Ẹksọdọs 20 - Edo Bible (E Baibol Ẹdo) Version 1996

Uhi Igbe

¹ Osanobua keghi guan avbe ẹmwẹ na hia. Ọ wẹẹ.

² Mẹ ọrọre Nọyaẹnmwa Osanobua ruẹ ne ọ rhie ruẹ ladian hin otọe Igipt rre, lahin owa ọviọnmwa.

³ “Ohan i gie uwẹ mwẹ osa ọvbehe ba imẹ.

⁴ “Ohan i gie uwẹ ka ukhurhẹ ne egbe ruẹ ra ama emwi ne a yi nii rre ẹrinmwi ra ne ọ rre uwu amẹ vbe otọ.

⁵ Ohan i gie uwẹ ya uhunmwu rhanmwẹ otọ ne ukhurhẹ ra ne u ga ẹe rhunmwuda mẹ ọrọre Nọyaẹnmwa Osanobua ruẹ, Osanobua ne ọ ta ekpẹn mẹ khin. Emwa nii khuiwu mwẹ, I gha rria ivbi iran ikhi ya sẹ orre ne ogieha ke ne ogienẹ.

⁶ Sokpan iran nii ho ẹmwẹ mwẹ nii vbe rhie uhi mwẹ mwẹ, aro nọmaa mwẹ gha rre iran egbe ya sẹ orre arriaisẹn arriaisẹn.

⁷ “Ohan i gie uwẹ lo eni imẹ ne Nọyaẹnmwa Osanobua ruẹ vbe odẹ ọkhọ rhunmwuda ọmwa ne ọ lo eni mwẹ ihan, I gha rria ẹre ikhi.

⁸ “Ye Ẹdẹ Ikẹtin rre ne u ya ẹe ru emwi ne ọ huanrẹn ne Nọyaẹnmwa.

⁹ Ẹdẹ ehan ọre u gha ya gha winna iwinna ruẹn hia,

¹⁰ sokpan ẹdẹ ne ogihinrọn, Ẹdẹ Ikẹtin ne a ya fiohan ne imẹ ọre nọ. Vbe ẹdẹ nii, ghẹ winna hiehie, ọre uwẹ nọ, ra ivbi uẹ, ra eviẹn ruẹn ra emwirri ruẹ, ra avbe erhunmwuyẹn nii rre ẹvbo ruẹ.

¹¹ Ẹdẹ ehan ọre mẹ ne Nọyaẹnmwa ya yi ẹrinmwi, agbọn, avbe okun kevbe emwi nii rre uwu iran hia, sokpan vbe ikpẹdẹ ne ne ogihinrọn, I keghi kẹtin. Ọnii ọ zẹe ne imẹ ne Nọyaẹnmwa na fiangbe Ẹdẹ Ikẹtin, I na ya ẹe khian ne ọ huanrẹn.

¹² “Ya ọghọ ne erha a kevbe iye uẹ ne u miẹn ehe na tọ vbe otọ ne imẹ ya nuẹn.

¹³ “Ghẹ de izigha.

¹⁴ “Ghẹ ghẹẹ.

¹⁵ “Ghẹ rha a.

¹⁶ “Ghẹ ba mu ẹmwẹ ohoghe ba ọmwaikọmwa.

¹⁷ “Ghẹ yaro ye owa ẹrrẹe, ghẹ yaro ye amwẹ ẹrrẹe ra eviẹn ọnrẹn ra ẹmila re ra ekẹtẹkẹtẹ ọre ra emwikemwi nii re ọghọe.”

Ohan Ne Ọ Mu Emwa Nii

¹⁸ Ugbẹn vbe emwa nii ghi họn avan ne ukhunmwu kevbe okpe ni vannọ, vbe iran ghi vbe miẹn ayan kevbe uhunmwu oke ne ọ gbe ighogho, iran kegha guọ zighazigha ne ohan, iran na mudia ye urria gban an.

¹⁹ Iran keghi tama e Mosis wẹẹ, “Wẹ gha gu ima guan ighẹ ma gha họn, sokpan afianma fian mwa wẹ, deghẹ Osanobua gu ima guan, ma gha wulo.”

²⁰ E Mosis keghi tama emwa nii wẹẹ, “Wa ghẹ fian afianma, te Osanobua do danmwẹ uwa kẹkan ne u wa miẹn ehe na gha mu ohan rẹn, ne u wa ghẹ ru oru khọ.”

²¹ Sokpan emwa nii keghi ya mudia ye urria gban an, e Mosis ọkpa ọre ọ ghi sikẹ okuku nii vbe ehe ne Osanobua gha ye.

Uhi Vbe Ekpa Aka

²² E Nọyaẹnmwa keghi tama e Mosis wẹ ne ọ tama ivbi Izrẹl wẹẹ: “Wa miẹn wẹ I gu uwa guan ke ẹrinmwi rre.

²³ Wa ghẹ ma amazẹ ẹrọnmwọ ra igoru ne u wa gha vbe gha ga ẹe ba mwẹ.

²⁴ Wa ya ekẹn ma aka mẹ, wa ghi gha zẹ ese rua ne a giẹn uan ke ẹe kevbe ese ne a gba zọ ọghe uwa, kevbe ohuan kevbe ẹmila rua. Eheikehe ne I rhirhi a kha ma uwa ne uwa na gha ga mwẹ, I gha rre do gha fiangbe uwa vbe evba.

²⁵ A deghẹ wa ya okuta ma aka mẹ, wa ghẹ ya okuta ne a guọghọe maẹn, rhunmwuda, wa gha ye a gha uwa kan rẹn nẹ, a ya ẹe khian ne ẹ i ghi gie a lo mẹ.

²⁶ Wa ghẹ ru aka ne a nana ikpawẹ ya gha sẹ mẹ, ne uwa ghẹ ya gha bannọ uan vbe uwa a gha hin ẹnrẹn khian.