Ẹksọdọs 26 - Edo Bible (E Baibol Ẹdo) Version 1996

Owa Ukpọn Ọghe Nọyaẹnmwa

¹ “Wa ghi ya igbu igbe ọghe eto ovbiohuẹ ne a mẹ, bọ owa ukpọn ne imẹ dia, deba eto ohuan ne raghoragho, ne ọ vboro kian an kevbe ne ọ baa. A ghi munọ ona avbe emwi nii zẹ ifuẹn ye avbe igbu ukpọn na mose mose.

² Ọkpọkpa vbe igbu ukpọn ghi gha re ọkpọ iwenẹ vbe utanmwẹ kevbe ọkpọ eva vbe uvbẹmwẹ, ẹ i vbe kpọlọ sẹ egbe.

³ A ghi dọlọ isẹn kugbe ke a ghi vbe dọlọ isẹn nọkpa vberriọ.

⁴ U ghi ya ukpọn ne raghoragho ru ehe ne a fi emwi la lele ehọ ẹre ne ọ mu da ore vbe ọkpọkpa vbọ.

⁵ Ru ehe ne a fi emwi la ekigbe siyeha ye igbu nokaro ọghe nokaro kevbe ekigbe siyeha ne ọ gua ẹe ro ye igbu ne ogieva.

⁶ U ghi ru aban igoru ekigbesiyeha ne ọ gha de e eva kugbe ne ọ miẹn ehe na khian ehe ne a dia ọkpa kẹkan.

⁷ “U ghi ya eto ẹwe do ukpọn igbu owọrọ ne a ya bọ owa ukpọn yan ehe ne a dia nii.

⁸ Ọkpọkpa vbọ ghi gha re ọkpọ ekesugie vbe utanmwẹ, ọkpọ eva vbe uvbẹmwẹ, ehia ghi vbe gha re ọkpa vbe ukpọlọmwẹ.

⁹ U ghi sẹ isẹn kugbe ne ọ gha re ọkpa, ehan nii dekẹe ghi vbe gha re ọkpa. U ghi bun ẹre eva yan egbe yan odaro owa ukpọn nii ighẹ ne a ye igbu ehan sẹ vbọ nii.

¹⁰ U ghi ru uvun na fi emwi la ekigbesiyeha lele ehọ ọghe ne okiekie nii. Kevbe ekigbesiyeha ye enọkpa.

¹¹ U ghi ru aban ọghe ose ekigbesiyeha ne u viọ iran ye uvun ekigbesiyeha nii ne a ya de ukhukhu eva nii kugbe ne iran do gha re owa ukpọn ọkpa.

¹² Obọ ọkpa vbe igbu ne a mu yan owa ukpọn nii ghi tuo yan iyeke ehe ne a dia nii.

¹³ Ọkpa ukpọn ne ọ ghi dekẹe vbe obọ e eva ọghe utanmwẹ owa ukpọn nii, ghi tuo ghe otọ vbe asefẹn ehe ne a dia nii ne ọ de gue ẹre.

¹⁴ U ghi ru emwi ne a ya gue ẹre eva ọvbehe, ọkpa ọghe ohian ogho ne a ya ẹmu ne ọ baa gbe, kevbe nọkpa ohian ne vbukhẹẹ, ne a ya gha gue ẹre vbe iyeke ẹre.

¹⁵ “U ghi ru edọnmwẹ ne ọ mudia kpasi ne a ya erhan akesia ru ne ehe ne a dia nii.

¹⁶ Edọnmwẹ ọkpọkpa ghi gha re ibata ekesugie vbe utanmwẹ kevbe akhuẹn obọ eha irrọvbọgban vbe uvbẹmwẹ.

¹⁷ A ghi vbe rhie ne a fian te ẹe umwọmwẹ ye e eva ne edọnmwẹ nii miẹn ehe na gie a gha si kugbe. Omwa ne u gha ya ru edọnmwẹ ọghe ehe ne a dia nii ọre ọna khin.

¹⁸ U ghi ru ugie vbe odẹ ekẹn ọnrẹn.

