Ẹksọdọs 30 - Edo Bible (E Baibol Ẹdo) Version 1996

Aka Ọghe Eturari

¹ “U ghi bọ aka ne a na giẹn eturari. U ghi ya erhan akesia ru ẹe.

² U ghi gie ẹe gha re umwọmwẹ vbe igienenẹ, akhuẹn obọ eva irrọ vbe ugie vbe utanmwẹ ke eva irrọ vbe ugie vbe uvbẹmwẹ, ọ ghi vbe gha re ibata eha vbe uyomwẹ. Ehọ ẹre ne ọ tan ladian hia ghi wa vbe gha re ọkpa ba irẹn tobọ ẹre.

³ U ghi ya igoru ne a ma gua rhu ẹre odukhunmwu kevbe igienenẹ, vbe ya igoru ne a ma gua rhu igẹngẹn ọnrẹn, u ghi vbe ya igoru ru okhiẹ ọre lẹga.

⁴ U ghi ya igoru ru ogba ne a ya muẹn eva yọ, u ghi sele ẹe yọ vbe asefẹn ọnrẹn vbe ototọ igẹngẹn ọnrẹn vbe obọ eveva ne a gha rhie ogba ne a ya muẹn la ẹe vbe a khian muẹn.

⁵ U ghi ya erhan akesia ru avbe ogba na, u ghi vbe ya igoru rhu iran.

⁶ U ghi mu aka na ye odaro ukpọn onurho ne ọ rre vbe a te sẹ ehe ne ẹkpẹti Ile ye.

⁷ Owiẹ ọghe ẹdẹ hia ọre Errọn gha ya gha giẹn eturari ne ọ winhin vbe uhunmwu ẹnrẹn vbe ọ gha rre do dọlọ urhukpa nii yi.

⁸ Ọ ghi vbe ru ẹe vberriọ vbe ọ gha do rhu ukpa nii vbe ota. Eturari ne a giẹn na, a ghẹ da obọ ẹre yi ẹdẹdẹmwẹdẹ vbe orre uwa hia.

⁹ Wa ghẹ giẹn eturari awua vbe uhunmwu ẹnrẹn ra aranmwẹ ne a giẹn uan ne a ya zọ ese ra evbare ne a ya zẹ ọhẹ, wa ghẹ hihiẹ izọhẹ ne a da yan rẹn.

¹⁰ Errọn ghi ru ugamwẹ ayabọ orukhọ ọghe ukpẹ enenẹ nii rrọọ uhukpa vbe ukpo. Ọ ghi lo esagiẹn emwi ne a gbe ya zọ ese ye orukhọ. Wa ghi yevbe gha ru vberriọ vbe orre ne ọ dee. A ghi gie ẹe gha re aka ne ọ huanrẹn ẹsẹse ne a ya fi ohan ne imẹ ne Nọyaẹnmwa.”

Igho Uhunmwu Owa Ukpọn Ne A Ya Rẹn We E Nọyaẹnmwa.

¹¹ E Nọyaẹnmwa keghi tama e Mosis wẹẹ,

¹² “U gha ghi ka ivbi Izrẹl ne dọmwadẹ ọghọe ghi gha ha igho uhunmwu ẹnrẹn gie imẹ ne ọkhọ ghe sunu vbe egbe iran vbe a gha ka emwa nii.

¹³ Emwa ne a rhirhi ka ba ẹre, te ọ gha ha inu igho ne a tie yọ, a ghi mwa rẹn zẹ vbe ne a ta ẹe ighẹ a ya mwa emwi vbe ẹvbo. Emwa hia ghi gha ha ọna zẹ vbe emwi izọhẹ gie imẹ.

¹⁴ Emwa hia ne a ghi ka nẹ vbe ẹghẹ na ọnii nọ wẹ emwa ni rre ikpugie ra ne ọ wan sẹ ọnii, ghi gha ha igho na gie imẹ.

¹⁵ Ọdafẹn i hae sẹ ovbiogue, ovbiogue i vbe hae rriotọ sẹ ọdafẹn, vbe uwa a gha ha igho uhunmwu uwa na.

¹⁶ U ghi miẹn ivbi Izrẹl igho na, ne u gha lo ẹre ye iwinna ne a winna vbe Owa Ukpọn ne a ya rẹn ighẹ I rre evba. Ọna ghi gha ya mwẹ ye ẹmwẹ ivbi Izrẹl rre, ọ ghi gha re igho ne uwa ha ye uhunmwu uwa.”

Uwawa Oze

¹⁷ E Nọyaẹnmwa keghi tama e Mosis wẹẹ,

¹⁸ “U ghi dunmwu uwawa oze ne ototọ ẹre vbe re oze. U ghi muẹn ye ẹkpo Owa Ukpọn kevbe aka, u ghi sa amẹ yọ.

