Ẹksọdọs 15 - Edo Bible (E Baibol Ẹdo) Version 1996

Ihuan Ne Mosis So

¹ Ẹre Mosis kevbe ivbi Izrẹl na zẹ ihuan so ghe Nọyaẹnmwa wẹẹ, “I gha so ihuan ne Nọyaẹnmwa rhunmwuda ọ miẹn akhọnmiotọ ne ọ mwẹ uyi, ọ filo avbe ẹsin kevbe iran nii hin ẹnrẹn ku uwu okun.

² E Nọyaẹnmwa ya mwẹ khian nọ vbe egbe kevbe nọ mwẹ ẹtin rẹn ọre ọ miẹn mwẹ fan. Osanobua mwẹ nọ, I gha rho ẹre, Osanobua avbe erha mwẹ, I gha so ihuan ukpọlọmwẹ ọnrẹn.

³ Ne ọ khọn okuo ọre Nọyaẹnmwa khin Nọyaẹnmwa ọrọre eni ẹnrẹn.

⁴ Ọ filo ikẹkẹ okuo Igipt, kevbe ivbiyokuo ẹre ku uwu okun; ekhaẹmwẹ ọnrẹn nii maa sẹ, wulo ye uwu Okun Nọbaa.

⁵ Okun nọ dinmwi ro gue iran, iran keghi dinmwi gha rrie otọ zẹ vbe okuta.

⁶ E Nọyaẹnmwa, ọyunnuan ọre ẹtin obọ erha ọmwa ruẹn khin, ọ guọghọ avbe eghian rẹnkhẹnrẹnkhẹn.

⁷ Vbe uwe akhọnmiotọ ruẹ nọkhua u rrua iran ne eghian ruẹn gbe otọ izohu ruẹ baa ladian, ọ keghi giẹn iran an zẹ vbe irunmwu ni ka ẹe.

⁸ Ẹhoho uhiọnrọnmwẹ ruẹn yan okun amẹ ọnrẹn keghi yo zẹvbe utete. Amẹ ne ọ lẹ keghi hin oke zẹ vbe egbekẹn. Okun ne ọ dinmwi keghi do kaka.

⁹ Eghian keghi kha wẹẹ, ‘I gha khu iran, I gha vbe mu iran; I gha ghae ẹfe iran, I gha miẹn iran emwi ne I ho hia; I gha yuo umozo mwẹ ladian, I gha ya ẹtin mwẹ viọ emwi hia ne iran mwẹ.’

¹⁰ Sokpan, ẹhoho uhiọnrọnmwẹ okpa ke ehe ne u ye rre, okun keghi gue ivbi Igipt muotọ. Iran na dinmwi zẹ vbe oze, gha rrie ototọ amẹ ne ọ gbe orrirri nii.

¹¹ “E Nọyaẹnmwa, de ẹbọ ọkpa ne ọ yevbe uwẹ? De ọmwa ne ọ ye vbe uwẹ? Ne uhuanmwẹ ọnrẹn mu ohan? De ọmwa ne ọ yevbe uwẹ ne ọ winna iwinna ọyunnuan, kevbe ne iwinna nekhua ẹre gbe orrirri vberriọ?

¹² U niẹn oberhọmwa ruẹn ladian, otọ keghi minọ avbe eghian re.

¹³ Wẹ nọ mu eyan ruẹn sẹ, u keghi su avbe emwa ne u dẹ werriegbe, ẹtin ruẹn ọre u ya ma iran odẹ, gha rrie owa ruẹ ne ọ huanrẹn.

¹⁴ Avbe okpẹvbo họn ẹn, iran keghi guọ zẹzẹzẹ ne ohan; ohan keghi mu avbe emwa Filistia.

¹⁵ Banbanna nian, avbe ekhaẹmwẹ nii rre Idọm runraẹn nẹ, okpemwa nii rre Moab guọ nẹ. Egbe fu emwa hia nii rre Kenan,

¹⁶ Ohan kevbe orrirri hẹ rhu iran. Iran gualọ ẹtin ruẹn, izegbe zẹ iran zẹ vbe okuta, avbe emwa ruẹn te do gberra, avbe emwa ruẹn ne u dẹe ke ọviẹn ladian.

¹⁷ U viọ iran rre, u keghi gbe iran ẹkun sẹ otọ ye uhunmwu oke. vbe ehe ne u zẹe ya ru owa ruẹ Nọyaẹnmwa. ọgua Osa ne u tobọ ruẹ bọ Nọyaẹnmwa.

¹⁸ E Nọyaẹnmwa wẹ ọre ọ ra gha re ọba ẹdẹ kevbe ẹdẹdẹdẹ.”

Ihuan Ọghe Miriam

¹⁹ Avbe ivbi Izrẹl keghi fian okun rra vbe otọe ne ọ kae, sokpan, ugbẹn vbe ikẹkẹ okuo ivbi Igipt ghi la uwu okun, e Nọyaẹnmwa keghi hihiẹ amẹ werriegbe rre, ọ na gue iran ginna otọ.

²⁰ E Miriam ne akhasẹ ne okhuo, ọtẹn Errọn ne okhuo keghi rhie ukusẹ, avbe ikhuo na vẹ lele ẹe gha kpe isẹ khian, iran kevbe gha kuu.

²¹ E Miriam keghi so ihuan ne iran wẹẹ, “Wa so ihuan ghe Nọyaẹnmwa, ọ miẹn akhọnmiotọ ọghe uyi, ọ filo avbe ẹsin kevbe emwa nii hin iran ku uwu okun.”

Amẹ Ẹzẹ Ne Ọ Rriara

²² E Mosis keghi wẹ ne emwa nii mu egbe, ne iran kpao vbe Okun Nọbaa. Iran keghi la uwu ato ne a tie ẹre Siọ. Iran keghi ya ẹdẹ eha khian vbe uwu ato, sokpan iran ma miẹn amẹ.

²³ Iran keghi do sẹ Ẹzẹ Ne ọ rriara, sokpan amẹ ọnrẹn keghi rriara sẹrriọ wẹ ọ ma gie iran wọn. Ọnii ọzẹe ne a na gha tie ẹre Mara.

²⁴ Emwa nii keghi suẹn gha gui ẹzọ ma e Mosis wẹẹ, “De emwi ne ima ra wọn yi?”

²⁵ E Mosis keghi kakabọ na erhunmwu ghe Nọyaẹnmwa; e Nọyaẹnmwa keghi ma ẹre ike erhan ọkpa, e Mosis muẹn fi uwu amẹ nii, amẹ nii na do khian nọ gie a gha wọn. Evba nii i ọre Nọyaẹnmwa ghi na gbe uhi ne iran, ọ kevbe danmwẹ iran ghe.

²⁶ Ọ keghi kha wẹẹ, “A deghẹ wa họn ẹmwẹ mwẹ, mẹ ne Osanobua rua, ne uwa gha ru emwi ne imẹ ye obọ yi ne uwa gha ye uhi mwẹ rre, ne uwa vbe gha rhie uhi mwẹ hia mwẹ, mẹ i ra ye avbe emianmwẹ ne I mu yan ivbi Igipt rhọkpa rri uwa oya. Mẹ ọrọre Nọyaẹnmwa ne ọ mu uwẹ egbe rran.”

²⁷ Iran keghi do sẹ Ẹlim, ehe ne ẹzẹ iweva kevbe udin ekigbesiyenẹ ye. Iran keghi bu agọ ye ọkpẹn ẹzẹ vbe evba.