¹⁹ U ghi ru owẹ iyeva ọghe esiliva yọ ne ọ gha rre ototọ ẹre, owẹ eva ne edọnmwẹ ọkpọkpa ne ọ da orhiete eveva na yi.

²⁰ U ghi ru edọnmwẹ ugie ye odẹ okuọ ehe ne a dia nii.

²¹ U ghi ru edọnmwẹ ugie kevbe owẹ esiliva iyeva, eva vbe ototọ edọnmwẹ ọkpọkpa.

²² Vbe iyeke owa ukpọn nii vbe odẹ orrie ẹre, u ghi ru edọnmwẹ ehan.

²³ Kevbe edọnmwẹ eva ye ugẹngẹn ne ọ rre iyeke owa ukpọn nii.

²⁴ Vbe edọnmwẹ ugẹngẹn na, a ghi ku ehia gbe vbe ototọ, a ghi sẹ ẹe kugbe wa ya sẹ odukhunmwu vbe ehe ne ẹgba nokaro ye. Vbene a gha ru edọnmwẹ eva nii rre ugẹngẹn hẹ ọre ọna khin.

²⁵ Edọnmwẹ erẹnrẹn ọre ọ khian gha rrọọ, ke ẹe kevbe owẹ esiliva enẹ irrọvbugie, eva vbe ọkpọkpa.

²⁶ “U ghi vbe ya erhan akesia ru erhan ne a mu gbe ẹre ekesugie, isẹn ghi gha rre edọnmwẹ ne ọ rre obọkpa ọghe owa ukpọn nii.

²⁷ Isẹn ghi vbe gha rre obọ nọkpa, isẹn ghi vbe gha rre odẹ orrie ẹre vbe iyeke ẹre.

²⁸ Erhan ne a mu gbe ẹre adesẹneva, vbe a gha fian uyomwẹ ọnrẹn ye iheva, ghi wa la ẹe khinkhian ke obọkpa ya sẹ obọ ne ogieva.

²⁹ U ghi ya igoru rhu edọnmwẹ na, u ghi vbe viọ ẹgba ọghe igoru yọ ne ọ gha da erhan ne a ya gba yi mwẹ. U ghi vbe ya igoru rhu ena.

³⁰ Ọnii nọ wẹ te u ra wa bọ owa ukpọn nii zẹ vbe ne a mu ma ruẹn vbe uhunmwu oke.

³¹ “U ghi ru ukpọn onurho ne a ya eto aranmwẹ ne raghoragho ne ọ vboro kian an, kevbe ne ọ baa, kevbe eto ovbiohuẹ ne a do sẹ. U ghi do ama avbe emwi nii zẹ ifuẹn mose mose lele ẹe.

³² U ghi de ẹre mu ọkpọ ne a ya erhan akesia ru ne a vbe ya igoru rhu, ne a vbe viọ aban lele, ne a vbe ya owẹ esiliva enẹ mu mudia.

³³ U ghi viọ avbe ukpọn onurho nii la ototọ avbe aban nii vbe okpo ọghe avbe owa ukpọn nii. U ghi mu ẹkpẹti ne uhanhan ayere nii ye ye iyeke ukpọn onurho nii. Ukpọn onurho nii ghi fian ehe ne ọ Huanrẹn hin ehe ne ọ Huan sẹ ehia nii.

³⁴ Ya ugue gue Ẹkpẹti Ile.

³⁵ U ghi mu eteburu ye vbe a ma hie sẹ ukpọn onurho. U ghi mu erhan ọmukpa ye odẹ ọghe Owa Ukpọn nii ne ọ mu aro da eteburu ne ọ rre odẹ okuọ ẹre.

³⁶ “U ghi ya eto aranmwẹ ne raghoragho, ne ọ vboro kian-an. kevbe ne ọ baa ne a do kevbe ne a munọ emwi ona ne a do ya zẹ ose yi sẹ ukpọn onurho ye ehe ne a la la uwu owa ukpọn nii.

³⁷ U ghi vbe ya erhan akesia ru ọkpọ isẹn ọghe ukpọn onurho na, a ghi ya igoru rhu ẹe, a ghi viọ aban igoru lele ẹe. U ghi ya oze ru owẹ isẹn ye avbe ọkpọ na.