Ẹksọdọs 14 - Edo Bible (E Baibol Ẹdo) Version 1996

A Fian Okun Nọbaa Rra

¹ E Nọyaẹnmwa keghi khama e Mosis wẹẹ,

² “Tama ivbi Izrẹl wẹ ne iran fi ọdelegbe ne iran ya yakọ vbe odaro Pi-Hahirọt, vbe ẹkpo Migdọl kevbe Okun Nọbaa vbe odaro Balzẹfọn, Wa bu agọ.

³ Ọba Igipt gha vbe ro wẹẹ, ‘Ivbi Izrẹl gha lẹga vbe uwu oha, ato degbe iran odẹ.’

⁴ Mẹ gha gie ọba Igipt yin ehọ, ọ ghi zẹ iran khu, vbe ne obọ mwẹ nọ gha ke ukhunmwu ne ọba Igipt kevbe ivbi iyokuo ẹre, gha na rhie uyi gunmwe. Ivbi Igipt gha rẹn wẹ mẹ ọrọre Nọyaẹnmwa.” Ivbi Izrẹl keghi ru vbene a khama iran.

⁵ Ugbẹn vbe a ghi khama ọba Igipt wẹ emwa nii lẹ kua, ke irẹn kevbe avbe ekhaẹmwẹ ọnrẹn keghi fi ekhọe werriẹ vbe ekpa iran, iran keghi kha wẹẹ, “Vbe ọna khun emwi ne ima ru na yi? Ma gie ivbi Izrẹl lẹ kua hin ehe ọviẹn ne iran ye ne ima rre!”

⁶ Ọba Igipt keghi dọlọ ikẹkẹ okuo ẹre yi, ọ keghi viọ ivbiyokuo ẹre mwẹ obọ.

⁷ Ọ na viọ ikẹkẹ okuo ẹre ladian deba uri eha vbe uwu ikẹkẹ okuo ẹre nii maa sẹ, avbe ekhaẹmwẹ ọnrẹn keghi ke odaro iran.

⁸ E Nọyaẹnmwa keghi ya ọba Igipt ze vbe udu, ọ na zẹ ivbi Izrẹl khu, emwa nii kpao vbe uwu akhọnmiotọ.

⁹ Ivbiyokuo Igipt kevbe ẹsin hia, kevbe ikẹkẹ okuo ọghe ọba iran ni gua ẹe kevbe ivbiyokuo keghi zẹ iran khu, iran keghi do vba iran vbe ehe ne iran bu agọ yi vbe ọkpẹn Pi-Hahirọt vbe odaro Balzẹfọn.

¹⁰ Ugbẹn vbe ọba Igipt ghi khian sikẹ iran, ivbi Izrẹl keghi miẹn wẹ ivbi Igipt mu okuo bu iran dee. Ohan keghi mu iran, iran na datie Nọyaẹnmwa.

¹¹ Iran keghi tama e Mosis wẹẹ, “Te idin i ghi rre Igipt ra ne u na viọ ima gha de uwu oha ne ima do wulo kua. U ma miẹn emwi ne u ru nian ne u na viọ ima ke Igipt ladian.

¹² Ma ma tama ruẹn ẹghẹ nii vbe a te kpao wẹ enian ọ ra sunu? Ma na kha wẹẹ, ‘Hẹko sẹ mwa rae, ma gha re eviẹn ivbi Igipt.’ Ọ gha te fu ima egbe ne ima gha re eviẹn sẹ nii ima do wulo ye ato vbe emwa na.”

¹³ E Mosis keghi wanniẹn tama emwa nii wẹẹ, “Wa ghẹ fian afianma. Wa mudia gbain ne uwa gha ghe emwi ne Nọyaẹnmwa gha ru ya miẹn uwa fan ẹrẹna; ivbi Igipt ne uwa miẹn ẹrẹna, wa i ghi ra dọlegbe miẹn iran ọvbehe.

¹⁴ E Nọyaẹnmwa gha gbinna ne uwa, emwi ne ọ kan uwa ne uwa gha ru ọrọre ne uwa gha ghe ughe.”

¹⁵ E Nọyaẹnmwa keghi tama e Mosis wẹẹ, “Vbe u a na tu nọ iyobọ hẹ yi? Tama ivbi Izrẹl ne iran khianmwu.

¹⁶ Tọn ọkpọ ruẹ mu ne u niẹn obọ da okun, ne u wannọ ẹn ne ivbi Izrẹl miẹn ehe na la otọ nọkae fian okun rra.

