Ẹksọdọs 25 - Edo Bible (E Baibol Ẹdo) Version 1996

Emwi Izọhẹ Ọghe ọgua Osa

¹ E Nọyaẹnmwa keghi tama e Mosis,

² “Tama ivbi Izrẹl ne iran rhie izọhẹ gu mwẹ. Miẹn iran emwi ne iran a rhirhi ya ru izọhẹ rre.

³ Emwi ne iran gha ya zẹ ọhẹ rre ọre ena khin, igoru, esiliva kevbe oze.

⁴ Eto aranmwẹ ne raghoragho, ne ọ baa kevbe ne ọ vboro yan an, eto ovbiohuẹ ne yẹnghẹẹn, ukpọn ne a ya eto ewe ru.

⁵ Ohian ogho, ne a ya ẹmu ne o baa mu, ohian ẹmila ne vbukhẹẹ, ẹkpo umẹ.

⁶ Ofigbọn ne a sa ye ukpa, emwi nii winhin ne a gha ya gua ofigbọn ne a nọnọ ye emwa uhunmwu kevbe eturari ne ọ winhin ẹsẹse.

⁷ “Ikpẹrọnmwọ ne mosee kevbe ikpẹrọnmwọ ne a ra ya te adaghọ ogiohẹn egbe, kevbe ne a ra viọ ye uhanhan ẹwẹe ọghe ogiohẹn.

⁸ Iran ghi bọ ọgua Osa mẹ ne I mẹ miẹn ehe na gha rre ehe ne iran ye.

⁹ U ghi ru ehe ne a dia na kevbe emwi ne a ya te ẹre zẹ vbene I gie ẹre ma ruẹn.

Ẹkpẹti Ile

¹⁰ “Ye erhan akesia ru ẹkpẹti ne ọ gha re akhuẹn obọ isẹnyan-iyeva vbe utanmwẹ, akhuẹn obọ ehairrọvbọgban vbe uvbẹmwẹ, kevbe ehairrọvbọgban uyomwẹ.

¹¹ U ghi ya igoru na ma gua rhu ẹe vbe uwu ẹre kevbe iyeke ẹre, u ghi vbe ya igoru ru ehọ ẹre lẹga.

¹² Wa ghi vbe ru ẹgba igoru ne a gha ya gha muẹn, so ye ẹre igie enenẹ, ẹgba eva vbe obọ ọkpọkpa.

¹³ Wa ghi ya erhan akesia ru ọkpọ, wa ghi ya igoru rhu ẹe.

¹⁴ Wa ghi fi ọkpọ la ẹgba vbe obọ ọghe ẹkpẹti ne a ya gha muẹn.

¹⁵ A ghi sẹ avbe ọkpọ nii rae ye uwu ẹgba nii, a i vbe yuo ẹre ladian vbọ.

¹⁶ “U ghi viọ avbe uhanhan okuta ne a gbẹnnẹ avbe uhi nii yi ne I gha mu nuẹn ye uwu ẹkpẹti nii.

¹⁷ U ghi ya igoru ne ama gua ru ugue yọ, ọ ghi gha re akhuẹn obọ isẹn yan iyeva vbe utanmwẹ kevbe akhuẹn obọ ehairrọvbe ọgban vbe uvbẹmwẹ.

¹⁸ Ya igoru ne a ya umọmọ dunmwu ru emwi nii zẹ ifuẹn eva.

¹⁹ Ọkpọkpa vbe obọ ọkpọkpa ọghe ugue nii. U ghi ru ẹe vbene a gha na miẹn wẹ te iran vbe ẹkpẹti nii wa gha re okpa.

²⁰ Avbe emwi nii zẹ ifuẹn nii ghi viọ aro da egbe. Ifuẹn ne iran rhanrẹn ghi degue ẹkpẹti nii.

²¹ U ghi viọ uhanhan okuta eveva nii ye uwu ẹkpẹti na, ne u vbe mu ugue ẹre rhu ẹe.

