.

⁵ Wa ghi zọhẹ gie Nọyaẹnmwa. Dọmwadẹ ọghọe ne ọ rhirhi gha ho ne ọ ru vberriọ ghi viọ emwi izọhẹ na rre: Igoru, esiliva, oze.

⁶ Eto ohuan ne raghoragho, ne ọ vboro rhan-an, kevbe ne ọ baa, eto ovbiohuẹ ne vbukhẹẹ, ukpọn ne a ya eto ewe do.

⁷ Ohian ogho ne a ya ẹmu ne ọ baa gbe, ohian ne vbukhẹẹ, erhan akasia.

⁸ Ofigbọn ne a ya rhu ukpa, emwi ni winhin ne a viọ ye ofigbọn ne a nọnọ ye emwa uhunmwu, kevbe ne a viọ ye eturari ni winhin ẹsẹse,

⁹ ikpẹrọnmwọ ni kọnkọn kevbe ikpẹrọnmwọ ne a gha ya zẹ adaghọ kevbe uhanhan ẹwẹe ọghe ogie ohẹn ose.

Emwi Ọghe Agọ Ehe Ne Nọyaẹnmwa Ye

¹⁰ “Emwa ifuẹro nii rre uwu owa hia ghi gha dee ne iran do ru emwi hia ne a yi ẹre iyi.

¹¹ Ehe ne a dia, owa ukpọn kevbe emwi ne a ya gue ẹre, adẹn ni rrọọ kevbe edọnmwẹ ọnrẹn, erhan ne a viọ gbe ẹre, ọkpọ nii rrọọ kevbe ẹzi ẹre.

¹² Ẹkpẹti ke avbe ọkpọ nii rrọọ, ugue ẹkpẹti nii, kevbe ukpọn onurho ne ọ degue ẹre.

¹³ Eteburu, ọkpọ nii rrọọ kevbe emwi ne a ya ru emwi vbọ hia, kevbe ebrẹd ne a ya zọhẹ gie Osa.

¹⁴ Erhan ọmukpa ne a mu ukpa yi, kevbe emwi ne a lo vbe evba hia, ukpa nii rrọọ, kevbe ofigbọn ọghe ukpa.

¹⁵ Aka ne a na giẹn eturari kevbe ọkpọ ni rrọọ. Ofigbọn ne a nọnọ ye emwa uhunmwu, eturari ne ọ winhin, kevbe ukpọn onurho ne ọ rre onurho Owa Ukpọn ne a dia.

¹⁶ Aka ne a na zọhẹ ne a giẹn uan, kevbe oze ne a ya wiẹn emwi ne a so ginna ẹn, ọkpọ ni rrọọ kevbe emwi ni lele ẹe khian, uwawa akhuẹ kevbe uhe ẹre.

¹⁷ Ukpọn onurho ọghe ọlẹga ẹre, ọkpọ ni rrọọ, oze iran, ukpọn onurho ne ọ rre ehe ne a la la ọlẹga ẹre.

¹⁸ Ukeke igbe kevbe irri ni rre ehe ne a dia kevbe ọlẹga ẹre.

¹⁹ Ukpọn aghanghan ne ohẹn ya ru ugamwẹ vbe ehe ne ọ huanrẹn, avbe ukpọn ne ọ huanrẹn ọghe Errọn ne ohẹn kevbe avbe ivbi ẹre vbe ugamwẹ iran zẹ vbe ohẹn.”

Emwa Zẹ Ọhẹ Rre

²⁰ Ivbi Izrẹl hia keghi kpao.

²¹ Dọmwadẹ emwa ne ọ ho ne ọ ru vberriọ keghi zọhẹ gie Osanobua ne a ya bọ Owa Ukpọn ehe ne Nọyaẹnmwa ye, emwi ne a ya ru ugamwẹ hia kevbe ne a ya sẹ ukpọn iruemwi.

²² Ikpia kevbe ikhuo kevbe dọmwadẹ emwa ni ho keghi viọ ukotin ne a ya te emwi egbe rre, emwiehọ, oroka, emwiurhu, kevbe ikpẹrọnmwọ igoru ne iran ya fi ohan, zẹ vbe emwi izọhẹ gie Nọyaẹnmwa.

²³ Dọmwadẹ ọghọe ne ọ mwẹ eto ohuan ne raghoragho, ne ọ vboro rhan an, ra ne ọ baa, eto ovbiohuẹ ne vbukhẹẹ, ukpọn eto ẹwe, ohian ogho ne a ye emwi ne ọ baa gbe ra ohian ne vbukhẹẹ kegha viọ emwi ne iran mwẹ rre.

²⁴ Iran ne obọ ẹre vbe sẹ esiliva ra oze kevbe viọ izọhẹ iran gie Nọyaẹnmwa, iran ni vbe mwẹ erhan akasia ne ọ gha gie a lo ye emwi ne a kae hia keghi vbe viọ rre.

²⁵ Ikhuo ni fuẹro hia keghi ya eto ohuan ne raghoragho, ne ọ vboro rhan-an, kevbe ne ọ baa, sin oru ba eto ovbiohuẹ ne vbukhẹẹ viọ rre.

²⁶ Avbe ikhuo ni fuẹro hia keghi vbe ya eto ewe sin oru.

²⁷ Avbe ọkaolotu keghi viọ ikpẹrọnmwọ ni maa rre, ikpẹrọnmwọ ne a gba ye ẹwu iruemwi, kevbe uhanhan ukpọn ẹwẹe.

²⁸ Emwi ni winhin kevbe ofigbọn ọghe ukpa, kevbe ne a ya nọnọ ori ye emwa uhunmwu kevbe ọghe eturari ne ọ winhin.

²⁹ Ikpia kevbe ikhuo hia ni rre Izrẹl, ni vbe ho ne iran mwẹ obọ vbe iwinna ne Nọyaẹnmwa gie Mosis do kha wẹ ne a ru, keghi viọ emwi izọhẹ iran gie Nọyaẹnmwa.

Emwa Ni Winna Vbe Owa Ukpọn Ehe Ne Nọyaẹnmwa Ye

³⁰ E Mosis keghi tama ivbi Izrẹl wẹẹ, “E Nọyaẹnmwa zẹ Bezalẹl ne ovbi Uri ne ovbi e Họ ne ẹwae Juda.

³¹ Ọ ya orhiọn Osanobua vuọn rẹn sẹrriọ wẹ te ọ ghi mwẹ ifuẹro ẹtin kevbe irẹnmwi ne a ya winna iwinna ifuẹro hia.

³² Ne ọ ya mwamwa ona ogie ẹwaẹn kevbe ne ọ vbe ya igoru, esiliva kevbe oze ru ẹe.

³³ Ne a ya giagia ikpẹrọnmwọ, ne a ya te emwi, ne a ya gbẹn erhan, kevbe iwinna ifuẹro ughughan ọvbehe.

³⁴ E Nọyaẹnmwa vbe rhie ne irẹn kevbe Oholiab ne ovbi Ahisamak ne ẹwae e Dan, ẹwaẹn ne iran vbe ma emwa ọvbehe ifuẹro iran.

³⁵ Ọ vbe rhie ifuẹro ne iran ya gha ru emwi hia ne owinna ru, emwa ni ya eto ohuan do ukpọn ne raghoragho, ne ọ vboro rhan an, kevbe ne ọ baa kevbe eto ovbi ohuẹ ne vbukhẹẹ kevbe ọghe emwa ni do ido kẹkan. Iran sẹtin winna iwinna ifuẹro hia, emwa ne ẹwaẹn emwi ne a mwa gba na iran khin.