¹⁷ I gha ya ivbi Igipt ze vbe udu sẹrriọ wẹ iran ghi vbe lele iran larọ, vbene I gha ya khọn iran muotọ ighẹ ọba Igipt, ivbi iyokuo ẹre hia, ikẹkẹ okuo ẹre kevbe iran nii gua ẹe nẹẹn, ọ na gha rhie usi gunmwẹ.

¹⁸ I gha khọnmiotọ nẹ, ivbi Igipt gha na rẹn wẹẹ mẹ ọrọre Nọyaẹnmwa.”

¹⁹ Odibo Osanobua ne ọ karo ne ivbiyokuo Izrẹl keghi kpaegbe gha rrie odẹ iyeke, orre okuku ne ọ ke odaro ne iran keghi gberra ghe odẹ iyeke iran.

²⁰ Ọ keghi mudia ye ẹkpo ivbiyokuo Izrẹl kevbe ivbiyokuo Igipt. Okuku keghi gie ebiebi so yan ivbi Igipt, sokpan, ọ keghi rhie uwanmwẹ ne ivbi Izrẹl, rhunmwuda ọnii, avbe iyokuo nii ma sẹtin sikẹ egbe vbe asọn nii hia.

²¹ E Mosis keghi niẹn obọ ẹre da okun, e Nọyaẹnmwa keghi ya ẹhoho ọlarre ovẹn ne ọ wu vbe egbe bi okun werriegbe, ọ keghi hoho la asọn nii hia, ọ keghi ya okun nii khian otọ nọkae. Amẹ keghi fian egbe ye ihe eva.

²² Avbe ivbi Izrẹl keghi la okun nii gberra vbe otọe ne ọ kae vbene amẹ na yevbe egbekẹn vbe obọ eveva.

²³ Ivbi Igipt keghi zẹ iran khu, iran na lele iran la uwu okun kevbe iran kevbe avbe ẹsin hia, ikẹkẹ okuo kevbe iran nii gua ẹe.

²⁴ Ẹdẹ ghi ra gbe, e Nọyaẹnmwa keghi ke uwu orre erhẹn kevbe okuku gbe aro ghe otọ ghe avbe ivbiyokuo Igipt, ọ na fian otighi fi ọbuohiẹn iran.

²⁵ Ọ keghi munọ owẹ ikẹkẹ okuo iran mwẹ sẹrriọ wẹ okhian kegha ba so iran. Avbe ivbi Igipt keghi kha wẹẹ, “Wa gie ima lẹ ne ivbi Izrẹl rhunmwuda e Nọyaẹnmwa ọre ọ gu ima gbinna ne iran!”

²⁶ E Nọyaẹnmwa keghi tama e Mosis wẹẹ, “Niẹn obọ ruẹ da okun ne amẹ lẹ werriegbe yan ivbi Igipt kevbe ikẹkẹ okuo iran kevbe iran nii gua ẹe.”

²⁷ Ẹre Mosis na niẹn obọ ẹre da okun, ẹdẹ ghi gbe, ẹzẹ keghi ro zẹ vbene ọ ka ye ẹdẹ. Ivbi Igipt ghi te ho ne iran lẹ, e Nọyaẹnmwa keghi filo iran ku uwu okun.

²⁸ Amẹ keghi lẹ werriegbe rre, ọ na ro gue avbe ikẹkẹ okuo, iran nii gua ẹe kevbe ivbiyokuo Igipt hia nii lele ivbi Izrẹl la uwu okun, ọkpa ne ọ miẹn uhunmwu i rrọọ.

²⁹ Sokpan ivbi Izrẹl keghi ya owẹ fian okun ne ọ ka ẹe rra vbene amẹ na yevbe egbekẹn ye iran obọ eveva.

³⁰ Vbe ẹdẹ ne ẹdẹrriọ, e Nọyaẹnmwa keghi miẹn ivbi Izrẹl fan vbe obọ ivbi Igipt. Ivbi Izrẹl keghi miẹn ikun iran vbe otọ lele ọkpẹn okun.

³¹ Ivbi Izrẹl ghi miẹn obọ ẹtin nọkhua ne Nọyaẹnmwa ya mu ivbi Igipt, iran kegha mu ohẹn e Nọyaẹnmwa, iran na mu ẹtin yan e Nọyaẹnmwa, rẹn kevbe Mosis ne ọguọmwadia ẹre.