²² Evba I gha na do gha miẹn ruẹn, I gha vbe mudia ye ugue Ẹkpẹti ne, I do rhie uhi mwẹ hia ne uwa ke adesẹneva emwi nii nẹ ifuẹn nii gha dee, gie ivbi Izrẹl.

Eteburu Ọghe Ebrẹd Ne A Ya Zẹ Ọhẹ Gie Osanobua

²³ “Ya erhan akesia ru eteburu ọkpa ne ọ gha re akhuẹn obọ ehan yan ọgban vbe utanmwẹ, evairrọvbugie vbe uvbẹmwẹ, kevbe ehairrọvbọgban vbe uyomwẹ.

²⁴ Ya igoru ne ama gua rhu ẹe ne u vbe ru okhiẹ igoru yọ.

²⁵ Vbe ru ehọ ẹre yọ ne ọ gha re akhuẹn obọ eha vbe uvbẹmwẹ lẹga ẹre, ọ ghi gha re ọghe igoru.

²⁶ Vbe ru ẹgba igoru ne a ya muẹn ye ọre igienenẹ vbe dọmwadẹ ehe ne owẹ ọre ye.

²⁷ Avbe ẹgba ne a ra gha fi erhan la ya muẹn nii, a ghi viọ iran sikẹ ehọ ẹre.

²⁸ U ghi ya erhan akesia ru ogba na, ne u ya igoru rhu ẹe.

²⁹ U ghi ru avbe ọkpan, ukpu, uru kevbe agbada ne a gha ya gha ru izọhẹ ọghe ayọn. Ena hia, igoru ne ama gua ọre a gha ya ruẹ.

³⁰ A ghi mu eteburu nii, ye odaro Ẹkpẹti Ile nii, Ebrẹd iruemwi, ne a ya ru izọhẹ gunmwẹ ghi gha rre uhunmwu eteburu nii vbe ẹghẹ hia.

Erhan Ọmukpa

³¹ “Ya igoru ne ama gua ru erhan ọmukpa, u ghi ya igoru ne a ya umọmọ dunmwu ru ẹzi ẹre kevbe erhan rẹn; avbe obobo ne a ya zẹ ose yọ, deba ukhu kevbe ifuẹn obobo ẹre, ehia ghi wa gha re erhan ọkpa deba irẹn.

³² Ọ ghi gha mwẹ abọ ehan vbe asefẹn ọnrẹn, eheha vbe efẹn ọkpa.

³³ Ọkpọkpa vbe nene abọ ehan na, ghi gha mwẹ obobo eheha ne a ya te ẹre egbe ne ọ gha ye vbe obobo almọnd kevbe ukhu kevbe ebe obobo.

³⁴ Ọkpọ ọghe erhan ọmukpa nii ghi gha mwẹ obobo enẹ ne a ya re ẹre ne ọ yevbe obobo almọnd ke ẹe kevbe ukhu kevbe ebe obobo.

³⁵ Ukhu ọkpọkpa ghi gha rre ototọ abọ ọkpọkpa vbe uwu abọ agbeva eheha nii.

³⁶ Avbe ukhu nii kevbe abọ nii ghi ye gha re ọkpa yaba erhan ọmukpa nii. Ọ ghi gha re igoru ne ama gua ne a ya umọmọ dunmwu.

³⁷ Ru ukpa ihinrọn viọ ye erhan ọmukpa nii, u ghi mwamwa ẹn yọ vbene iran gha na gha rhie awanwan iran ghe odaro.

³⁸ “U ghi ya igoru ne ama gua ru uyẹngbe ẹre kevbe emwi ne a ya dọlọ ukpa yi ne ọ rrọọ.

³⁹ U ghi ya igoru ne ọ sẹ uwan ekigbesiyenẹ ru erhan ọmukpa na kevbe emwi nekpa hia fẹẹrẹ ne a lo vbe evba.

⁴⁰ U ghi gbe aro ke otọ ne u ru ẹe zẹ vbene a gie ma ruẹn vbe uhunmwu oke.