Ẹksọdọs 18 - Edo Bible (E Baibol Ẹdo) Version 1996

E Jẹtro Do Tuẹ Mosis

¹ E Jẹtro ne ohẹn e Midian, ne ọre erha amwẹ Mosis keghi họn emwi hia ne Osanobua ru ne Mosis kevbe avbe ivbi Izrẹl ẹghẹ vbe ọ viọ iran ke Igipt ladian.

² Rẹn keghi rhie e Zipora ne amwẹ Mosis mwẹ obọ gha dee do miẹn e Mosis.

³ E Jẹtro kevbe viọ Gẹsiọm kevbe Eliezẹ ne ivbi e Mosis nikpia e eva gha dee. (E Mosis khare wẹẹ, “Orhunmwuyẹn ọre i khin vbe otọe ọrriọvbe”; ọre ọna he ovbi ẹre ne okpia ọkpa Gẹsiọm.

⁴ Ọ kevbe kha wẹẹ, “Osanobua avbe erha mwẹ ọre ọ yọmwẹ obọ, ọ na miẹn mwẹ fan vba obọ umozo ọba Igipt”; ọre ọ na he ovbi ẹre ne okpia nọkpa Eliezẹ.)

⁵ E Jẹtro keghi viọ amwẹ Mosis kevbe ivbi ẹre nikpia gha die uwu ato vbe ehe ne Mosis na bu agọ ye uhunmwu oke ne ọ huanrẹn.

⁶ Rẹn keghi gie ne a khama e Mosis nẹ wẹ iran dee.

⁷ E Mosis keghi khian bu ẹre sẹ odẹ, ọ mu ẹko rhu otọ nẹẹn, ọ keghi ya unu soso ẹre unu. Iran nọ egbe ẹmwẹ egberranmwẹ iran, iran na la uwu owa ukpọn e Mosis.

⁸ E Mosis keghi na iyẹn emwi ne Nọyaẹnmwa rhunmwuda ivbi Izrẹl ru ọba Igipt kevbe ivbi Igipt re ma e Jẹtro. Ọ na iyẹn ọlọghọmwa ne iran he miẹn vbe odẹ kevbe vbene Nọyaẹnmwa miẹn iran fan hẹẹ.

⁹ E Jẹtro ghi họn ena hia, ẹko keghi rhiẹnrhiẹn ọẹn.

¹⁰ Ọ keghi kha wẹẹ, “Rho e Nọyaẹnmwa ne ọ miẹn ruẹn fan vbe obọ ivbi Igipt kevbe ọba Igipt. Rho e Nọyaẹnmwa ne ọ miẹn emwa rẹn fan vbe ne iran na te re eviẹn rre.

¹¹ Banbanna nian, I miẹn wẹ, e Nọyaẹnmwa kpọlọ sẹ avbe ẹbọ hia, rhunmwuda te Osanobua ru vbenian na vbe ọ miẹn oya ne ivbi Izrẹl gha a re vbe obọ ivbi Igipt.”

¹² Ẹre Jẹtro na ya viọ ese gie Osanobua, kevbe emwi imuohan ne a gha giẹn; Errọn kevbe avbe ekaolotu ivbi Izrẹl hia keghi lele orruan e Mosis ne okpia gha dee do rri evbare iruemwi nii zẹ vbe emwi ne a ya ga.

A Zẹlẹ Iran Ni Buohiẹn

¹³ Vbe ikpẹdẹ ne ọ lele ẹe, e Mosis keghi tota ne ọ gha bu ohiẹn emwa nii. emwa kegha rrie ehe ne ọ ye ke owiẹ ya sẹ asọn.

¹⁴ Ugbẹn vbe Jẹtro ghi miẹn iwinna hia ne Mosis winna, ọ keghi nọ wẹẹ, “Vbọ khun emwi ne u ru ne avbe emwa na yi. Vbe uwẹ ọkpa na tota hẹ vbene emwa nii hia na do ga ruẹ ke owiẹ ya sẹ asọn?”

¹⁵ E Mosis keghi wanniẹn wẹẹ, “Ẹ i mwẹ I ma ru ẹe vberriọ rhunmwuda te emwa nii do gha nọ emwi ne Osanobua ho.

¹⁶ Arhin eva gha vbe gui, iran ghi vbe bu mwẹ gha dee, I ghi rhie a se ne nọ rri a se, I ghi ta uhi kevbe iyi Osanobua ma iran.”

¹⁷ E Jẹtro keghi tama rẹn wẹẹ, “Vbene u ru ẹe na i maa.

¹⁸ U gha ru ẹe, te u ra wiẹn egbe ruẹ ya na ke uwẹ kevbe emwa nii guẹ. Ọ na bun gbe sẹ mwẹ, wẹ ọkpa i sẹtin ru ẹe.

¹⁹ Danmwehọ mwẹ nian, gun mwẹ rhie igiodẹ esi ma ruẹn. Osanobua gha vbe yaba ruẹ. Wẹ gha ta ne unu iran na vbe odaro Osanobua, ne u vbe gha viọ imuan ẹmwẹ iran gie ẹe.

²⁰ U ghi vbe ma iran avbe iyi kevbe uhi Osanobua, u ghi vbe rhan otọ re vbene iran gha ya gha yin kevbe vbene iran gha ya ru emwi hẹ ma iran.

²¹ Sokpan, deba ọnii, zẹlẹ emwa nii sẹ vbe uwu iran, ne u ya iran ru ekaolotu emwa na ẹ ọkaolotu arriaisẹn, iyisẹn, ekigbesiyeha kevbe igbe. Ọ kere ne iran gha re emwa nii muohan Osanobua kevbe ne ọ gie a mu ẹtin yan, kevbe ne a i sẹtin rhie oko odieke na.

²² Gie iran gha re ne ọ bu ohiẹn iran na ne a wa rẹn yọ. Iran sẹtin gha viọ ẹzọ nii lọghọ bu ruẹ rre, sokpan iran ghi gha tobọ iran bu avbe ne giẹrẹ nii rrọọ. Erriọ ọre ọ gha na khuẹrhẹ nuẹn sẹ vbe iran ra guẹ mu vbe ihe na.

²³ U gha ru ẹe vbe nian vbene Osanobua yi ẹre iyi, u i khian wiẹn egbe ruẹ ya, a ghi vbe bu ohiẹn iran na hia iran te gha rrie.”

²⁴ E Mosis keghi rhie ẹmwẹ Jẹtro, ọ na ru zẹ vbene ọ kha re.

²⁵ Ọ keghi hannọ emwa nii sẹ ẹe vbe ivbi Izrẹl hia, ọ na ya iran ru ọkaolotu yan iran, ọkaolotu arriaisẹn, iyisẹn, ekigbesiyeha kevbe igbe.

²⁶ Iran kegha re emwa nii bu ohiẹn ọghe emwa nii, zẹ vbe emwa ne a wa rẹn yọ, iran kegha viọ ẹzọ nii lọghọ nii rrọọ bu e Mosis rre, sokpan iran na tobọ iran gha bu ohiẹn ẹzọ ne giẹrẹ nii rrọọ.

²⁷ Ẹre Mosis ghi na gbe ọ khian ẹdẹ hia ne Jẹtro. E Jẹtro na gha rrie ẹvbo ẹre.