¹⁹ Errọn kevbe ivbi ẹre ghi gha ya amẹ na kpe obọ vbe owẹ.

²⁰ iran te gha la uwu Owa Ukpọn ne a na miegbe ra te iran ghi sikẹ aka ne iran ya winna iwinna iran zẹ vbe ohẹn, a i ghi ra gbele iran an a deghẹ iran ka ye amẹ nii khuẹ nẹ.

²¹ Te iran gha kpe obọ kpe owẹ ne iran ghẹ wulo. Uhi ne ọ kere ne iran kevbe ivbi uniẹn iran dayi ẹdẹdẹmwẹdẹ ọre ọna khin.”

Ofigbọn Ne A Nọnọ Ye Uhunmwu

²² E Nọyaẹnmwa keghi tama e Mosis wẹẹ,

²³ “Viọ avbe ikpẹ ọmọ erhan ni winhin ni maa sẹ nii, uwan iweva ọghe oziya ne ọ ranran ẹn, uwan ehan ọghe sinamọn ne ọ winhin, uwan ehan ọghe ukhuerhe ne ọ winhin,

²⁴ uwan iweva ọghe kasia (a ghi mwa ehia zẹ vbene a ya mwa emwi vbe ọgua Osa) kevbe egalọn ọkpa ọghe ori oliv.

²⁵ U ghi ya ena ru ofigbọn ne ọ huanrẹn ne a nọnọ ye emwa uhunmwu.

²⁶ Ne a guare zẹvbe emwi ne ọ winhin ne a sa ye egbe. U ghi vbe miẹn ẹnrẹn yan Owa Ukpọn ne a na miegbe, Ẹkpẹti ne avbe uhanhan ayere ye.

²⁷ Eteburu kevbe emwi ne a ya ru emwi hia, erhan ọmukpa, kevbe emwi ne a ya ru emwi vbọ hia, aka ne a na giẹn eturari.

²⁸ Aka ne a na zọ ese ne a giẹn uan kevbe emwi ne a ya ru emwi vbọ hia, deba uwawa akhuẹ kevbe emwi ne a muẹn yan.

²⁹ Erriọ u gha ya ye avbe emwi na hia fiohan, iran ghi do gha re ne ọ huan fo, emwi ne ọ rhirhi dekan iran gha miẹn ikuan egbe rhunmwuda uhuanmwẹ ọnrẹn.

³⁰ U ghi nọnọ ori ye Errọn uhunmwu ke ẹe kevbe avbe ivbi ẹre, u ghi ya iran fi ohan ne iran gha ga mwẹ zẹ vbe ohẹn.

³¹ U ghi tama ivbi Izrẹl wẹẹ, ‘Ofigbọn ne ọ huanrẹn na ne a nọnọ ye emwa uhunmwu, wa gie ẹe gha re emwi ne ọ huanrẹn vbe aro uwa vbe orre ne ọ dee hia.

³² Wa ghẹ tue ẹre yan ọmwa kẹkan wa ghẹ vbe viọ emwi ne a ya ru ẹe ne uwa vbe ru ọvbehe ya ta ẹre. Emwi iruemwi nọ, wa ghi vbe ya obọ emwi iruemwi muẹn.

³³ Ọmwaikọmwa ne ọ ru ọvbehe ya ta ẹre, ra ne ọ lo vbọ ye egbe ọmwa nẹ i re ohẹn, a ghi kan ẹn fua hin uwu ẹbu emwa rẹn rre!’ ”

Eturari

³⁴ E Nọyaẹnmwa tama e Mosis wẹẹ, “Viọ avbe emwi ne ọ winhin ne I ra sunu yi na umwọmwẹ vbe ọkpọkpa, estakt, oinkia, galbanum, kevbe eturari ne a ma gua.

³⁵ Ya ehia ru emwi ne ọ winhin zẹ vbene iran ni ru emwi ni winhin ne a ya wuo ru ẹe, a ghi ya umwẹ yọ, ya ẹe khian ne ẹ i mwẹ iruẹn kevbe ne ọ huanrẹn.

³⁶ U ghi dunmwu eso vbọ rẹnkhẹn u ghi gha lo eso vbọ vbe odaro Ẹkpẹti Osẹe vbe uwu Owa Ukpọn ne a ya rẹn ighẹ mẹ rre evba, ehe ne I gha na do gha vbe ruẹ. U ghi gha ya obọ mu eturari na zẹ vbe emwi ne ọ huanrẹn ẹsẹse.

³⁷ Ghẹ vbe rhọ egbe emwi vberriọ ya ru eturari ọghe uwa. U ghi ya obọ muẹn zẹ vbe emwi iruemwi ne a ya fiohan ne imẹ ne Nọyaẹnmwa.

³⁸ A deghẹ ọmwaikọmwa ta ẹre ya ru ne egbe ẹre a i ghi vbe ka ẹe ba avbe emwa mwẹ.”