Ẹksọdọs 13 - Edo Bible (E Baibol Ẹdo) Version 1996

A Ya Fiohan ọghe Avbe Emọdiọn

¹ E Nọyaẹnmwa keghi tama e Mosis wẹẹ,

² “Ye avbe emọdiọn ni re ikpia vbe Izrẹl fi ohan mẹ, ọ re ọghe ọmwa nọ ra emwirri, ọghomwẹ nọ.”

Emwiukpo Ebrẹd Ne Ọma Hue

³ E Mosis keghi khama emwa nii wẹẹ, “Wa ghi ya ẹdẹnẹrẹ na ne uwa kpao vbe otọ Igipt ẹro, ehe ne uwa na gha re eviẹn, rhunmwuda ẹrẹna ọrọre ẹdẹ ne Nọyaẹnmwa ya ẹtin nọkhua ẹre viọ uwa ladian. Wa gha rri ebrẹd ne ọ ma hue.

⁴ Vbe ẹdẹ ne uwa kpao vbe Igipt na, uki nokaro nọ, uki Abib ọre nọ.

⁵ E Nọyaẹnmwa wa yan ma avbe erha uwa wẹ rẹn gha mu otọe Kenan, otọe Hiti kevbe Amọri kevbe Hivi kevbe Jebus ne uwa. Otọe ne rọkhọ ne ọ maa emwi okọ wa nọ. Ọ gha ghi viọ uwa sẹ otọe nii nẹ, wa ghi gha ru emwiukpo na vbe nene uki ne okaro ukpukpo.

⁶ Wa ghi rri ebrẹd ne ọ ma hue la ikpẹdẹ ihinrọn, ọ gha ghi sẹ ikpẹdẹ ne ne ogihinrọn, wa ghi ru emwiukpo ẹre ne Nọyaẹnmwa.

⁷ Ebrẹd ne ọ ma hue ọre uwa gha re vbe ikpẹdẹ ihinrọn, wa ghẹ gie a miẹn ebrẹd nọ huere ra eyist vbe ẹvbo uwa hia.

⁸ A gha suẹn emwiukpo nii, wa ghi rhan otọ ẹre ma ivbi uwa wẹ, emwi ne uwa ru ena ba ọrọre rhunmwuda emwi ne Nọyaẹnmwa ru ne uwa vbe uwa kpao vbe otọe Igipt rre.

⁹ Iruemwi na ghi yevbe ama ne u vin ye obọ ra emwi ayere vbe uharo ruẹ ne ọ gha ye ruẹ rre ne u miẹn ehe na gha ta ẹmwẹ uhi e Nọyaẹnmwa rhunmwuda ẹtin nọkhua ọre Nọyaẹnmwa ya rhie ruẹ hin otọ Igipt rre.

¹⁰ U ghi gha ru emwiukpo na vbe ẹghẹ ne a rhie ẹre yi ukpukpo.

Avbe Emọ Ọdiọn

¹¹ “E Nọyaẹnmwa gha viọ uwa sẹ otọ avbe emwa Kenan zẹ vbe ne ọ yan ma uwa kevbe avbe erha uwa odede. Ọ gha ghi rhie ẹre ne uwa nẹ,

¹² wa ghi ya avbe emọdiọn nii re ikpia fiohan ne Nọyaẹnmwa. E Nọyaẹnmwa ọre ọ vbe yan emọ ọdiọn ni re ọwọe vbe emọ ne emwirri uwa gha biẹlẹ.

¹³ Sokpan wa ghi ya oteghe ohuan zọ ese ye ihe emọ ọdiọn ọghe avbe ekẹtẹkẹtẹ ne uwa ya dẹlẹ iran werriegbe. A deghẹ wa i ho ne uwa dẹ ọe werriegbe, wa ghi bun ẹnrẹn ẹyaẹn. Te uwa ra gha dẹlẹ ivbi uwa ne ọdiọn ne ọre okpia werriegbe.

¹⁴ Ọ gha ghi sẹ ẹghẹ nii, a deghẹ ivbi uẹ ghi nọọn wẹẹ, ‘Vbe a ya ena kha yi?’ U ghi wanniẹn tama rẹn wẹẹ, ‘Ẹtin nọkhua ọre Nọyaẹnmwa ya viọ ima ke otọe Igipt ne ima na gha re eviẹn ladian.

¹⁵ Ugbẹn vbe ọba Igipt ghi yin ehọ, vbene ọ ma na gie ima kpao, ọre Nọyaẹnmwa na gbele emọ ọdiọn nii re ikpia nii rre otọ Igipt hia, ọghe emwa nagbọn kevbe ọghe emwirri. Ọ nii ọ si ẹe ne ima na ya emọdiọn nii re ọwọe zọ ese ghe Nọyaẹnmwa sokpan a ghi dẹlẹ ivbi mwa nikpia ne ọdiọn werriegbe.

¹⁶ Iruẹmwi na ghi gha re ayere zẹ vbe ama vbe obọ ruẹ ra orhiema vbe uharo ruẹ rhunmwuda iwinna ẹtin nọkhua ọre Nọyaẹnmwa ya viọ ima ke otọ Igipt ladian.’ ”

Orrẹ Ọghe Okuku Kevbe Orre Ọghe Erhẹn

¹⁷ Ugbẹn vbe ọba Igipt ghi sẹ avbe emwa nii rae nẹ ne iran kpao, Osanobua ma gie iran la odẹ ọkpẹn ẹzẹ Filistia, a gha rhe miẹn wẹ ọnii ọre ọ te ke ẹe sẹ. Osanobua ke kha wẹẹ, “I ma ho ne iran fi ekhọe werriẹ, ne iran dọlegbe gha rrie otọe Igipt vbe iran a miẹn okuo ne iran ra khọn.”

¹⁸ Ye ihe ọnii, ọ ke rhie iran la odẹ ikhinkhian la odẹ ato ne ọ rre odẹ Okun Nọbaa. Ivbi Izrẹl keghi wa gbalọ egbe okuo ọhanabe.

¹⁹ E Mosis keghi mu ikun ọghe Josẹf mwẹ zẹ vbe ne Josẹf ya ivbi Izrẹl vẹn ihẹn ọnrẹn wẹ iran gha ru. E Josẹf ta ẹe wẹẹ, “Ẹ i mwẹ Osanobua ma miẹn uwa fan, wa ghi mu ikun mwẹ ba egbe lahin evba nii rre.”

²⁰ Ivbi Izrẹl keghi kpao vbe Sukọt, iran na ya yakọ vbe Etem vbe Ọkpẹn ato.

²¹ Vbe ẹghẹ avan, e Nọyaẹnmwa ghi ya orre okuku ke odaro iran ne ọ gha ma iran odẹ, kevbe ẹghẹ asọn, ọ ghi ya orre erhẹn ke odaro ne iran ne ọ gha rhie uwanmwẹ ne iran, ne iran miẹn ehe na ye avan kevbe asọn khian.

²² Orre okuku nii kegha ke odaro ne iran vbe avan hia, kevbe orre erhẹn vbe asọn.